Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Eitaboka Loka Akiro Nuitetemit Ebaibuli

Aitetemet 40: Kinom Musa Atiiba

Aitetemet 40: Kinom Musa Atiiba

OTUBONOROS ikar—ikar 10, ikar 20, ikar 30, ikar, 39! Ido erokosi idwe luka Isirael ejaas amoding. Konye kidar Yawe iketunga kotoma okar lu kere. Kitani kesi ka emanu. Kingarenikinite kesi paraan kopir loka edou, ido kuare kopir loka akim. Kotoma okar lu, mam ikecegoen apotu kocilicilunos ido akecejeke da mam apotu kobututu.

Erai kwana elap losodit lo ekaru lo akaisongon ageun ne anyounatar ko Misiri. Kidukuroto bobo idwe luka Isirael Kades. Arai ne ajaasi kesi ikar 40 kau kijukaro arotak 12 airot akwap nako Kanaan. Kotwana Miriam inacike Musa ko Kades. Ido kwape sek, ojaun bobo ationis nee.

Mam itunga apotu kodumut akipi. Kirurumakisi Musa: ‘Tiejok arai katwakitos. Kanukinyo kitolumunia sio ko Misiri, ayaun aibois na emamei ibore yen epoloi? Emameete ikinyom, karaida itinin, karaida imusabibun, karaida ekamamagan. Emameete da adisikip numatan.’

Musa kinomi atiiba

Koloto Musa ka Aaron owema loka ariamunun ailip, kotema Yawe Musa: ‘Kotukok itunga nepepe. Kinerata yesi katiiba ngin kakonyen kec. Elomunete akipi nu edolete itunga ka itiang kec kere.’

Kotukok Musa itunga, kobala kes ebe: ‘Aso kopuputu yesi luemamei amuno nejai Edeke! Mam kereka Aaron ka eong kitolomuni akipi katiiba kana kanukus?’ Kinom Musa atiiba irwanarei ka ebelake, kolomutu akipi nuipu atiiba. Kojaunos akipi nuadolitos itunga kere ka itiang aimat.

Konye, konyunyurik Yawe Musa ka Aaron. Ijeni ijo kanukinyo? Naarai abala Musa ka Aaron ebe kesi elosete ayangaun akipi kotoma atiiba. Konye arai cut Yawe ngesi eswamai ngun. Kanu mam Musa ka Aaron ainer abeit naekamunit na, kobala Yawe ebe, elosi ngesi aitisilar kesi. Kotema ebe: ‘Mam yesi itolomarete ikatunga akwap nako Kanaan.’

Atipet, konyoutu idwe luka Isirael ko Kades. Akaulo na apak naedit, kodolutu Moru Kor. Kotwana Aaron kane, kokuja moru. Erai ngesi lo ikar 123 lukapolou ketwani. Kibworoto idwe luka Isirael Aaron adaun apaarasia 30. Koraun Eleasar okokuke esasedoti lopeti loka ateker naka Isirael.

Aimario 20:1-13, 22-29; Ikisila 29:5.



Angiseta

  • Epone bo ani edaria Yawe idwe luka Isirael kamoding?
  • Airurum anyoin apotu idwe luka Isirael iruruma idukuroto Kades?
  • Epone ani ejaikina Yawe akipi kanuka itunga ka itiang kec?
  • Kotoma aputo, ingai bo etunganan lo edodit akekuan, ido kanukinyo iswama ngesi ngun?
  • Kanukinyo anyunyurikina Yawe Musa ka Aaron, ido epone ani etisilanare kesi?
  • Inyo abu kiswamaun ko Moru Kor, ido ingai abu oraun esasedoti lopeti loka Isirael?

Angiseta nuiyatakina

  • Kosiom Aimario 20:1-13, 22-29 ka Ikisila 29:5.

    Anyoika isisiauni oni kopone lo edaria Yawe idwe luka Isirael kamoding? (Ikis. 29:5; Mat. 6:31; Bur. 13:5; Yak. 1:17)

    Epone ani abu Yawe kosesena aikarun naka Musa ka Aaron aitalaun ngesi kakonyen nuka Isirael? (Mar. 20:12; 1 Kor. 10:12; Apu. 4:11)

    Anyoika nu isisiauni oni kopone lo ejauna Musa alecorio naka Yawe? (Mar. 12:3; 20:12, 27, 28; Ikis. 32:4; Bur. 12:7-11)