AKAULO na bala ilapio iarei edautu kesi anyoun ko Misiri, kodolutu idwe luka Isirael Moru Sinai, lo boboda enyaritai Koreb. Arai na aiboisit napa eneratar Yawe ka Musa kokiot lo anoki. Kidukuroto itunga ne ido kiboikinos adaun apak na adit.

Kwape edareunitotor itunga ko kwap, abu Musa kodoka kuju moru. Kaidi naka emoru, abu Yawe kolimok Musa ebe ekoto Ngesi idwe luka Isirael arimar Ngesi ido araun iketunga luseuna. Kedoku Musa kwap, abu kolimok idwe luka Isirael nu abala Yawe. Kosodete itunga atemar ebe, erimarete kesi Yawe, naarai ekotosi kesi araun iketunga.

Kiswama do Yawe ibore yeni aumokina kwana. Abu Koinak aidi na emoru apurun ido kojai airetunun napol. Abu ngesi kinerakinos ka itunga kobala ebe: ‘Arai eong Yawe Edeke kon, lokitolomuni ijo kakwap nako Misiri.’ Kosodi ngesi aicorakin kesi ebe: ‘Sirijaenena kicedekesio nabarai eong.’

Amor arei nubatal

Ijaik bobo Edeke idwe luka Isirael ikisila ice ikanyaangon. Kokuriakata itunga noi. Kobalas Musa ebe: ‘Inereta ijo kasio naarai ikuriaka isio ebe arai inerata Edeka kasio, itwaki.’

Kokau, kolimok Yawe Musa ebe: ‘Kodok moru mama ajai. Kainakini ijo amor aerei nubatal nuewadikat eong ikisila luakoto yesi airic.’ Aso kodoka bobo Musa moru. Kiboi kangina adaun apaarasia ka akwaresia da 40.

Ajaatar Edeke ikisila luipu noi kanuka iketunga. Kiwadik Musa ikisila lu kere. Koinak bobo Edeke Musa amor aarei nubatal da. Tomakec ngesi ewadikat Edeke ikisila 10 lu alimokinit ngesi itunga kere. Enyaritai kesi Icorakina Itomon.

Ejai Musa Omoru Sinai

Eraasi Icorakina Itomon ikisila lu epolok noi. Epolok ikisila luce da luejaikini Edeke idwe luka Isirael. Ediopet kotoma okisila lu nges: ‘Komina Yawe Edeke kon kekonitau kere, kakonicoa kere, ka akonijar kere, ka akonigogong kere.’ Ido ece bobo nges: ‘Komina ikoniidunyet kwape iminar bon.’ Abala Okoku loka Edeke, Yesu Kristo ebe lu kesi ikisila iarei luepolok lu ejaikinit Yawe iketunga lu Isirael. Kokau ibuni oni aisisiaun nuipu nuikamunitos Okoku loka Edeke ka akesisianakineta.

Anyoun 19:1-25; 20:1-21; 24:12-18; 31:18; Ikisila 6:4-6; Ilebin 19:18; Matayo 22:36-40.



Angiseta

  • Akaulo na ilapio iarei kedautu anyoun ko Misiri, aibo apotu idwe luka Isirael idukuroto?
  • Inyoin abala Yawe akoto ngesi itunga aswam, ido anyoin abongokinet kec?
  • Kanukinyo ainakina Yawe Musa amoru aerei nubatal?
  • Aidokokin toma Okisila Itomon, ani icekisila luabu Yawe koinak idwe luka Isirael?
  • Ani ikisila iarei luabala Yesu Kristo erasi luepolok?

Angiseta nuiyatakina

  • Kosiom Anyoun 19:1-25; 20:1-21; 24:12-18; ka 31:18.

    Epone ani ingarakinatar oni akiro nuiwadikatai toma Anyoun 19:8 amisiikin nuimoriarit aswam na ainakin Okristayone? (Mat. 16:24; 1 Pet. 4:1-3)

  • Kosiom Ikisila 6:4-6; Ilebin 19:18; ka Matayo 22:36-40.

    Epone ani itodunator Ikristayon aminakec kanuka Edeke ka idunyeta? (Mk. 6:34; Asw. 4:20; Rom. 15:2)