Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Eitaboka Loka Akiro Nuitetemit Ebaibuli

Aitetemet 41: Emun Loerai Aisinit

Aitetemet 41: Emun Loerai Aisinit
Musa ka emun loka aisinit

EPUTOS kereka ngol kede emun cut obe idolidolikitai okitoi? Mam erai. Esubunitai emun lo itosomaete aisinit. Kolimok Yawe Musa aikajakinit nesi okitoi tetere itunga esesenete nesi kosodete aijar. Konye luce luejaasi kwap eraasi imunuo obe. Atodotodoto kesi itunga ka ainakin adekakin. Ijeni ijo kanukinyo?

Naarai apotu idwe luka Isirael kinerata erono mama ejai Edeke ka Musa. Kirurumaata ebe: ‘Kanukinyo kiyauna sio ko Misiri atwanikin amoding? Emameete inyamat ka akipi da. Ido mam isio ipedori acamun anyamenen emanu lo bobo.’

Konye emanu araasi inyamat lu ajokuka. Kotoma aumokinet nges ainakinia Yawe kesi inyamat lu. Ido kotoma aumokinet nges ainakinere kesi akipi da. Konye mam itunga iyalamas kopone lo idaritor Edeke kesi. Nesi ejukuna Yawe imunuo lukasorit luu aitisilar idwe luka Isirael. Kotodotodoto imunuo kesi ido luipu apotu kotwaka.

Etodotodoete imunuo Isiraelin

Kangetakinet, kopotu itunga nejai Musa kobalas ebe: ‘Kidiaka isio, naarai kipou kenerata erono mama ejai Yawe ka jo da. Kilip nejai Yawe, kolema imunuo luu awai.’

Aso kilip Musa kanuka itunga. Kolimok Yawe Musa asubun emun loka aisinit. Kobala ebe kibwaikinai okitoi ido ngin yenetodio ibusakinit asesen nesi. Kiswama Musa kwape abalar Edeke. Itunga luatodotodo, kosodete asesen emun lo aisinit, apotu kongaleutu ejok.

Ejai aisisiaunet na isisiauna oni kane. Oni kere kija orot kwape ajaatar idwe luka Isirael lu atodotodete imunuo ngun. Ijai oni kere ojautene lo atwanare. Kosesen ido iwanyuni ijo ebe emojongete itunga, edekakinos ido etwakete. Erai kwangin naarai etunganan losodit ka akeberu, Adam ka Keba, apotu kipalikis Yawe ido irai oni idwekec. Konye etemoki Yawe erot lo ipedoria oni aijar ikar lumam edaunos.

Abu Yawe kijuk Okokuke Yesu Kristo toma akwap. Aponi kikajakinai Yesu okitoi, naarai aomitos itunga luipu ebe arono ngesi. Konye ainakinit Yawe Yesu kanu aitajar oni. Arai kisesen oni kasodete aitup ngesi, idumuni do oni aijar namam edaun. Isisiauni oni nuipu nuikamutios nu kokau.

Aimario 21:4-9, Yokana 3:14, 15.



Angiseta

  • Kotoma aputo, inyo yen idolidolikitai okitoi, ido kanukinyo alimokina Yawe Musa aigwaikin nesi nen?
  • Epone ani mam itunga etodunitotor aiyalama kanu eswamaik kere Edeke kesi?
  • Inyo apotu itunga ingita Musa aswam akaulo naYawe aijukun imunuo lukasorit aitodotod kesi?
  • Kanukinyo alimokina Yawe Musa aiswaun emun loka aisinit?
  • Anyoika nu isisiauni oni kotoma aitetemet kana?

Angiseta nuiyatakina

  • Kosiom Aimario 21:4-9.

    Anyoin aikwenyaret na ijaikinitai oni kotoma airurum na idwe luka Isirael naekamunit iboro luainakinit Yawe? (Mar. 21:5, 6; Rom. 2:4)

    Kotoma okar luatupakinete, epone ani etosomaatar idwe luka Isirael emun loka aisinit, ido anyoika abu Ekabaka Kesekia iswamaik nesi? (Mar. 21:9; 2 Ika. 18:1-4)

  • Kosiom Yokana 3:14, 15.

    Epone ani cut itodunitor cut aikajakin emun loka aisinit okitoi aibubuo naka Yesu Kristo (Gal. 3:13; 1 Pet. 2:24)