Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Eitaboka Loka Akiro Nuitetemit Ebaibuli

Aitetemet 30: Ekiot Lo Anoki Akim

Aitetemet 30: Ekiot Lo Anoki Akim

ABU Musa kobunite kiton moru Koreb amoete anya kanuka amerekekin ke. Kane abu koany ekiot enoki komam idopori!

Ejai Musa nenokia ekiot akim

Kobuonokin Musa: ‘Erai yen ibore yenikaumokin. Ekunyakini kosep ke kasodi aanyun ejok.’ Ne eswamauna ngun, kolom eporoto kokiot, ebala ebe: ‘Sirikuuny nee. Kolaca akonimuka kakejenekon, naarai aibosit naibwoia erai akwap nakalaunan.’ Arai Edeke enera kitosomai emalaika, aso kibwa do Musa ekeret.

Kosodi Edeke atemar: ‘Aany cut aiticanio naka ikatunga iuejaas Misiri. Alosi eong ayuun kes ido ijo ngesi ejukari eong aitolomuun ikatunga ko Misiri.’ Alosi Yawe ayangaun iketunga akwap naibus nako Kanaan.

Konye kotema Musa ebe: ‘Mam eong arai idiobore. Epone bo ani apedora eong aiswamaun nuu? Konye arai kalot eong, engisete Isiraelin eong ebe: “Ingai bo ijukunit ijo?” Katemari kes biai?’

Kobongok Edeke: ‘Nu ngesi ilimokin kesi. YAWE Edeke loka Aburaam, Edeke loka Isaak, Edeke loka Yakob da ngesi keyakunit mamakus.’ Kiyatak Yawe ebe: ‘Ngol nges ekakiror ikar kere.’

Kobongok Musa ebe: ‘Dobodo engeroto akiirar eong akaulo na eong alimokin kes ebe ijo nges kiyakunit.’

Kotema Edeke atiar: ‘Inyo bo ngin ejai akanikon?’

Kobongik Musa ebe: “Ebela.”

Kotema Edeke: “Kocakak kwap.” Kiswama Musa ngun, koluor ebela emun. Kitodiik Yawe bobo Musa aceumokinet. Kobala ngesi ebe: ‘Kitolomik akonikan ogoekon.’ Kiswama Musa ngun, ido ne alemuna ekekan kinga, akwang bala akako! Asubit akan bala ajaatar adeka naronon na enyaritai atapon. Etupakini abu Yawe koinak Musa apedor aswamaun aumokinet nauniet. Kirikakini do kobala ebe: ‘Iswama ijo aumonokineta nuu, iiyunete do Isiraelin ebe ejukunit eong ijo.’

Akaulo kangun, kobongo Musa ore ido kilip Yetero ebe: ‘Kengaingait, kisiikinai kalot kabongo mama ejaas ikainacan luejaasi Misiri, kaany epone lo ejaatar kesi.’ Kotema Yetero Musa atiar, kolot, kainapakin, ido kogeu Musa akelosit abongor Misiri.

Anyoun 3:1-22, 4:1-20.



Angiseta

  • Ingai bo ekiror emoru kalo ejai toma aputo?
  • Itetem ibore yen etegelikina yen abu Musa koay elot ngesi acok amerekekin omoru ngol?
  • Anyoika abu eporoto kolim kotoma okiot lo anoki, ido lo angai eporoto ngol?
  • Epone ani abu Musa kobongokina elimoki Edeke ngesi ebe ingarenikini ngesi itunga luka Edeke anyoun ko Misiri?
  • Anyoika abu Edeke kolimok Musa alimum aarai kingita ngesi itunga ebe ingai bo ejukanit ijo?
  • Epone ani ti apedoria Musa aitodun ebe ejukanit Edeke ngesi?

Angiseta nuiyatakina

  • Kosiom Anyoun 3:1-22.

    Epone ani ijaikinitor oni aitejenaret naka Musa amuno ebe karaida iwomit oni bala mam ipedori aitodolikin aswam na ijaikinit Edeke oni, epedori Yawe aingarakin oni? (Any. 3:11, 13; 2 Kor. 3:5, 6)

  • Kosiom Anyoun 4:1-20.

    Anyoin ajulakinet kotoma aomisio nuka Musa na obu otakanu akaulo na ikar 40 lu ajaar nges Midian, ido anyoin asisianakinet na isisiaunete ngul luekotosi aitosomao kotoma atukot? (Any. 2:11, 12; 4:10, 13; Mika 6:8; 1 Tim. 3:1, 6, 10)

    Karaida kilecor oni kotoma atukot naka Yawe, amuno anyoin ijaikini oni aanyunet naka Musa? (Any. 4:12-14; Sab. 103:14; Bur. 12:4-11)