Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Eitaboka Loka Akiro Nuitetemit Ebaibuli

Aitetemet 65: Kotiakai Ajakanut

Aitetemet 65: Kotiakai Ajakanut

IJENI ijo kanukinyo ejaar etunganan lo acilicil ekegoe toma atutubena? Alimokit Yawe ngesi aswam ngun. Erai etunganan lo Akija enabi loka Edeke. Ijeni ijo ingai bo enabi? Erai ngesi etunganan lo elimokini Edeke nu epote aiswamaun eroko apak kec.

Akija ka Yeroboam

Ejai Akija ainer kede Yeroboam. Arai Yeroboam etunganan lo abu Solomon ibwaikinite apoloikinit akeswam na aduko. Kiriamunos Akija ka Yeroboam kane orot, abu Akija iswama ibore yen etegelikina. Abu kolacu egoe ke loitetet lo anapit kosodi acilicil nges toma atutubena 12. Abu kolimok Yeroboam ebe: ‘Koyanga atutubena 10 kanukon.’ Ijeni ijo kanukinyo ainakina Akija Yeroboam atutubena 10?

Abu Akija itacau ebe elosi Yawe alemar ajakanut kanejai Solomon. Kobala ebe elosi Yawe ainakin atekerin 10 nejaai Yeroboam. Etodunit do ne ebe atekerin aarei bon esalakinete Rekoboam okoku loka Solomon aipuga.

Epupu Solomon nu alimokini Akija Yeroboam, abu konyunyurikin noi. Abu kotam aiyar Yeroboam. Konye abu Yeroboam koker Misiri. Akaulo nadit, kotwana Solomon. Arai ngesi ekabaka adaun ikar 40, ido kwana okokuke Rekoboam ngesi erai ekabaka. Kopup Yeroboam ko Misiri ebe atwana Solomon, kosodi abongun Isirael.

Mam Rekoboam arai ekabaka lo ajok. Aridakinit itunga adepar ne aridakinitor papake Solomon. Kobu Yeroboam ka icetunga luapolok nejai Ekabaka Rekoboam aingitun ngesi araun lo ejok otunga. Konye mam Rekoboam abu kopupok. Kiyatak aridakin itunga adepar lem sek. Aso apotu do itunga kitarautu Yeroboam ekabaka loka atekerin 10, konye atekerin aarei nuka Benyamin ka Yuda kesi apotu kidarata Rekoboam kwape ekabaka kec.

Mam Yeroboam akoto iketunga abongor Yerusalem aima koyekalu loka Yawe. Abu kiswamau itaak iarei luka esabu kosodi aijaikin itunga luka ajakanut na atekerin 10 aima kesi. Atipet, kilelebun akwap kede aronis ka amumu.

Ajai boboda ationis toma ajakanut na atekerin aarei. Eroko edauna ikar ikany ageun ne arauna Rekoboam ekabaka, kobu ekabaka loka Misiri aitiji Yerusalem. Abu koyanga akais nuipu koyekalu loka Yawe. Edaunit do eyekalu apak naedit epaikinit kwape adukitere.

1 Ikabakan 11:26-43; 12:1-33; 14:21-31.



Angiseta

  • Kolim ikiroria luka itunga iarei luejaasi toma aputo, ido luangai kesi?
  • Inyo abu Akiya iswama kede anapito na anapit ngesi, ido inyoin apolou na aswamisiot angin?
  • Inyo abu Solomon otam aiswamaikin Yeroboam?
  • Kanukinyo etaraunatar itunga Yeroboam ekabaka loka atekerin atomon?
  • Kanukinyo asubuna Yeroboam itaak iarei luka esabu, ido inyo abu otakanik akwap akaulo na akiro nu?
  • Inyo abu otakanik ajakanut na atekerin aarei ka eyekalu loka Yawe loajai Yerusalem?

Angiseta nuiyatakina

  • Kosiom 1 Ikabakan 11:26-43.

    Arai Yeroboam etunganan lo ekoni ai, ido inyo abu Yawe isumunik ngesi erai eric ngesi ikisila luka Edeke? (1 Ika. 11:28, 38)

  • Kosiom 1 Ikabakan 12:1-33.

    Kotoma aanyunet naronon naka Rekoboam, inyo epedorete iuriak ka imakio aisisiaun kanu aimwang apedor? (1 Ika. 12:13; Lim. 7:7; 1 Pet. 5:2, 3)

    Nejai ingai ibusakinit lolo atumunak abear kanuka aitetenio na esipo neseunatar kesi aseununeta nuepol kotoma aijarakec? (1 Ika. 12:6, 7; Awa 1:8, 9; 2 Tim. 3:16, 17; Bur. 13:7)

    Anyoika nu ainakinete Yeroboam asipokin aboisio aarei nu amaere itaak, ido epone ani etoduna na amamus aiyuunit Yawe? (1 Ika. 11:37; 12:26-28)

    Ingai abu ingarenik itunga lu ajakanut na atekerin atomon aipalkin aima nabeit? (1 Ika. 12:32, 33)