Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Eitaboka Loka Akiro Nuitetemit Ebaibuli

Aitetemet 31: Koanyutu Musa Ka Aaron Parao

Aitetemet 31: Koanyutu Musa Ka Aaron Parao

KEBONGO Musa Misiri, abu kolimok onaceke Aaron kere nuekamunitos aumonokineta kwa. Ido ne etodikina Musa ka Aaron Isiraelin aumonokineta nuu, apotu itunga kere kiyuutu ebe ajai Yawe kakes.

Kosodi Musa ka Aaron alosit aanyun Parao. Apotu kolimokis ngesi ebe: ‘Ebala Yawe Edeke loka Isirael ebe: “Kiisik ikatunga alosit naka apaarasia auni tetere emaete eong kamoding.”’ Konye kobong Parao: ‘Mam eong eyunit Yawe. Ido mam eong alosi acamakin Isirael alositi.’

Konyunyurikin Parao naarai akotosi itunga aisiyengunio kotoma aswam kanu aima Yawe. Aso kobuik kes aswam kagogong adepar lem sek. Apotu Isiraelin itoronata Musa kanu epone lo ayaitere kesi, kopup Musa erono. Konye kolimok Yawe ngesi ainyein aiyalongong. Kobala Yawe ebe: ‘Alosi eong ainakin Parao ajalakin ikatunga alosit.’

Musa ka Aaron abeberikisi Parao

Ouparos bobo Musa ka Aaron aanyun Parao. Kapak kana, kiswamautu aumokinet. Kocakak Aaron ekebela kwap, koraun emun loti noi. Konye kocakanakis itunga Parao lukacoa da ibelai kwap, kotakanutu imunuo. Aso koany, enyami emun loka Aaron imunuo kere luka itunga lukacoa. Konye mam Parao abu kocamak Isiraelin alosit.

Kodolu apak na Yawe aisisianakin Parao asisianakinet. Ijeni ijo epone lo abu ngesi kiswamaa ngun? Arai kanu ayangaun aiticaneta 10 araibo atiokisio nuepolok toma akwap nako Misiri.

Akaulo na aticaneta nuipu, konyarau Parao Musa kotema atiar: ‘Kitanang aiticanet na ido ajalakin eong isirael alosit.’ Konye ne itanangere aiticanet, ejulakini bobo Parao akeomisiot. Mam acamakini itunga alosit. Konye do kangetakinet, akaulo na aiticanet natomonet; abu Parao kocamak Isiraelin alosit.

Ijeni anginidiopet kotoma aiticaneta 10 nu? Kopukoo apapula naitupakini, kesisiautu nuikamunitos kes.

Anyoun 4:27-31; 5:1-23; 6:1-13, 26-30; 7:1-13.



Angiseta

  • Epone ani apotu aumonokineta nu eswamai Musa ka Aaron otiroratar Isiraelin?
  • Inyo apotu Musa ka Aaron kolimokis Parao, ido kobong Parao biai?
  • Kwape itodunitere kaputo, inyo abu kotakan ne acakakina Aaron ekebela kwap?
  • Epone ani abu Yawe kisisianakina Parao aisisianakinet, ido anyoika abu Parao iswama?
  • Inyo abu kiswamaun akaulo na aiticanet nakitomonet?

Angiseta nuiyatakina

  • Kosiom Anyoun 4:27-31 ka 5:1-23.

    Inyo aomit Parao ne abalar ngesi ebe: “Mam eong ajeni EJAKAIT”? (Any. 5:2; 1 Sam. 2:12; Rom. 1:21)

  • Kosiom Anyoun 6:1-13, 26-30.

    Opone ani mam Yawe abu itejenunor ne ajai Aburaam, Isaak, ka Yakob? (Any. 3:13, 14; 6:3; Age. 12:8)

    Ipupuni oni biai akaulo na ajenun ebe abu Yawe itosom Musa karaida aomit Musa ebe mam nges apedori aswam na ainakinitai ngesi? (Any. 6:12, 30; Luka 21:13-15)

  • Kosiom Anyoun 7:1-13.

    Aanyunet ani apotu Musa ka Aaron kitodikisi ijaanakinak luka Edeke lolo ne ainakintar Parao itubesia luka Yawe katiting kere? (Any. 7:2, 3, 6; Asw. 4:29-31)

    Epone ani etoduna Yawe ayaite ke adepar idekesio luko Misiri? (Any. 7:12; 1 Siit. 29:12)