Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Eitaboka Loka Akiro Nuitetemit Ebaibuli

Aitetemet 36: Itaok Yen Esabu

Aitetemet 36: Itaok Yen Esabu

ITUKWI! Inyo bo kwana iswamaete itunga lu? Ejaasi kesi ailip nejai itaok! Kanukinyo iswamata kesi nuu?

Kedau Musa apak naepol kokuju moru, kotemasi itunga ebe: ‘Mam ijeni nudoikis Musa. Aso asubutu edeke loingareniki oni anyoun kakwap kana.’

Acaka Musa amor arei nu ikisila

Kobala Aaron onaceke Musa ebe: ‘Kere ejokak. Kongedununutu itetio luka esabu luejaas aki, koinut eong.’ Kiswamaata itunga ngun, kocala Aaron kes ido kosub itaok yen esabu. Kobalasi itunga ebe: ‘Lo ngesi Edeke wok lokitolomuni oni kakwap nako Misiri.’ Kosodete idwe luka Isirael aipoun epucit loapol noi ka aima itaok yen esabu.

Keanyu Yawe nu, konyunyurikin noi. Kotema Musa atiar: ‘Kisunyak, kodoka kwap. Iswamaete itunga nueroko cut. Emurokisi ikakisila ido ekukonokinos aima itaok yen esabu.’

Imaete itunga itaok yen esabu

Kodoku Musa komoru atipet. Keyapu, nu nges abu ngesi koany. Ewoete itunga ido ikosiete alukakin itaok yen esabu! Kinep noi anyunyura nako Musa, kocaka amoru aerei nuajaasi ikisila tomakec, kobwangabwangaunos amoru toma atutubena nudidik noi. Koyanga itaok yen esabu, kicweik kakim. Kosodi airiear cut.

Eswamaata itunga ibore yen aronon cut. Aso kolimok Musa ice kotoma otunga alemun ikecekilenga. Kobala Musa ebe: ‘Itunga luarokok luemaitos itaok yen esabu ibusakinit atwanare.’ Koarai itunga 3,000! Mam kereka na itodunit ebe ibusakinit oni acoikina aima Yawe bon mere edio kodekesio lukaisab?

Anyoun 32:1-35.



Angiseta

  • Kotoma aputo, inyo iswamaete itunga, ido kanukinyo?
  • Kanukinyo enepuna anyunyura naka Yawe, ido inyo abu Musa kiswama keanyu ngesi nu eswamaete itunga?
  • Inyo abu Musa kolimok icetunga aswam?
  • Anyoin aisisianakinet na ibusakinit aitetemet na aisisianakin oni?

Angiseta nuiyatakina

  • Kosiom Anyoun 32:1-35.

    Epone ani itodunitor akirot na epone lo esesena Yawe ainyalinyal aima naisab ka na abeit? (Any. 32:4-6, 10; 1 Kor. 10:7, 11)

    Acoikina anyoin ibusakinit Ikristayon aitoduun kotoma aseuneta kec kanu aitalakario, kwapenat awoere ka aikosi? (Any. 32:18, 19; Pes. 5:15, 16; 1 Yok. 2:15-17)

    Epone ani etoduna ateker naka Lebi aanyunet najokan kotoma aitogogong adolit? (Any. 32:25-28; Sab. 18:25)