Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Eitaboka Loka Akiro Nuitetemit Ebaibuli

Aitetemet 48: Itunga Luka Gibeon Luapiriaka

Aitetemet 48: Itunga Luka Gibeon Luapiriaka

KOKAPANAKINOS ireria luipu luka Kaanan aitiji Isirael. Eomitos ebe itelekarete. Konye mam itunga luka ore loayapie loka Gibeon aomitos ngun. Iyunitos kesi cut ebe ingarakinit Edeke Isiraelin ido mam kesi ekotosi aitiji Edeke. Ijeni ijo nuapota itunga luka Gibeon iswamata?

Apotu kijoseikis bala iboiete kanelwana noi. Aso konapata ice kokiliok igoen luacilicila ka amuka nu adaununa. Kibwanakis ipukoi lu acilicila asigiriana kec, ido kotingata atap naonit kirourouna. Koloto nejai Yosua, kobalas ebe: ‘Kiponi isio kakwap naelwana naarai apotu apuputu nuikamunitos Edekekon Yawe lokapedor. Apotu apuputu ngun kere nueswamaikini yesi ko Misiri. Apotu do ingarenok kosi kere kotemasi sio atiar, kotinga inyamat luka erot ido koloto airiamum kakes, kolimokis kes ebe: “Kirai isio ijaanakinak kon. Kitutukoto kasio ebe mam yesi itijiete isio.” Ipedorete yesi aanyun cut ebe ikosinapen acilicilunos kanuka alosit naeoja ido da atap kosi aono ka arouroun.’

Apotu Yosua ka ikapolok kere iyuutu itunga luka Gibeon. Kisumum Yosua kesi ainapakin. Konye akaulo na apaarasia auni, kisisiautu ebe itunga luka Gibeon iboete kosiep anen.

Konyarau Yosua kesi, kingit kesi ebe: ‘Kanukinyo kimodiata isio ebe kilwaka noi?’

Kobongokis itunga luka Gibeon ebe: ‘Naarai aponi kolimokinai isio ebe esumunit ekusideke Yawe ainakin yesi akwap na kere naka Kaanan. Kanuka ngun kipou kakuriakata noi ebe ipedorete yesi aaraar isio.’ Konye apotu idwe luka Isirael kidarata aisumunet kec, ido mam apotu koarata itunga luka Gibeon. Konye kitarautu kesi ibulesin kec.

Konyunyurikin ekabaka loka Yesusalem noi naarai apotu itunga luka Gibeon itutukoto aitutuket na ainapakin nepepe ka idwe luka Isirael. Kobala ikaban luce iwongon ebe: ‘Kopotu kingarakis eong aitiji Gibeon.’ Ido ngun nesi apotu ikabakan lu ikany iswamaata. Apiriaka kereka itunga luka Gibeon atutuk aitutuket na ainapakin kede idwe luka Isirael, na ainaki ikabakan luu aitiji kesi? Ibuni oni aanyun.

Yoshua 9:1-27; 10:1-5.

Yosua ka itunga luka Gibeon


Angiseta

  • Epone ani agitakinatar itunga luka Gibeon kotoma otunga luka Kaanan luajaasi areria luayapiete?
  • Kwape itodiaritere kotoma aputo, inyo apotu itunga luko Gibeon kiswamata, ido kanukinyo?
  • Aisumunet anyoin apotu Yosua ka ikapolok luka Isirael koinakis itunga luka Gibeon, konye inyo apotu kesi odumutu akaulo na apaarasia auni?
  • Inyo abu iswamaun akaulo na apupunatar ikabakan lu oreria luayapiete ebe etutukoto itunga luka Gibeon ainapakin nepepe ka Isirael?

Angiseta nuiyatakina

  • Kosiom Yosua 9:1-27.

    Kwape adaunitor Yawe aicorakin ateker na Isirael ‘amudiar kere eboyon luka akwap,’ inyoika ikeponesio luikeunitai kanu ngesi aideun itunga luka Gibeon? (Yos. 9:22, 24; Mat. 9:13; Asw. 10:34, 35; 2 Pet. 3:9)

    Kanu ngesi aidar aitutuket na eswamat ngesi nepepe kede itunga luka Gibeon, epone ani itodunitor Yosua anyunet najokan nejaas Ikristayon lolo? (Yos. 9:18, 19; Mat. 5:37; Pes. 4:25)

  • Kosiom Yosua 10:1-5.

    Epone ani eputoritor lolo ekodet loepol kede itunga luka Gibeon, ido itereikina kesi nejai inyo? (Yos. 10:4; Sek. 8:23; Mat. 25:35-40; Apu. 12:17)