Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Eitaboka Loka Akiro Nuitetemit Ebaibuli

Aitetemet 64: Koduk Solomon Eyekalu

Aitetemet 64: Koduk Solomon Eyekalu

EROKO Daudi etwana, abu koinak Solomon aputo kama ejai Edeke kanu adukia eyakalu loka Yawe. Kokaru lokiwongonet loka aipugake, kogeu Solomon aiduk eyekalu, ido abu koyangaik ikar ikanykaarei kede atutubet edukio. Itunga luadukete eyekalu araasi itomoneta luka ilukumin, ido koyanga aiduk isirigin luipu noi. Arai kwagin naarai etosomaitai esabu ka epuesa loapol noi, kotomake.

Ajaatar eyekalu ka agolaik aarei nuapolok kwape ajaatar ewema da. Konye agolai nu arai alalaukec irwan aarei naka ngun nuka ewema. Kijaik Solomon asaduku naka aitutuket aibwaikinio agola nakotoma eyekalu, ido iboro ice luedaritai kowema kes aponi ibwaikinai agola nace.

Kojaun epucit loapol noi kedaun aiduk eyekalu. Kokukokin Solomon kongaren naka eyekalu kosodi ailip kwape ipedoria ijo aanyun kotoma aputo kana. Kobala Solomon Yawe ebe: ‘Koany mam epedori akuj naka akuj ailosikin jo, ido konyet etogo lo nges bo inyo! Konye, wu Edekeka, kengaingait kiira ijo ailip naka ikonitunga nailipenenata kesi kaibois kana.’

Ilipi Ekabaka Solomon

Kedau Solomon ailip ke, kijesun akim kakuj. Kicwea ainakineta nuka itiang nu ainakinitai. Kilelebun aibuses naka Yawe oyekalu. Itodunit na ebe apupi Yawe, ido eyalama ngesi kanuka eyekalu ka ailip naka Solomon. Koraun do eyekalu aboisit na apote itunga aima mere do owema.

Kodau Solomon apak napol ipugai kopone lo abeit ido iyalamasi itunga. Konye, komany Solomon angor nuepu kotoma atekerin ace numam amaete Yawe. Ipedori aanyun adiopet kakesi ijaanakin aputo? Kopedosi angor ke ainakin Solomon aijaanakin idekesio ice. Ijeni ijo nuopotu otakanutu kiswama Solomon nuu? Mam bobo ngesi aiyait itunga opone alo apatana. Abu odedengar, ido mam bobo itunga eyalamasi.

Ijanakini Ekabaka Solomon aputo

Koinak akirot na Yawe anyunyurikin Solomon ido kolimok nges ebe: ‘Abeit ejaari ajakanut kamakon ido ainakini ecetunganan. Konye mam eswamai ngun kapaarasia kon dimarai kama kokokukon. Konye mam ejaari ajakanut kere kokokukon.’ Kaanyutu epone lo eswamaunotor nu.

1 Aisiitonokin 28:9-21; 29:1-9; 1 Ikabakan 5:1-18; 2 Aisiitonokin 6:12-42; 7:1-5; 1 Ikabakan 11:9-13.



Angiseta

  • Apak na etia ai abu Solomon odau kanu arikakin aiduk eyekalu loka Yawe, ido kanukinyo ayangar aiduk ngin isirigin luipu noi?
  • Adi agolai nuapolok nuejaasi toma oyekalu, ido inyo aponi ibwaikinai agola nakotoma?
  • Anyoika nuabu Solomon kolim ailip ke edaun aiduk eyekalu?
  • Epone ani etoduna Yawe ebe iyalama ngesi kede alipan naka Solomon?
  • Inyo apotu angor nuka Solomon opedosi ainakim ngesi aswam, ido inyo abu kotakanik Solomon?
  • Kanukinyo abu Yawe onyunyurikina Solomon, ido anyoika nu abu Yawe kolimok ngesi?

Angiseta nuiyatakina

  • Kosiom 1 Aisiitonokin 28:9, 10.

    Kwa ejaatar akiro nuka Daudi nu iwadikatai 1 Aisiitonokin 28:9, 10, anyoika nuibusakinit oni aitam aswam nignipaaran na aijar wok? (Sab. 19:14; Pil. 4:8, 9)

  • Kosiom 2 Aisiitonokin 6:12-21, 32-42.

    Epone ani etoduna Solomon ebe emamei aduketai na edukuni etunganan na ailosikin Edeke Lojai Kuju kakuj? (2 Siit. 6:18; Asw. 17:24, 25)

    Anyoika nu itodunitos akiro nuka Solomon nuiwadikatai toma 2 Aisiitonokin 6:32, 33 nuikamunitos Yawe? (Asw. 10:34, 35; Gal. 2:6)

  • Kosiom 2 Aisiitonokin 7:1-5.

    Kwape apotu idwe luka Isirael imalatar Yawe akaulo na aanyun abuses ke, epone ani etirora nen oni ne ianyuna arerengusio nuka Yawe kotunga ke? (2 Siit. 7:3; Sab. 22:22; 34:1; 96:2)

  • Kosiom 1 Ikabakan 11:9-13.

    Epone ani itodunitor aijar naka Solomon ajokis na apaikin iyuunit kilom awasia? (1 Ika. 11:4, 9; Mat. 10:22; Apu. 2:10)