Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Eitaboka Loka Akiro Nuitetemit Ebaibuli

Aitetemet 38: Arotak 12

Aitetemet 38: Arotak 12
Ekoditos arotak luka Isirael araito akitoi

KOSESEN araito nu ibwokitos itunga lu. Koany epone lo epolor aibunget na emusabibu. Erai itunga iarei kesi ekoditos nes ka akitoi. Koany itinin ka akamamagan. Aibo ayaunere araito nuu? Kakwap nako Kanaan. Kiitute ebe arai Kanaan nesi keboitotor Aburaam, Isaak, ka Yakob. Konye kanu ajaunor etenge ngina, ngesi abwosia Yakob ka ekekale Misiri. Kwana, akaulo na atuborotor ikar 216, ejai Musa aingarenikin idwe luka Isirael abongor Kanaan. Adolo kesi aiboisit kamoding na enyaritai Kades.

Itunga lueroko kesi kiboiete kakwap nako Kanaan. Aso abu Musa kijuka arotak 12, kobala kesi ebe: ‘Kojenutu etiai lo itunga luiboite kangina ka epone lo ejaar agogongu kec. Kojenutu da arai ejok akwap kanu akoru iraan. Ido koyautu adioraito nuka akwap.’

Kebongutu arotak lu Kades, apotu kolimokis Musa ebe: ‘Abeit cut, erai akwap naejok.’ Ido kanu aitogogong ngun, kitodikisi Musa araito nuka akwap. Konye kobalas arotak 10 ebe: ‘Itunga luiboiete kakwap eraasi luikososoete ido luegogong. Kiyararo oni arai itam aijaar akwap.’

Kokuriakata idwe luka Isirael kepuputu nuu. Kobalas ebe: ‘Tiejok arai katwakikinito akwap nako Misiri araibo amoding na. Kiwarakino oni kojie ido ikamario angor wok ka idwe da. Kaseutu engarenon ece aboisit na Musa, kabongosi Misiri!’

Konye komunokis arotak iarei Yawe ido kotamata aisililing itunga. Ikiroria kec eraasi Yosua ka Kaleb. Kobalasi ebe: ‘Sirikuriakata. Ejai Yawe kaoni. Epatanar oni airum akwap.’ Konye komam itunga epupokinete. Kokotosi da aiyar Yosua ka Kaleb.

Kitakadik na Yawe noi ido kolimok Musa ebe: ‘Emamei idiopet kotunga luka ikar ageun 20 kuju lukapolou yeni elomari akwap nako Kanaan. Aanyut kesi aanyununetaka nukeswamai ko Misiri kiton amoding ne, konye mam cut emunokina eong. Aso irimete kotoma amoding adaun ikar 40 kiton ne etwania itunganan yenikawasia. Yosua ka Kaleb bon kesi elomarete toma akwap nako Kanaan.’

Aimario 13:1-33; 14:1-38.



Angiseta

  • Inyo iwayuni ijo kama ejai aibunget na emusabibu kotoma aputo, ido aibo ayaunere?
  • Kanukinyo eyakiara Musa arotak 12 akwap nako Kanaan?
  • Anyoika apotu arotak itomon kolimutu kebongutu ne ajai Musa?
  • Epone ani etodunatar arotak iarei amunokina Yawe, ido lukangai kesi?
  • Kanukinyo anyunyurikinor Yawe, ido anyoika abu ngesi kolimok Musa?

Angiseta nuiyatakina

  • Kosiom Aimario 13:1-33.

    Luangai aponi koseunai airot akwap, ido arereng anyoin ajaatatar kesi? (Mar. 13:2, 3, 18-20)

    Kanukinyo agitakinar epone lo asesena Yosua ka Kaleb iboro kotoma arotak luce, ido anyoika isianakinete nu oni? (Mar. 13:28-30; Mat. 17:20; 2 Kor. 5:7)

  • Kosiom Aimario 14:1-38.

    Anyoin aikwenyaret naikamunit airurumakin abwoikinitok luka Yawe na ibusakinit oni apupokin? (Mar. 14:2, 3, 27; Mat. 25:40, 45; 1 Kor. 10:10)

    Epone ani itodunitor Aimario 14:24 ebe epodokinit Yawe nginidiopet kojaanakinak ke? (1 Ika. 19:18; Awa. 15:3)