Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Eitaboka Loka Akiro Nuitetemit Ebaibuli

Aitetemet 37: Ewema Lo Amaere

Aitetemet 37: Ewema Lo Amaere

IJENI ijo inyoin bo aduketait na? Erai nges ewema loitegelikina lo emaere Yawe. Enyaritai da bobo nges aibois nakalaunan. Apotu itunga odautu adukun nesi akaulo na ekaru ediopet kenyoutu ko Misiri. Ijeni ijo arai aomisiot angai na adukun nesi?

Aibois nakalaunan

Arai aomisiot naka Yawe. Ne ajaar Musa kuju Moru Sinai, abu Yawe kolimok ngesi epone loduket. Kobala aisub nesi kopone lo epatanar adutonor. Kopone kalo, apedorio do aitwogot atutebena ke aiboisit ace ido aruconokin bobo kangina. Aso ne ejojaatar idwe luka Isirael kamoding, ebwokenenete kesi ewema.

Arai ireik ijo toma agola nadidi kangetakinet naka ewema, ipedori ijo aanyun asaduku. Enyaritai na asaduku naka aitutuket. Ejaatar asaduku na ka imalaikan iarei arai ikerubin lueswamaunitai kede esabu, ediopet kangoliwai. Kiwadik bobo Edeke Aicorakineta Atomon amoru aerei nubatal naarai abu Musa kobwonga nusodit. Edaritai amoru nuu kotoma asaduku naka aitutuket. Boboda atido naka emanu nesi edaritai kotomake. Iitunit ijo kereka inyoin bo emanu?

Aaron onac loka Musa ngesi abu Yawe koseu kwape esasedoti lopeti. Ingararenikinit ngesi itunga aima Yawe. Ikesapa da eraasi esasedotin.

Kwana, kosesen agola napolon naka ewema. Erai akepolesu irwan aerei adepar agola nadidi. Itei ijo asaduku, kopurie apuru kotomake? Erai lo etem ne icweatar isasedotin iceboro lueurok maa luenyaritai lukisupurununo. Kosodi ejai epir loka atala loejaas icogen ikanyaarei nuka atalan. Ibore yeniuniet kagola kana nesi emesa. Tomake nesi idaritere imugatin 12.

Ejai akalaya na ileleba akipi alaro naka ewema. Itosomaete isasedotin nesi ailotanakinor. Ejai bobo etem loti. Icweio itiang lueyaritai kwape ainakinet nejai Yawe kane. Ejai ewema lo kiding na idukurun, ido iboiete idwe luka Isirael odukurun kec alukakinit nesi.

Anyoun 25:8-40; 26:1-37; 27:1-8; 28:1; 30:1-10, 17-21; 34:1, 2; Iburanian 9:1-5.



Angiseta

  • Epone ani enyaritere aduketai na ejai toma aputo, ido inyo itosomaere nesi?
  • Kanukinyo alimokina Yawe Musa adukun ewema lo epatana adutonor?
  • Anyoin asaduku na ejai toma agola nadidi kangetakinet naka ewema, ido inyo ejai toma asaduku ngin?
  • Ingai bo abu Yawe kose kwape esasedoti, lopeti ido nuinyoika iswamaenenei esasedoti lopeti?
  • Inyoika iboro iuni luejaasi toma agola nalalan naka ewema?
  • Inyoika iboro iarei luejaasi toma alaro naka ewema, ido inyo itosomaere kesi?

Angiseta nuiyatakina

  • Kosiom Anyoun 25:8-40; 26:1-37; 27:1-8; ka 28:1.

    Inyo abwoikinitos ikerubin luajaas ‘oicolong loka aitim’? (Any. 25:20, 22; Mar. 7:89; 2 Ika. 19:15)

  • Kosiom Anyoun 30:1-10, 17-21; 34:1, 2; ka Iburanian 9:1-5.

    Kanukinyo etogogongoritor Yawe aidar aila kwape naepol kanejaasi isasedotin luejaanakinete kotoma owema, ido epone ani etiroritor na oni lolo? (Any. 30:18-21; 40:30, 31; Bur. 10:22)

    Epone ani etodiaritor ekiakia Paul ebe ewema ka aitutuket na Ikisila adauna kapak naewadika ngesi ebalua nejaasi Ikristayon lu Iburanian? (Bur. 9:1, 9; 10:1)