Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Eitaboka Loka Akiro Nuitetemit Ebaibuli

Aitetemet 62: Atiokisio Kokale Loka Daudi

Aitetemet 62: Atiokisio Kokale Loka Daudi

AKAULO na Daudi ageun aipuga ko Yerusalem abu Yawe kisipedo akejore aitelekanar lukasurupokec irwan ipu. Esumunit Yawe aijaikin akwap nako Kaanan ne ajaas idwe luka Isirael. Ido kwana, kotoma aingarakinio naka Yawe, abu do akwap naesumunitai kere koraun nakec.

Arai Daudi epugan loajok. Amina Yawe. Ibore yenisodit ngesi aswam akaulo na aikamar Yerusalem nesi ayangaar asaduku naka aitutuket naka Yawe ngina. Kokoto adukokin eyekalu lo ibwaikino nesi toma.

Kemojong Daudi, abu kiswama aibucaret narono. Ajeni Daudi ebe erono ayangar ibore yeni icetunganan. Konye atibong adiopet, esakasakai koswi lopadal loka etogoke; koany aberu naetemelel noi. Ekirorike nes Bat-seba ido okilenike ngesi Uria ediopet ko silikaalei luka Daudi.

Kokotokin Daudi Bat-Seba noi, kiton ayangaun ngin togoke. Ajai okilenike awai ojie. Koperoto Daudi kanges, ido akaulo kangun kojenu ngin ebe apotuu. Kokurianar Daudi noi ido kijuka akiro ne ajai Yoab epolon loka ajore ke aibwaikin Uria ngaren naka ejie ne eyararere nges. Komany Daudi Bat-seba ketwana Uria.

Konyunyurik Yawe Daudi. Abu kijuka ekejanakinan Natan alimokin ngesi nuikamunitos adiakanareta ke. Ipedori ijo aanyun Natan inerasi ka Daudi. Kitoronikin Daudi kanu eswamat ngesi, aso mam Yawe abu koar ngesi. Konye kobala Yawe ebe: ‘Naarai iswama ijo iboro lu luarokok, idumuni ijo atiokisio nuipu kotogo kon.’ Itukwii atiokisio nu abu Daudi kodum!

Itoroni Natan aswamisio Daudi

Nasodit, kotwana ikoku ke Bat-seba. Kosodi Aminon ekiaike Daudi adumun inacike Tama bon kosodi aibu nges. Konyunyurikin Abisalom okoku loka Daudi kanukangun tetere eyari Aminon. Ido kokau kisupa Abisalom amin naka itunga luipu, kitaraun ekabaka. Kangetakinet, kiteleka Daudi ejie aipikor Abisalom lo aponi koarai. Eebo, kojaunos Daudi atiokisio nuipu.

Kokiding kanu kere, kouri Bat-seba esapat ece loanyaritai Solomon. Kemojong Daudi ido odeka, kotam Adoniya okokuke araun ekabaka. Kotoma angun abu Daudi konyarau esasedoti lo anyaritai Sadok anyonyoanakin akinyet akou naka Solomon aitodum ebe Solomon ngesi erauni ekabaka. Akaulo do kangun, kotwana Daudi erai lo ikar 70 lukapolou. Epugat ngesi adaun ikar 40, koraun do Solomon ekabaka loka Isirael.

2 Samuel 11:1-27; 12:1-18; 1 Ikabakan 1:1-48.



Angiseta

  • Kotoma aingarakinio naka Yawe anyoika nu apotu kotakanikis akwap nako Kanaan?
  • Anyoika nu apotu iswamaunos apaaran adiopet ne ajaar Daudi oswi lo etogo ke lokajakanut?
  • Kanukinyo abu Yawe onyunyurikina Daudi?
  • Kotoma aputo, ingai bo abu Yawe ijuka alimokin Daudi adiakanareta ke, ido anyoika abu etunganan ngol kolim nuabeit atakanikin Daudi?
  • Ationis anyoin ejaatar Daudi?
  • Ingai abu koraun ekabaka loka Isirael akaulo naka Daudi?

Angiseta nuiyatakina

  • Kosiom 2 Samuel 11:1-27.

    Epone ani eraar, apaikinit epol aswam kotoma aijaanakin Yawe ayuara neijai oni?

    Epone bo ani eriaror Daudi toma adiakar, ido anyoin aikwenyaret einakini na ijaanakinak luka Yawe lolo? (2 Sam. 11:2; Mat. 5:27-29; 1 Kor. 10:12; Yak. 1:14, 15)

  • Kosiom 2 Samuel 12:1-18.

    Anyoika nu epedorete imakio ka auriak aisisiaun kopone kalo abu Natan odolokina Daudi kanu ainakin ngesi aicoret? (2 Sam. 12:1-4; Awa. 12:18; Mat. 13:34)

    Kanukinyo abu Yawe itimio Daudi? (2 Sam. 12:13; Sab. 32:5; 2 Kor. 7:9, 10)