Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Eitaboka Loka Akiro Nuitetemit Ebaibuli

Aitetemet 56: Saul—Ekabaka Losodit Loka Isirael

Aitetemet 56: Saul—Ekabaka Losodit Loka Isirael
Samuel ebukokini Saul akinyet anu aseun nges kwape ekabaka

KOANY Samuel ebukoni akinyet akou naka etunganan. Nu atapit kesi aiswamaikin etunganan aitodun ebe adaun aseun ngesi kwape ekabaka. Abu Yawe kolimok Samuel obukokin akinyet akou naka Saul. Erai akinyet naitegelikina na eur sa.

Mam Saul aomit ebe ajok ngesi noi araun ekabaka. Abu kolimok Samuel ebe: ‘Arai eong loka ateter naka Benjamin, nadidi kotoma Isirael. Kanukinyo ibalar ijo ebe araun eong ekabaka?’ Amin Yawe Saul naarai mam ngesi ejoseikit araut loepol. Ngun nes aseuna ngesi nesi araun ekabaka.

Konye mam Saul arai etunganan loecana araibo loadit. Alomunit ngesi okale lo abarit, ido arai ngesi etunganan lotemel ido oaja da kanu. Arai ngesi loaja adepar idiotunganan kere ko Isirael kede eputi ediopet! Arai bobo Saul etunganan lo atirono noi ido ogogong. Eyalamasi itunga ebe aseu Yawe Saul araun ekabaka. Kotaanutu kere ebe: ‘Kobut ekabaka!’

Arokosi lukasurup luka Isirael egogong kwape lem sek. Erokosi kesi eyangaununete aiticanio naepol noi nejaas idwe luka Isirael. Edaun aitaraun Saul ekabaka, atipet kopotu idwe luka Amon aitiji kesi. Kotukok Saul ajore napol noi ido abu kiteleka luka Ammon. Kitalaka na itunga noi ebe erai Saul ekabaka.

Kwape atubonorotor ikar, kingarenikinite Saul idwe luka Isirael aitelekanar lukasurup kec. Ajaatar Saul bobo okokuke loatiting noi lo anyaritai Yonatan. Kingarak Yonatan idwe luka Isirael aipikonor ijiesio luepu. Aroko Ipilisitian eraas lukasurup luaroko noi luka idwe luka Isirael. Adiopepaaran, kopotu Ipilisitian ilukumin ka ilukumin aitiji idwe luka Isirael.

Kolimok Samuel Saul aidareun kiton ne edoluna ngesi ainakin ainakinet nejai Yawe. Konye eyapi Samuel adolun. Kokuriana Saul ebe engeunete Ipilistian aitiji ngesi, aso kisunyak ainakin ainakinet ngesi elopet. Kedolu do Samuel, abu kolimok Saul ebe ipaliik ijo. Kobala Samuel ebe: ‘Ebuni Yawe aseun acetungan araun ekabaka loka Isirael.’

Kokau, kipaliik Saul bobo. Aso kolimok Samuel ngesi ebe: ‘Ejok arimarit Yawe itia ainakin ainakinet nejaai ngesi naka amerekekin nukajokan. Naarai mam ijo ibu korima Yawe, mam Yawe da idari ijo kwape ekabaka loka Isirael.’

Ipedori oni aisisiaun aisisianakinet naejok kane. Itodikinit oni cut ebe ejok arimarit Yawe duc. Boboda itodunit ebe itunganan yeni ajokan, kwape ajaar Saul sek, epedori aijulakin ido aronar. Mam oni ikoto arokiar, ikoto kareka oni?

1 Samuel isulai 9 kiton 11; 13:5-14; 14:47-52; 15:1-35; 2 Samuel 1:23.



Angiseta

  • Kotoma aputo, inyo iswamai Samuel, ido kanukinyo?
  • Kanukinyo akotor Yawe Saul, ido arai ngesi etungan to ekoni ai?
  • Ingai bo ekiror okokuke Saul, ido inyo abu ngesi iswama?
  • Kanukinyo ainakina Saul ainakinet naicweo aboisit na ngesi aidareun Samuel aswam ngun?
  • Anyoika akiro nuisisiauni oni kotoma akiro nuikamunitos Saul?

Angiseta nuiyatakina

  • Kosiom 1 Samuel 9:15-21 ka 10:17-27.

    Epone ani abu ajautene lo aitasono ingarakina Saul ainac amotakin aswam nueroko ne eneratar icetunga erono nejai ngesi? (1 Sam. 9:21; 10:21, 22, 27; Awa. 17:27)

  • Kosiom 1 Samuel 13:5-14.

    Anyoin adiakaret nabu Saul kiswama ko Gilgal? (1 Sam. 10:8; 13:8, 9, 13)

  • Kosiom 1 Samuel 15:1-35.

    Anyoin adiakaret nati nabu Saul kiswama naikamanara kede Agag ekabaka loka Amalek? (1 Sam. 15:2, 3, 8, 9, 22)

    Epone an abu Saul otamia aitojok akeswamisio ka aitam aijular aitoronet? (1 Sam. 15:24)

    Aikwenyaret ani ibusakinit oni lolo apupokin neijaikinere oni airetakinet? (1 Sam. 15:19-21; Sab. 141:5; Awa. 9:8, 9; 11:2)