Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Eitaboka Loka Akiro Nuitetemit Ebaibuli

Aitetemet 44: Kibwa Rakab Arotak

Aitetemet 44: Kibwa Rakab Arotak

EJAASI ikiliok lu toma ationis. Ibusakinit kesi aisi arai mam eyario kesi. Eraasi kesi arotak luka Isirael ido aberu na ejai aingarakin kesi ngesi Rakab. Kiboie Rakab kane kotogo loejai arwatat naka ere loko Yeriko. Aso kaanyutu, kanukinyo ejaatar itunga lu toma ationis.

Ekapakina idwe luka Isirael aidok Ecilet loko Yorodan alomar akwap naka Kanaan. Konye eroko kesi iswamauna ngun, abu Yosua kijuka arotak iarei. Kobala kesi ebe: ‘Koloto korota akwap ka ere Yeriko.’

Rakab ka irotak iarai luko Isirael

Kedolutu arotak lu Yeriko, apotu kolomasi togo loka Rakab. Konye kolimok ice ekabaka loko Yeriko ebe: ‘Alomutu idwe luka Isirael iarei akuare naa airot akwap.’ Kepupu ekabaka nuu, abu kijuka itunga nejai Rakab, kicorakis ngesi ebe: ‘Kilolom itunga lueponitos ne ijai ijo!’ Konye kibwaite Rakab arotak oswi loka etogoke. Kotema ngesi atiar: ‘Eebo aponito itunga ne ajai eong, konye mam ajeni ne aponiata. Apotu konyoutu nepe emutonor akwap, eroko egolo erute loka ere. Arai kibwapakisi kesi katipet, idolokinete kes!’ Kibwapakis itunga lu kesi.

Akaulo na ngul anyoun, Kisunyak Rakab aiwonyar oswi lo etogoke. Kolimok arotak ebe: ‘Ajeni cut eong, einakini Yawe yesi akwap na. Kipupu kwape etoonio akipi nuka Angolol Nakarengan nailomuniata ko Misiri ka epone lo opotu yesi koyaratar ikabakan Sikon ka Og. Keswamaik yesi nukasianut, aso kengaingait kisumunikis eong da nukasianut. Kitajarata papaka, totoka, ikanacan ka akanacan.’

Kisumunikis arotak ebe iswamaete kesi ngul, konye ebusakinit Rakab da aswam icebore. Kobalas arotak ebe: ‘Kolem auno nakarengan, kowenik adirisakon ido kotukok ipajanakon kere togokon nepepe kajo. Ido neibonguna aikamar Yeriko, ianyuni auno na kodirisa kon ido mam cut kiyari idiotunganan yen ejai togo.’ Kebongosi arotak ne ajai Yosua, kolimokis ngesi kere nuapotu kotakanutu.

Yosua 2:1-24; Iburanian 11:31.



Angiseta

  • Aibo iboio Rakab?
  • Lubo angai ikilok iarei luejaas aputo, ido kanukinyo ejaatar kesi Yeriko?
  • Anyoika abu ekabaka loko Yeriko kicorak Rakab aswam, ido abongokinet ani abu nges koinak?
  • Epone ani abu Rakab ingarakina ikiliok ngul, ido anyoin aisianut na ingisit ngesi?
  • Aisumunet anyoin apotu arotak kisumunikis Rakab?

Angiseta nuiyatakina

  • Kosiom Yosua 2:1-24.

    Epone ani elelebunor aisumunet naka Yawe naiwadikatai toma Anyoun 23:28 ne asurokinatar idwe luka Isirael Yeriko? (Yos. 2:9-11)

  • Kosiom Iburanian 11:31.

    Epone ani ikeunitor aanyunet naka Rakab ajokis naka aiyuun? (Rom. 1:17; Bur. 10:39; Yak. 2:25)