Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Eitaboka Loka Akiro Nuitetemit Ebaibuli

Aitetemet 61: Kitaraunai Daudi Ekabaka

Aitetemet 61: Kitaraunai Daudi Ekabaka

KOTAM bobo Saul aikamun Daudi. Koyanga isilikaalei ke 3,000 luakusiaritos, kolot aimo ngesi. Kisisiau Daudi nu, abu ijuka arotak ke aisisiaun ne edukuritos Saul ka iketunga akuare ngin. Kosodi Daudi aingit iarei kotunga ke ebe: ‘ingai kiupar keong oidukurun luka Saul?’

Kiworoi Daudi keporoto loti Ekabaka Saul

Kobala Abisai ebe: ‘Kiupar eong kajo.’ Arai Abisai okoku loka inacike Daudi na anyaritai Seruia. Kocedunos Daudi ka Abisai odukurun eroko Saul ka iketunga ejotoete. Kolemasi akwara naka Saul ka eketuo loka akipi loasipo osiep akou naka Saul. Amamei yen abu koany arai apupun kesi naarai ajotoete kere noi.

Koany kwana Daudi ka Abisai. Adautu anyoun ido ejaasi kwana aidi na erongat eyuara. Kiworo Daudi ekapolon loka ajore naka Isirael ebe: ‘Abiner, kanukinyo mam ijo idaritor ekonijakait ekabaka? Koany! Aibo ejai akwara naka ekabaka ka eketuo loka akipi?’

Kokweny Saul. Kojen eporoto loka Daudi, kingit ebe: ‘Ijo ngol, Daudi?’ Ipedori ijo aanyun Saul ka Abiner kokwap kane?

Kobongok Daudi Saul atiar: ‘Eebo ekajakait, wu ekabaka.’ Kingit Daudi ebe: ‘Kanukinyo itamitor ijo aikamun eong? Anyoika nueroko nueswamat eong? Akonikwara na, Wu ekabaka. Kobu ediopet kotunga kon kowom.’

Ekabaka Saul ka Abiner

Kocam Saul ebe, ‘Adiaka eong ido eswama nukabangaanut.’ Kolot Daudi orotoke, kobongo Saul da aiboisike. Konye kobala Daudi kotauke ebe: ‘Ebuni Saul aiyar eong adiopet kapaarasia kanu. Ibusakinit eong aisi abear akwap naka Ipilisitian.’ Ido kiswama ngesi ngun. Kopedo Daudi aisibabang Ipilisitian aiyun ebe ejai ngesi owaikec kwana.

Ketubor apak ace, koloto Ipilisitian aitiji idwe luka Isirael. Koarai Saul ka Yonatan kojie. Kitakadik akirot ngin Daudi noi, ido kiwadik ekosio loaiturur lo awoio nges ebe: ‘Eturur kanukon, onaceka Yonatan, akonimin mamakang arai nakaumokin!’

Akaulo kanu, kobongo Daudi Isirael ore lo Keburon. Kojai ejie kidding itunga luaseunitos Isboset okoku loka Saul araut ekabaka ka icetunga luakotosi Daudi araut ekabaka. Konye kitelekasi itunga luka Daudi. Arai Daudi lo ikar 30 itarauno ekabaka. Kipuga ko Keburon adaun ikar ikanyaarei katutubet. Ice kosap luaponi kourikinai ngesi kangina kes luta Aminon, Abisalom, ka Adoniya.

Kodolu apak na alosio Daudi ka iketunga aikamar ere loebus loanyaritai Yerusalem. Kingarenik Yoab okoku loka Seruia, inac naka Daudi ejie. Korop Daudi Yoab kopone kalo aitaraun ngesi apolon loka ajoreke. Kogeu do kwana Daudi aipuga kore Yerusalem.

1 Samuel 26:1-25; 27:1-7; 31:1-6; 2 Samuel 1:26; 3:1-21; 5:1-10; 1 Aisiitonokin 11:1-9.



Angiseta

  • Inyo apotu Daudi ka Abisai iswamaata ne ajotoo Saul kodukuru ke?
  • Anyoika angiseta nuabu Daudi kingit Saul?
  • Akaulo na anyeikin Saul, aibo abu Daudi kolot?
  • Inyo abu kitakadik Daudi noi tetere ngesi iwadikai ekosio lo aiturur?
  • Arai Daudi lo ikar idi lukapolou itarauno nges ekabaka ko Keburon, ido luangai ikiroria luka ikesap?
  • Akaulo, aibo abu Daudi ipugaa kwape ekabaka?

Angiseta nuiyatakina

  • Kosiom 1 Samuel 26:1-25.

    Inyo itodunit alimunet naka Daudi naiwadikatai toma 1 Samuel 26:11 nejai ayait naka Edeke? (Sab. 37:7; Rom. 13:2)

    Neitamia oni kagogong kere aitodun asianut kasodete adumun numam isialamikinitos, epone ani ingarakinatar oni akiro nuka Daudi nuiwadikatai 1 Samuel 26:23 asesen iboro kopone loibusakinit? (1 Ika. 8:32; Sab. 18:20)

  • Kosiom 2 Samuel 1:26.

    Epone ani epedoriata Ikiristayon lolo adukun ‘aminanara naedunyakinit neja kesi bonik ka bonik’ na ajaatar Daudi ka Yonatan? (1 Pet. 4:8; Kol. 3:14; 1 Yok. 4:12)

  • Kosiom 2 Samuel 5:1-10.

    Edaunit Daudi ikar idi ipugai kwape ekabaka, ido epone ani etiakitere apak na? (2 Sam. 5:4, 5)

    Aibo alomunitor apedor naka Daudi, ido epone ani eraar na aisitunet neijai oni lolo? (2 Sam. 5:10; 1 Sam. 16:13; 1 Kor. 1:31; Pil. 4:13)