Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Eitaboka Loka Akiro Nuitetemit Ebaibuli

Aitetemet 33: Atubor Kangolol Nakarengan

Aitetemet 33: Atubor Kangolol Nakarengan

KOANY nu iswamasi! Erai lo Musa eriorit ekebela Angolol Nakarengan. Ngul lu ejaasi kanges kakan kaya eyuara eraasi Isiraelin. Konye Parao ka akejore kere ejaasi alumor toma angolol. Kaanyutu epono lo atakanunatar nuu.

Alumosi ajore Imisirian

Kwape isisiaunitor, abu Parao olimok Isiraelin anyoun ko Misiri akaulo na ayangauna Edeke aiticanet nakitomonet otunga luko Misiri. Ikiliok bala 600,000 luka Isirael ido da angor ka idwe luipu kesi apotu konyoutu. Boboda ekodet lo apol noi loka itunga ice luapotu kiyutu Yawe kes apotu kouparos ka Isiraelin. Kesi kere apotu koyangasi amerekekin, akinei, ka akituk kec.

Eroko enyouna, apotu Isiraelin kilipata itunga luko Misiri igoen ka iboro ice luesubitai ka esabu ka epuesa. Kokuriakata itunga luko Misiri noi kanuka aiticanet kangin nakawasia naja kesi. Kanukangun, kijaikisi Isiraelin nginibore kere yeni engisitos.

Akaulo na apaarasia adis, kodulutu Isiraelin Angolol Nakarengan. Kiyengutu kangina. Kotoma apak ngin, kibelokin etau loka Parao ka iketunga ebe aosikis kesi Isiraelin anyoun. Kobalas ebe: ‘Ijalak oni ibulesin wok alosit!’

Kibelok Parao akeomisio bobo. Kitemok agalike naka ejie ka akejore. Kibwapak idwe luka Isirael ka agalin 600 nuseuna ka agalin kere nuka Misiri.

Kiteluosi Isiraelin Parao ka akejore ibwapakinit kesi, kokuriakaros noi. Amamei ecepone lo akerit. Ajai Angolol Nakarengan ngaren kec ido ebwapakinotos kesi itunga luko Misiri kokau. Konye kosipok Yawe epir loka edou kiding na iketunga ka itunga luko Misiri. Aso mam itunga luko Misiri apedorete aanyun Isiraelin ejok kanu asurokin kesi.

Kolimok Yawe Musa arior akebela Angolol Nakarengan. Ne eswamauna ngun. Kitukut Yawe ekwam lokokide loegogong, kotiakas akip nuka angolol, kosubito akip bala arwatat kakan nakoteten, kakan da nakokediany.

Kosodete Isiraelin ageun aitor kiding angolol naeonit. Abu koyangait isawan kanu itunga luarasi aritai aritai kede itiang kec kere atubor okweka juai eyuara. Kawasia do, kopedosi itunga luko Misiri aanyun Isiraelin bobo. Ajaasi ibulesin kec aisi! Kolomasi angolol, kotupakisi kesi katipet.

Edautu alomar, kisipok Edeke akokoron nuka agalin kec. Kokuriakata itunga luko Misiri, kodelosi ebe: ‘Itijie Yawe oni kanuka Isiraelin. Kakerata kane!’ Konye amamei do apak.

Ne do nesi alimokina Yawe Musa arior ekebela Angolol Nakarengan, kwape abu ijo koanyuna kotoma aputo kana. Ido ne eswamauna Musa ngun, kobongut akipi, korapasi itunga luko Misiri ka agalin kec. Atuparit ajore kere Isiraelin angolol. Amamei idiopet kotunga luko Misiri yeni abu kojar!

Kiyalamikinos itunga luka Edeke kere kanu ayuar! Koyeikis ikiliok ekosio lo aiturit Yawe, kobalas: ‘Keteleka Yawe cut. Acakaki abalasin ka ebwanenok kec toma angolol.’ Kolem Miriam inacike Musa, ikesiman, kotupakisi angor kere ngesi kisiman. Kikosioto kaiyalama, koyeete ekosio lope ayeete ikiok: ‘Eteleka Yawe cut. Acakaki abalasin ka ebwanenok kec toma angolol.’

Anyoun isulai 12 kiton 15.



Angiseta

  • Idi ikiloik luka Isirael, aimoriarit nepepe angor ka idwe luapotu konyoutu ko Misiri, ido luangai apotu konyoutu kakes?
  • Epone ani abu Parao opupuna akaulo na ngesi acamakin Isiraeli anyoun, ido inyo abu ngesi kiswama?
  • Inyo abu Yawe kiswama kanu asimik Itunga luko Misiri asurokin iketunga?
  • Inyo abu iswamaun erio Musa ekebela nejai Angolol Narengan, ido inyo apotu Isiraelin kiswamata?
  • Inyo abu kotakam ketupasi itunga luko Misiri Isiraelin toma angolol?
  • Epone ani apotu Isiraelin itodunatar ebe alakara ido iyalamasi nejai Yawe kanu ayuar kesi?

Angiseta nuiyatakina

  • Kosiom Anyoun 12:33-36.

    Epone ani aayuna Yawe ebe atacakin iketunga kanu ebulesene kec loikar nuipu ijaanakinete itunga luko Misiri? (Any. 3:21, 22; 12:35, 36)

  • Kosiom Anyoun 14:1-31.

    Epone ani etiroratar akiro nuka Musa nuiwadikatai Anyoun 14:13, 14 ijaanakinak luka Yawe lolo kwape iterekinatar kesi kede ejie loebunit loka Arumagedon? (2 Siit. 20:17; Sab. 91:8)

  • Kosiom Anyoun 15:1-8, 20, 21.

    Kanukinyo ibusakinitor ijaanakinak luka Yawe aiturit nges ka ikososinei? (Any. 15:1, 2; Sab. 105:2, 3; Apu. 15:3, 4)

    Anyoun aanyunet na aiturit Yawe na abu Mirian ka angor Kangolol Nakarengan itodikis angor nu Kristayon lolo? (Any. 15:20, 21; Sab. 68:11)