Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Eitaboka Loka Akiro Nuitetemit Ebaibuli

Aitetemet 53: Aiyaposit Naka Yeputa

Aitetemet 53: Aiyaposit Naka Yeputa
Akoke Yeputa

KIYAPOIKINIT ijo aiyoikinet naidumuni ijo etiono ailelebikin kokau? Etunganan lo ejai aputo na eswamat ngun, ido ngupengun nesi ekadakinitor ngesi. Erai etunganan lo ekatubon loatiting loka Isirael lo anyaritai Yeputa.

Eboie Yeputa kapaarasia numam idwe luka Isirael amaatar Yawe. Eswamaete bobo nuaroko. Koinak Yawe itunga luka Amon aimusung kesi. Koinak na idwe luka Isirael amonyakin Yawe ebe: ‘idiaka kamakon, kingaingait, koyuunai isio!’

Yeputa ka itunga ke

Kitasonikinos itunga kanuka iboro luaroko lueswamaitos. Kitodutu aitasonokec kotoma aima Yawe bobo. Ido kingarak Yawe kesi bobo.

Koseu itunga Yeputa aitiji idwe luka Amon luaroko. Akoto Yeputa Yawe aingarakin ngesi kotoma ojie. Aso kiyapiok Yawe ebe: ‘Arai kijaik ijo idwe luka Amon akanika, ngin yen elomuni kokekia luka ekatogo airiamun eong ne abonguna, eraun ngin yenikon.’

Abu Yawe kopupok aiyaposit naka Yeputa ido abu ingarak ngesi aitelekar. Kebongu Yeputa ore, ijeni ijo ingai bo yenisodit alomun airiamun kanges? Erai akokuke nateluna. Kodelo Yeputa ebe: ‘Otukwi akokuka! Kitisil ijo eong noi. Konye aong akakituk mama ejai Yawe, mam apedori aijulakin.’

Kisisiau akoku naka Yeputa aiyaposit na papake, abu ber kokadak. Naarai erai ngesi anyoun ajalakin papake ka apaupake. Konye ebeit ngesi aiboienen apaarasia ke kere aijanakin Yawe kowemake loajai Silo. Abu kolimok papake ebe: ‘Arai iyapoikit ijo Yawe aiyapoikinet, ibusakinit ijo aitodolikin.’

Aso kolot akoku naka Yeputa Silo ido kiboenenei kangina aijarake kere ijaanakini Yawe kowemake. Kipejonokinete ngesi angor nuka Isirael apaarasia aogon angolikaru ido kiyalamas nepepe kapak kangin. Kominas itunga akoku naka Yeputa naarai arai ngesi ajaanakinan naka Yawe na ajokuna.

Ikatubok 10:6-18; 11:1-40.



Angiseta

  • Ingai bo Yeputa, ido apak anyoin ajaar ngesi?
  • Aiyaposit ani abu Yeputa kolimok Yawe?
  • Kanukinyo akadakina Yeputa ne abonguna ngesi akaulo na aitelekar itunga luka Ammon?
  • Anyoika abu akokuke Yeputa kolim edau ngesi ejenun aiyaposit apapake?
  • Kanukinyo aminatar itunga akoku naka Yeputa?

Angiseta nuiyatakina

  • Kosiom Ikatubok 10:6-18.

    Anyoin aikwenyaret na ibusakinit oni acoikinit kotoma adiakanareta nuka idwe luka Isirael nejai Yawe? (Tub. 10:6, 15, 16; Rom. 15:4; Apu. 2:10)

  • Kosiom Ikatubok 11:1-11, 29-40.

    Epone ani ijenuna oni ebe, Yeputa ainakin akokuke kwape “ainakinet naicweio,” mam apolouke arai aicweikin ngesi akim kwape asubanit na itunga? (Tub. 11:31; Leb. 16:24; Ikis. 18:10, 12)

    Epone ani abu Yeputa koinaki na akokuke kwape asubanit?

    Anyoika ipedori oni aisisiaun kopone lo asesena Yeputa ayaposit ke nejai Yawe? (Tub. 11:35, 39; Lim. 5:4, 5; Mat. 16:24)

    Epone ani eraar akoku naka Yeputa aanyunet najokan nejaas atumunak lu Kristayon kotoma aitosom apak kec kere kanu aijaanakina? (Tub. 11:36; Mat. 6:33; Pil. 3:8)