Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Eitaboka Loka Akiro Nuitetemit Ebaibuli

Aitetemet 51: Rusi Ka Naomi

Aitetemet 51: Rusi Ka Naomi

KOTOMA Obaibuli, idumuni ijo eitabo lo enyaritai Rusi. Erai aitetemet naikamunit ekale lo ajai apaarasia nu ajaatar ikatubok toma Isirael. Erai Rusi aberu natumunan na akwap nako Moab; mam ngesi erai nateker naka Isireal itunga luka Edeke. Konye nesisiauna Rusi nuikamunitos Edeke Yawe lokabeit, abu komin ngesi noi. Erai Naomi aberu namojongit nabu ingarak Rusi aisisiaun nuikamunitos Yawe.

Erai Naomi aberu nalomunit kodwe luka Isirael. Abu ngesi ka okilenike ka odweke iarei koloto akwap naka Moab kapak na ekidiokotor inyamat kakwap na Isirael. Kosodi kapaaran adiopet, kotwana Naomi okilenike. Kakau, komanyata odwe luka Naomi opesur nuka Moab nuanyaritai Rusi ka Orupa. Konye akaulo na ikar 10 kotwaka odwe iarei luka Naomi. Itukwi, koany epone lo akadakinitor Naomi ka apesur nu aarei! Inyoin ti iswamai Naomi kwana?

Adiopepaaran, abu Naomi koseu abongor oreke, otungake. Akotosi Rusi ka Orupa aiboi nepepe kanges, aso kouparous kanges. Konye nepe ejaasi kesi alosit orot, kibelokin Naomi nejaas apesur, kobala kesi ebe: ‘Ape, kobongo nginidiopet kayesi ore loka totoke.’

Kedau Naomi ainu apesur, kobala ebe aso do. Kanukangun, kogeutu aimony akiyo naarai eminas ngesi noi. Kobalasi ebe: ‘Mam! Konye kilosi isio nepepe kajo mama ejaas itungakon.’ Konye kobongok Naomi kesi ebe: ‘Ibusakinit yesi abongor, adweka. Erauni naejok yesi abongor ore.’ Konyou Orupa, kobongor ore. Konye mam Rusi abu obongo.

Kibelokin Naomi neajai ngesi, kobala ebe: ‘Abongo Orupa. Kobongo ijo da otupa ngesi.’ Kotema Rusi atiar: ‘Sirikingainga eong aijar ijo! Inye eong auparos kajo. Ne ilosi ijo nges alosi eong da, ido neiperenenei ijo nges aperenenei eong da. Eraunos ikonitunga ikatunga, Ekonideke da eraun Ekadeke. Neitwanikini ijo nges atwanikin eong, ido nen nges idaikino eong da.’ Edau Rusi ainer nu, mam bobo Naomi abu kotam aingainga ngesi abongor ore.

Awasia do kodolotu angor nu aarei akwap na Isirael. Kosipokinos aiboi ne. Korasak Rusi aiswamaenen amisirin, naarai arai apak na aisak esairi. Kocamak ngesi etunganan loanyaritai Boas aisak esairi amisirin ke. Ijeni ijo totoke Boas? Arai Rakab nako ore Yeriko.

Kapediopepaaran, kolimok Boas Rusi ebe: ‘Apup kere nuikamunitos ijo, ka nukasianut nu iswamaik Naomi. Ajeni epone lo ipalia papakon ka totokon ka akwap da nakolo iurikinio, kobu otunga lumam apengo ijeni. Kotacak Yawe ijo!’

Kobongok Rusi ebe: ‘Irai ijo loisiana kamaka, ejakaitika. Kitalaka ijo eong kopone kalo ajokan lo idauna ijo ainer.’ Kominu Boas Rusi noi ido kodukokinos atipet. Kisialamikis nu Naomi noi! Konye kiyalamikin Naomi noi keurutu Rusi ka Baos esapat kec losodit loanyaritai Obed. Karaun Obed paapake Daudi, lo ibuni oni aisisiaun kokau.

Rusi ka Naomi

Etabo loka Rusi.



Angiseta

  • Epone ani adoluna Naomi akwap nako Moab?
  • Ingai bo Rusi ka Orupa?
  • Anyoika nu abu Rusi ka Orupa iswama angin diopet kakes akaulo na Naomi alimokin kes abongor otunga kec?
  • Ingai bo Boas, ido epone ani abu ngesi ingarakina Rusi ka Naomi?
  • Ingai bo ekiror loka ikoku yen apotu Boas ka Rusi ourutu, ido kanukinyo ibusakinitor oni aitun ngesi?

Angiseta nuiyatakina

  • Kosiom Rusi 1:1-17.

    Anyoin aswamisiot nainakina kotoma amina naebus nabu Rusi itodu (Rusi 1:16, 17)

    Epone ani itodunitor aomisio nuka Rusi ejautene loka “amerekin ace” nejaasi ngul luinyonyoikinitai luerokosi ejaasi toma akwap? (Yok. 10:16; Sek. 8:23)

  • Kosiom Rusi 2:1-23.

    Epone ani itodikinitor Rusi aanyunet naejok nejaa angor nueraas atumunak lolo? (Rusi 2:17, 18; Awa. 23:22; 31:15)

  • Kosiom Rusi 3:5-13.

    Epone ani asesena Boas akapakina naka Rusi adukokin kangesi itia atumunan?

    Anyoika nu isisianakin oni aomit naka Rusi epone lo ibusakinitor oni asesen amin nainakina? (Rusi 3:10; 1 Kor. 13:4, 5)

  • Kosiom Rusi 4:7-17.

    Epone ani eputorotor Ikristayon lukiliok lolo kwape ka Boas? (Rusi 4:9, 10; 1 Tim. 3:1, 12, 13; 5:8)