Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Eitaboka Loka Akiro Nuitetemit Ebaibuli

Aitetemet 60: Abigail Ka Daudi

Aitetemet 60: Abigail Ka Daudi

IJENI ijo aberu naitemelel naebunit airiamun ka Daudi? Erai ekekiror Abigail. Ejaatar aijen na ejok ido abu kisimik Daudi aswam ibore yen arono. Konye eroko oni isisiauna ngun, kaanyutu ber nu ajaasi aiswamanakin Daudi.

Akaulo na Daudi akerit awai kanejai Saul, abu kongop abua. Apotu ikenacan ka lukokale ke kere kimorikikinos kanges kangina. Koloto itunga luadolitos 400 ne ajai ngesi ido oraun Daudi engarenonikec. Kolot Daudi ne ajai ekabaka loka Moab, kobala ebe: ‘Kengaingait, kisiik papaka ka totoka kopotu ne aiboi kajo aitodol ne ajenunia nuetakanikinete eong.’ Etupakini, kogeutu Daudi ka iketunga angopenen korongan.

Arai akaulo na anu Daudi eriamunotor ngesi ka Abigail. Nabal okilenike arai lo abaran. Ajaatar amerekekin 3,000 ka akinei 1,000. Arai Nabal etunganan lo ebitiono. Konye akeberu Abigail arai naetemelel, ojeni bobo da aswam nuejokak. Irwan atipet, abu koyua ekaleke. Kaanyutu opone ani?

Eswamanakinete Daudi ka iketunga Nabal nukasianut. Engarakiitos aidar akemerekekin. Apaaran adiopet, abu Daudi kijuka iketunga nejai Nabal adumun aingarakinio. Kopotu itunga luka Daudi nejai Nabal nepe etubi ngesi ka ikengarakinak ajul nuka amerekekin ke. Arai apaaran na epucit, ido ajaatar Nabal iboro luepu lu ajok anyam. Nu kes abalasi itunga luka Daudi: ‘kiswama isio nukasianut mamakon. Mam ikokuarit adio kamerekekin kon; konye kingarak aidar kes. Kingaingait kwana, koinak isio inyamat idis.’

Kotema Nabal ebe: ‘Mam eong ejaikini ikanyamat nejaas itunga kwa yesi.’ Kinera kopone loebit ido iner iboro lueroko nejai Daudi. Kebongosi itunga lu ne ajai Daudi kosodete alimokin ngesi ngun, konyunyurikin Daudi noi. Kolimok iketunga ebe: ‘Kitinga yesi nginitunganan ekekileng!’ Konyoutu alosit ti aiyar Nabal ka iketunga.

Kolimok ediopet katumunak luka Nabal loapupi akiro nuenera Nabal Abigail nu apotu iswamaunos. Atipet kokapak Abigail inyamat idis. Kibwanenik kes asigirian ace ido kogeu alosit. Kiriamakinos ka Daudi, abu kodoku kwap kasigiria ke, kisuded, kobala ebe: ‘Wu ejakait, kengaingait kinye apodokin okilenika Nabal. Erai ngesi ebang, ido iswamai ngesi iboro luabanganut. Na nges ainakinet. Kengaingait kijau ido itim isio kanu atakanutu.’

Koyau Abigail iyamat kwape ainakinet nejai Daudi

Kobongok Daudi ebe: ‘irai ijo aberu naico, kitikok ijo eong aiyar Nabal kanu atacakin nges kanuka aininiku ke. Kolot ore kainapakina.’ Etwana Nabal, abu Abigail oraun adiopet kangor nuka Daudi.

1 Samuel 22:1-4; 25:1-43.



Angiseta

  • Ingai bo ekiror loka aberu naebunit airiamun ka Daudi kotoma aputo, ido erai ngesi atunganan na ikoni bo ai?
  • Ingai bo Nabal?
  • Kanukinyo ejukara Daudi iketunga nejai Nabal aingitun aingarakinio?
  • Anyoika nu abu Nabal kolimok itunga luka Daudi, ido epone ani abu Daudi ijauna akiro ngun?
  • Epone ani abu Abigail itoduna ebe arai ngesi aberu nacobe?

Angiseta nuiyatakina

  • Kosiom 1 Samuel 22:1-4.

    Epone ani itodiaritor ekale loka Daudi aanyunet najokan kopone loibusakinitor oni aingaranakin bonik ka bonik kotoma onacene loka Ekristayone? (Awa. 17:17; 1 Ses. 5:14)

  • Kosiom 1 Samuel 25:1-43.

    Kanukinyo itetemitere Nabal kapone kalo aimuarit? (1 Sam. 25:2-5, 10, 14, 21, 25)

    Inyo epedorete angor nueraasi Akritayon aisisiaun kane ejai aanyunet naka Abigail? 1 Sam. 25:32, 33; Awa. 31:26; Pes. 5:24)

    Inyoika iboro iarei luaroko luabu Abigail itikok Daudi aswam? (1 Sam. 25:31, 33; Rom. 12:19; Pes. 4:26)

    Epone ani epedoria abongokinet naka Daudi nejaai Abigail aingarakin ikiliok asesen angor kwape esesena Yawe? (Asw. 21:8, 9; Rom. 2:11; 1 Pet. 3:7)