Arai Solomon atumunan erauni ekabaka. Amina ngesi Yawe, ido abu kotup aicoreta nuajokak nu ejaikinit ngesi Daudi papake. Kolakara Yawe kede Solomon ido kakware adiopet, kobala nges kotoma airujasit ebe: ‘Solomon inyoin ikoto ijo eong ainakin ijo?’

Kotema Solomon atiar: ‘Wu Yawe, ekadeke, arai eong ikoku yenididi; mam ajeni epone loipugaet. Aso koinakinai etau loepiriana tetere epugai ikonitunga korot loedolit.’

Kitojok Yawe akirot ngin naelipit Solomon. Kotema ebe: ‘Naarai ilip apirianut mere aibut ikar luipu, karaida abar, aso ejaikini ijo etau lokacoa ka apirianut naemameotor lem idiotunganan kere. Konye kainakini bobo numam ijo ilipit, abar ka anyongio.’

Apak naedit, akaulo kangun, kopotu angor aarei nejai Solomon kede akirot nationo. Kobala aberu adiopet ebe: ‘Keboie eong ka aberu na ediopetogo. Abu eong kedou ikoku isapat ido ketuboros apaarasia aarei, kidou aberu nada, ikoku isapat. Kosodi apaaran adiopet, otwana ikoku aberu ana. Konye ne ajotoa, kiperik ikokuke yenatwanit atorobuka kosodi ayangar yenika. Naanyouna kasodi airere ikoku yeni atwanit, abu aany mam arai yeika.’

Kotema aberu ya da ebe: ‘Mam! Ikoku yeni ajaaran ngesi yenika ido yenikatuan ngesi yenike!’ Kobongok aberu nasodit ebe: ‘Mam! Ikoku yenikatwan ngesi yenikon, ido yenikajaran ngesi yenika!’ Kopegasi angor kwangin. Nuinyoika do iswamai Solomon?

Kotema, koomikinai ekileng, ido kenyaun, kobala ebe: ‘Kotiak ikoku yeni ejari irwan aarei, koinak adiopet, atutubet ka nace da atutubet.’

‘Sirikiar!’ komony aberu nakerai ikoku yeni ejari yenike. ‘Kengaingait sirikiar ikoku. Koinak ngesi!’ Konye kobala aberu nace ebe: ‘Sirikijaik idio kasio; kotiak nges.’

Ejai ekabaka Solomon aitemokin ationis kapirianut

Kosodi Solomon abongokin ebe: ‘Siriyarata ikoku! koinak nges nejai aberu nasodit, ngin nges totoke.’ Ajeni Solomon nu naarai totoke ikoku obe emina ngesi noi ido ekapakina ainakin ngesi aberu ya tetere mam eyario. Kepuputu itunga epone lo etemokina Solomon akirot na, kiyalamikinos noi kanu ajaut kede ekabaka loepiriana.

Kotoma aipuga naka Solomon, kisirereng Edeke itunga noi kanu ainakin alupok aitopol akima, ka emawele, emusabibu, itiinin ka inyamat ice da luipu. Konapitos itunga ejok ido koperete otogoi luajokak. Epu iboro luajokak noi kanuka ngin itungan kere.

1 Ikabakan 3:3-28; 4:29-34.



Angiseta

  • Anyoika abu Yawe ingit Solomon, ido epone ani abu ngesi kobongokina?
  • Naarai abu nges iyalamikin kede alipan naka Solomon, inyo abu Yawe isumun ainakin ngesi?
  • Anyoin ationis naninik napotu angor aarei koyautu neijai Solomon?
  • Kwape iteio ijo kotoma aputo epone ani abu Solomon kitemokina ationis ngin?
  • Ekoni bo apugan naka Solomon ai, ido kanukinyo ekonia nen?

Angiseta nuiyatakina

  • Kosiom 1 Ikabakan 3:3-28.

    Inyo epederote ikiliok lueinakinitai apedorosia atukot naka Edeke lolo aisisiaun kotoma akiro nuka Solomon nukotau nuiwadikatai 1 Ikabakan 3:7? (Sab. 119:105; Awa. 3:5, 6)

    Epone ani eraar alipan naka solomon aanyunet najokan naka iboro luebeit ailip? (1 Ika. 3:9, 11; Awa. 30:8, 9; 1 Yok. 5:14)

    Amunokina anyoin einakinit oni epone lo etemokina Solomon ecelet loajai kiding angor aarei nukamunitos apugan naebunit naka Solomon Loapolon, Yesu Kristo? (1 Ika. 3:28; Isa. 9:6, 7; 11:2-4)

  • Kosiom 1 Ikabakan 4:29-34.

    Epone ani abu Yawe kobongokina alipan naka Solomon adumun etau loerimana? (1 Ika. 4:29)

    Kwa atamitotor itunga apupun acoa naka Solomon, epone ani ibusakinitor oni ayangarit aisisia Akirot Naka Edeke? (1 Ika. 4:29, 34; Yok. 17:3; 2 Tim. 3:16)