Kosomar nuejaas toma

Skip to table of contents

Ajenak Luka Yawe

Koseu Angajep Ateso

Aitetemet 47: Ekokolan Kodwe Luka Isirael

Aitetemet 47: Ekokolan Kodwe Luka Isirael
Ibwai Akan iboro luekokot

KOANY ibore ejai etunganan lo ainuk kwap na ewema ke! Elou loibus, ka akitoi naka esabu, ka atutubena nuka epuesa. Ayauni kes kore loko Yeriko. Konye, inyoin ebusakinit aiswamaikin iboro luka Yeriko? Kiitunit ijo?

Arasi kesi lu ebusakinit amudiar, ido esabu ka epuesa, abeit ayangar aingadis naka etogo loka Yawe. Aso epalikisi itunga lu Edeke. Akokwasi iboro ku ebusakinitos Edeke. Ekiror etunganan kalo nesi Akan; ido ngul lu ejaasi Kanges eraasi lu okaleke. Aso kaanyutu nuapotu iwamaunos?

Akaulo na Akan akokoun iboro lu abu Yosua kijuka itunga ice aitiji ere loka Ai. Konye aponi itelekarai kesi kojie. Aponi koori ice, ido kokerata luce. Konyunyurin Yosua. Kibiror ebuburia ido kilip nejai Yawe ebe: ‘Kanukinyo icamakina ijo nu atakanikin isio?’

Kobongok Yawe ebe: ‘Konyou! Adiaka Isirael. Ayangasi ice koboro luabeit amudiar araibo aipikakin aingadis naka etogo loka Yawe. Akokwasi elou loibus kosodete aibwa. Mam eong alosi aisirereng yesi kiton ne imudiaratar nesi ka ngol da lo eyangarit iboro luu.’ Kobala Yawe ebe itodikini ngesi Yosua etunganan laaronon lo.

Aso kotukonok Yosua itunga nepepe, koseu Yawe Akan etunganan loaronon. Kobala Akan ebe: ‘Abeit adiaka. Abu aanyun elou loibus, akitoi naka esabu ka atutubena nuka epuesa. Abu kengobel kes, kayanga kesi. Idumuni ijo ibwaitai kokwap kokiding kewemaka.’

Kedumun iboro lu ka eyaun ne ajai Yosua, kobala ngesi Akan ebe: ‘Kanukinyo eyangauna aiticanio na mamakosi? Kiticani Yawe jo da!’ Kanukangun, kibiribiroto itunga kere Akan ka lukokaleke kitoni atwanare. Mam kereka ngin itodikinit oni ebe mam ibusakinit ayangar iboro lumam eraasi luowok?

Akaulo kangan kolot Isirael aitiji Ai bobo. Kingarak Yawe iketunga kapak kana ido ipikosi ejie.

Yosua 7:1-26; 8:1-29.



Angiseta

  • Kotoma aputo, ingai bo etungan lo enuki abar na ayangauno ko Yeriko, ido luangai lu ejaasi aingarakin ngesi?
  • Kanukinyo eraar aswamisiot naka Akan ka luko kaleke naronon cut?
  • Anyoika nu abu Yawe kotema kingit Yosua ngesi kanukinyo etelelekarere idwe luka Isirael kojie lo ajaikina Ai?
  • Akaulo na ayaunere Akan ka ekaleke ne ajaai Yosua, anyoika apotu iswamaikinos kesi?
  • Asisianakinet naepol ani isisianaki oni etube lo abu Akan odum?

Angiseta nuiyatakina

  • Kosiom Yosua 7:1-26.

    Inyo abu alip naka Yosua itodu nuikamunitos edicaneke kede Lokasuban ke? (Yos. 7:7-9; Sab. 119:145; 1 Yok. 5:14)

    Inyo itodunit aanyunet naka Akan, ido epone ani eraar na aikwenyaret mamawok? (Yos. 7:11, 14, 15; Awa. 15:3; 1 Tim. 5:24; Bur. 4:13)

  • Kosiom Yosua 8:1-29.

    Abwokon anyoin ejaai nejai nginidiopet kaoni nejai atukot na Ekristayone lolo? (Yos. 7:13; Leb. 5:1; Awa. 28:13)