Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Eitaboka Loka Akiro Nuitetemit Ebaibuli

Aitetemet 58: Daudi Ka Goliat

Aitetemet 58: Daudi Ka Goliat

KOPOTU bobo Ipilisitian aitiji idwe luka Isirael. Ejaas kwana inacan luka Daudi luapolok iuni toma ajore naka Saul. Aso adiopepaaran, kolimok Yese Daudi ebe: ‘Koina ikoninacan imomwa luikawooritai ka imugatin. Kojenu epone lo ejaatar kesi.’

Goliath

Kedolu Daudi odukurun luka ajore, kokeria ne ederakina ajore ejie amoun ikenacan. Konyou Goliat ekadedengan loka Ipilisitian aimuanar idwe luka Isirael. Eswamaenenei ngesi nu nginitupuruc ka nginitibong adaun apaarasia 40. Kiworonenei ebe: ‘Koseutu ekes kokiding kus aitiji eong. Arai kiteleka, koar eong, iluor isio ikusibulesin, konye keteleka eong nges, kaar, iluoros yesi ibulesin kosi. Etogogongorit ebe koseutu idiopet kayesi, kajioto.’

Kingit Daudi ice kosilikaalei ebe: ‘Inyoin edumuni etunganan lo eyari Epilisitiat lo ka ayuun idwe luka Isirael kotoma amorosit kana?’

Kobongok esilikaalet ebe, ‘einakini saul etunganan ngol abar na epol noi. Ido einakini nges akokuke obe araun akeberu.’

Konye ekuriaka idwe luka Isirael kere Goliat naarai ikosomon noi. Eoja adepai iputin 9 (ayapior imitai 3) ido ejaatar esilikaalet ece lo edakit ebuku ke.

Koloto isilikaalei ice kolimokis Ekabaka Saul ebe ekoto Daudi aitiji Goliat. Konye, Kotema Saul Daudi atiar: ‘Mam ijo ipedori aitiji Epilisitiat lo. Iroko ijo irai isapat ido erai ngol esilikaalet aijarake kere.’ Kobongok Daudi ebe: ‘Abu eong kaar adubu ka engatuny lu adakaritos amerekekin nuka papaka. Eraun Epilisitiat lo kwape idiopet kakes. Ingarakin Yawe eong.’ Kotema Saul ebe: ‘Kolot, ido kojaun Yawe nepepe kajo.’

Kolot Daudi osamai kolem alica okay nuerurut, kibwaik kes acoeke. Koting aporocet ke, kikunyak neajai epilisitiat. Keanyu Goliat nesi, komen. Koomite ebe epatana noi ayarar Daudi.

Aporocari Daudi alicait

Kotema Goliat ebe: ‘Bia neajai kakorak akonikuan akweny nuka apak, ka itiang luka ais ainyam.’ Konye kobala Daudi ebe: ‘Ibuni ijo neajai kekiling, ka akwara, ka eliru; konye eong abunit mama ijai ijo kokiror loka Yawe. Kikorakini lolo Yawe akanika, kenomi jo, ajepari da akonikou.’

Kisunyak Daudi adingirar ne ajai Goliat. Kolem alicait kocoeke, kipikak aporocet ke, kiiliil noi kagogonguke kere. Koporo alicait ideresit kiton orete loka Goliat, kibiror kwap etwanit! Keanyutu Ipilisitian ebe ebiror ekes kec, kibelokinos kere, kokerata. Kotupakis idwe luka Isirael kesi ido itelekasi ejie.

1 Samuel 17:1-54.



Angiseta

  • Anyoin ainingosit nabu Goliat koinak ajore naka Isirael?
  • Atia bo Goliat ai, ido anyoin ainakinet nabu Ekabaka Saul isumunik etunganan lo eari Goliat?
  • Anyoika nu abu Daudi otema elimoki Saul ngesi ebe mam ngesi epedori aitiji Goliat naarai aroko Daudi erai isapat?
  • Kotoma abongokin Goliat, epone ani etoduna Daudi ebe emunokina ngesi Yawe?
  • Kwape iteio ijo kotoma aputo, inyo abu Daudi itosom ayaria Goliat, ido inyo abu kotakanik Ipilisitian akaulo kana?

Angiseta nuiyatakina

  • Kosiom 1 Samuel 17:1-54.

    Inyo arai aiyeya naka atiting ke naka Daudi, ido epone ani ipedoria oni aisisiaun aketiting? (1 Sam. 17:37, 45; Pes. 6:10, 11)

    Kanukinyo ibusakinitor Ikristayon ainac emoyo lo elagono kwape loka Goliat ne ejaatar kesi abolia araibo aiyengun? (1 Sam. 17:8; Gal. 5:26; 1 Tim. 4:8)

    Epone ani itodunitotor akiro nuka Daudi ebe ajaatar ngesi aiyuun toma aingarakinio naka Edeke? (1 Sam. 17:45-47; 2 Siit. 20:15)

    Aboisit na aitetem nu elagano lo ajai kiding ajoresio aarei nuapegasi, epone ani itodunitotor akiro nu cut ebe, ejie ajaai kiding idekesio nukaisab ka Edeke lokabeit, Yawe? (1 Sam. 17:43, 46, 47)

    Epone ani etamitotor luideuna inyonyoikinitete atupaar aanyunet naka Daudi na amunokina Yawe? (1 Sam. 17:37; Yer. 1:17-19; Apu. 12:17)