Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Eitaboka Loka Akiro Nuitetemit Ebaibuli

Aitetemet 29: Kanukinyo Akeria Musa

Aitetemet 29: Kanukinyo Akeria Musa

KOANY Musa ekeri anyoun ko Misiri. Ipedori ijo aanyun itunga lu erukiitotor nges? Ijeni ijo kanukinyo ekototor kes aiyar Musa? Kaanyutu arai ipedori oni ajenun.

Ekeri Musa ainyekin Misiri

Abu Musa kopolou kotogo loka Parao, epugan loko Misiri. Abu koraun etunganan lo acoo ido lo apol da noi. Ajeni Musa ebe mam ngesi arai lo Omisiri, konye ikeruriak araasi ibulesin lu Isirael.

Adiopepepaaran, ne araar Musa lo ikar 40 lukapolou, abu koseu alosit aanyun epone lo ajaatar iketunga. Arono epone lo ayaitere kesi. Abu ngesi koany etunganan lo Misiri ibungai ebulesit lo Isirael. Kirere Musa asiep, keanyu nges ebe amamei yeni etei, kinom etunganan lo Misiri, kotwana etunganan lo. Kosodi Musa aidaikin akekuan toma asinge.

Kapaaran natupakini, kolot Musa aanyun iketunga bobo. Aomit ngesi ebe ti ingaraki kesi tetere mam bobo kesi eraasi ibulesin. Konye abu ngesi koany itunga iarei lu araasi Israelin ejiosi, kosodi Musa alimokin lo adiakarit ebe: ‘Kanukinyo ibungaa ijo anacekon?’

Kobala etunganan ebe: ‘Ingai etarauni ijo ekosi pugan ka atubon? Ilosi ijo aiyar eong da kwape iyaria ijo etunganan lo Misiri je?’

Kokurianar Musa kwana. Abu ngesi kojenik ebe ajenutu itunga nu abu ngesi kiswamaik etunganan lo Misiri. Parao da abu kopup ido ejukunit itunga aiyar Musa. Ngun kes akeria Musa anyoun ko Misiri.

Kenyou Musa ko Misiri, abu kolot ne alwana kiton akwap nako Midian. Kangina, kiriamunos kede ekale loka Yetero, kosodi aimany adiopet kadwe ke nanyairitai Sipora. Korau Musa ecokon ido idar amerekekin nuka Yetero. Kiboi kakwap naka Midian adaun ikar 40. Orai do ngesi kwana lo ikar 80 lukapolou. Kosodi kadiopepaaran, icokiei ngesi amerekekin nuka Yetero, otakan ibore yenikaumokin noi yen abu kijulak aijar naka Musa kere. Kopuko apapula naetupakin ido kaanyutu inyoin bo ibore yen kaumokin.

Anyoun 2:11-25; Aswamisio 7:22-29.



Angiseta

  • Aibo apoloikini Musa, ido inyo ajeni ngesi nuikamunitos ikeuriak?
  • Inyo abu Musa iswama ne araar nges lo ikar 40 lukapolou?
  • Anyoika abu Musa kolimok etunganan lo arai Isiraelit lo ajio, ido abongokinet ani abu etunganan koinak?
  • Kanukinyo akeria Musa anyoun ko Misiri?
  • Aibo abu Musa oker, ido ingai bo abu ngesi kiriamonutor Kangina?
  • Inyo abu Musa kiswama kotoma okar 40 akaulo na ngesi akerit anyoun ko Misiri?

Angiseta nuiyatakina

  • Kosiom Anyoun 2:11-25.

    Karaida isisianakitai Musa adaun ikar luipu kotoma acoa nako Misiri, epone ani etoduna Musa akeinakina nejai Yawe? (Any. 2:11, 12; Bur. 11:24)

  • Kosiom Aswamisio 7:22-29.

    Aisisianakinet anyoin ipedori oni aisisiaun kopone lo atamitor Musa alakun idwe luka Isirael kobulesene loka Misiri ngesi elopet? (Asw. 7:23-25; 1 Pet. 5:6, 10)