Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Eitaboka Loka Akiro Nuitetemit Ebaibuli

Aitetemet 34: Inyamat Lutetiak

Aitetemet 34: Inyamat Lutetiak

IPEDORI ijo alimun ibore yen etukonokinete itunga ngul kokwap? Esubit bala akako. Ekwang, edit ido oputos akako. Konye mam erai akako; erai ibore yen ebeit ainyam.

Israelin etukete emanu

Erai akaulo bala na elap ediopet bon ageun ne anyounatar idwe luka Isirael ko Misiri. Ejaasi kesi amoding. Kwape ikidiokotor inyamat lu epoloete kane, apotu itunga kogeutu airurum kobalasi ebe: ‘Ti gwai Yawe kiyarak akwap nako Misiri. Gwai ajaas ngina inyamat kere lukikoto.’

Kobala Yawe: ‘Etetepikini yes atap naebuni kokuju.’ Ido nu nges abu Yawe kiswama. Atupuruc na atupakini, keanyutu idwe luka Isirael ibore yen akwang yeni atepunit, kingitanaros ebe: ‘Inyo bo ngin?’

Kotema Musa ebe: ‘Lu kesi inyamat lu ainaki Yawe yesi ainyam.’ Konyarata itunga nesi EMANU. Ajijumuke da kosubite bala imugatin luka esik.

Kobala Musa ebe: ‘Isekete yes luipu kwape epedoria nginitunganan ainyam.’ Aso nginitupuruc, nu duc eswamaenenete kesi. Ido kemwaniar akolong, kocalar emanu loasalit kwap.

Kobala bobo Musa ebe: ‘Emamei yen ebeit edeun edio ko manu kiton apaaran na etupakini.’ Konye ice kotunga mam apotu kopupokisi. Ijeni ijo nu etakanunete? Emanu lo edeunitai kiton tupuruc nesi eleleba ikur ido ageuni auruun!

Ajai apaaran adiopet na osabiti, na alimokinit Yawe itunga asekun, emanu lo irwan aerei. Arai na apaaran nakikanyetekape. Abala Yawe ebe aideun ece kiton apaaran na etupakini naarai mam nges alosi atitetepikin edio kere kapaaran nakikanyetekaarei. Kideutu kesi emanu kiton apaaran nakikanyetekaarei, mam ikur elelebunos ido mam auruni! Arai na aumokinet ace!

Ikar kere lu ajaatar idwe luka Isirael amoding, etanenei Yawe kesi kede emanu.

Anyoun 16:1-36; Aimario 11:7-9; Yosua 5:10-12.



Angiseta

  • Kotoma aputo, inyoin bo yen esekete itunga kokwap ido enyaritai nesi biai?
  • Anyoin aicorakinet nabu Musa koinak itunga kanu atukonokin emanu?
  • Anyoika nu abu Yawe kolimok itunga aswam kapaaran nakikanyetekape, ido kanukinyo?
  • Aumokinet anyoin eswamai Yawe isiperori emanu kiton apaaran naikanyetekaarei?
  • Apak na etia ai abu Yawe kodau kitanyami itunga kede emanu?

Angiseta nuiyatakina

  • Kosiom Anyoun 16:1-36 ka Aimario 11:7-9.

    Anyoika nu itodunit Anyoun 16:8 kanu oni arimarit aseununeta nuka Edeke kotoma atukot naka Ikristayon? (Bur. 13:17)

    Kotoma amoding, epone ani esitoikitere kanginipaaran idwe luka Israeli kanu agongakina kec nejai Yawe? (Any. 16:14-16, 35; Ikis. 8:2, 3)

    Anyoin aitupuset nabu Yesu koinak emanu, ido epone ani imeda oni kotoma ‘onyamat luepote kotoma akuj’? (Yok. 6:31-35, 40)

  • Kosiom Yosua 5:10-12.

    Ikar idi edaunitos idwe luka Israel enyamete emanu, epone ani etemio na kesi, ido anyoika nuisisiauni oni kakiro kanu? (Any. 16:35; Mar. 11:4-6; 1 Kor. 10:10, 11)