Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Eitaboka Loka Akiro Nuitetemit Ebaibuli

Aitetemet 39: Koturo Ebela Loka Aaron Aturo

Aitetemet 39: Koturo Ebela Loka Aaron Aturo

KOANY aturo ka araito nukajokak epoloete kobela kalo. Erai lo ebela loka Aaron. Aturo ka araito nukajokak nuu, epolounitos kobela loka Aaron kakuare adiopet bon! Kaanyutu kanukinyo.

Ijaikini Musa Aaron ebela loeturoi

Erimeto idwe luka Isirael kamoding adaun apak kwana. Ice kotunga mam eomitos ebe ebusakinit Musa araut ekengarenon karaida Aaron araut esasedoti lopeti. Kora nges ediopet lo eomit kwangin kede Datan, Abiram ka ikapolok 250 luka itunga. Kopotu lu kere, kobalasi Musa ebe: ‘Kanukinyo do idakakinotor yesi ikulepek aitelekar isio kere?’

Kolimok Musa Kora Ka ipaupake ebe: ‘Moi tupuruc, koyangasi yesi aisupuruneta ido kibwaikis luisupuruno tomakec. Ido kopotu owema loka Yawe. Kiwayuni oni ingai bo eseuni Yawe.’

Kapaaran natupakina, kopotu Kora ka ipaupake 250 owema. Kopotu luceda luepu aigang itunga lu. Kinep anyunyura naka Yawe. Kobala Musa itunga ebe: ‘Kogitaros koweman luka itunga luarokok luu. Siritinga idiobore yen erai yenikec.’ Kopupokis itunga, ido konyoutu koweman luka Kora, Datan ka Abiram.

Kobala Musa: ‘Kana nesi kijenunatar lo eseunit Yawe. Ecila akwap ka ailikor itunga lu arokok luu.’

Nape engetakina Musa einer, kocila akwap. Kiliko akwap ewema loka Kora ka ikeboro kere, ido aimoriar Datan ka Abiram kangul lueja kakes kosodi arapakin. Kepuputu itunga aimony na ngul luerikori akwap, kotanutu ebe: ‘Kakerata, kinyek akwap ailikor oni da!’

Konye eroko Kora ka ipaupake 250 eyapiete kowema. Abu Yawe kijuk akim, konyama ngul kere. Kosodi Yawe alimokin Eleasar okoku loka Aaron alemun aisupuruneta nuka ikatwak atatar kes aipadalikin kanu arapia etem. Arapetait naka etem na eraun aanyunet mama ejaas idwe luka Isirael ebe emamei ice dimarai Aaron ka odweke yeni ibusa

Konye ekoto Yawe aitoduun cut ebe erai Aaron ka odweke eseunit ngesi araun isasedotin. Kotema Yawe Musa atiar: ‘Koinak ngolikapolon loka nginiteker naka Isirael oyau ekebela. Kanuka ateker naka Lebi, koinak Aaron konyau ekebela. Kibwaik ibelai lu toma owema loka aitejenunet ngaren na asaduku naka aitutuket. Eturoi ebela lo etunganan lo aseunit eong kwape esasedoti aturo.’

Kirere Musa atupuruc na atupakini, koany ajaatar ebela loka Aaron aturo ka araito nukajokak epoloete kotomake! Ipedori ijo kwana amisikin kanukinyo ainakina Yawe ebela loka Aaron atolomun aturo?

Aimario 16:1-49; 17:1-11; 26:10.



Angiseta

  • Luangai opotu kipalikis apedor naka Musa ka Aaron, ido anyoika apotu kesi kolimokis Musa?
  • Anyoika nu abu Musa kolimok Kora ka ipaupake 250 aswam?
  • Anyoika nu abu Musa kolimok itunga, ido inyo abu iswamaun nepe edauni ngesi ainer?
  • Inyo abu kiswamaikin Kora ka ipaupake 250?
  • Inyo abu Eleasar, okoku loka Aaron osubia aisupuruneta nuka ikatwak, ido kanukinyo?
  • Kanukinyo ainakina Yawe ebela loka Aaron atolomun aturo? (Koany aputo.)

Angiseta nuiyatakina

  • Kosiom Aimario 16:1-49.

    Inyo abu Kora ka ipaupake iswamata, ido kanukinyo araar na aswamisiot na epaliikin Yawe? (Mar. 16:9, 10, 18; Leb. 10:1, 2; Awa. 11:2)

    Ani aomisiot naronon nabu Kora ka ipaupake 250 “ipolok luka ekodet” ipepeutu? (Mar. 16:1-3; Awa. 15:33; Isa. 49:7)

  • Kosiom Aimario 17:1-11 ka 26:10.

    Inyo etodunitos aturo nuka obela loka Aaron, ido kanukinyo ecorakina Yawe ebe ingadai ebela ngol koingaren naka aitejenunet? (Mar. 17:5, 8, 10)

    Anyoin aisisiaunet na epol na isisiuni oni kotoma aanyunet naka ebela loka Aaron? (Mar. 17:10; Asw. 20:28; Pil. 2:14; Bur. 13:17)