Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Eitaboka Loka Akiro Nuitetemit Ebaibuli

Aitetemet 26: Arai Yob Lo Amuno Edeke

Aitetemet 26: Arai Yob Lo Amuno Edeke

ITIMIT kereka ijo etunganan lo edeka lo? Ekekiror nges Yob, ido aberu ngin erai akeberu. Ijeni ijo nu inera ngesi alimokin Yob? ‘Ikene Edeke, kotwana.’ Kaanyu ber oni kanukinyo enerar nges ibore kwanat angin ido kanukinyo etorio Yob aiticanitoi na apol noi.

Yob keda aikolikolite

Arai Yob etunganan lomunot lo arimarit Yawe. Keboie ngesi kakwap naka Us, namam alwanikina ko Kanaan. Amina Yawe Yob noi, konye ajai lo angara ngesi. Ijeni ijo ingai?

Arai Satan Ejodijodon. Kiitu, Satan nges emalaika lo aronon lo engara Yawe. Abu ngesi opedo ainakin Adam ka Keba aipalikin Yawe, ido aomit ngesi ebe epedori ngesi aijaikin nginitunganan kere aipalikin Yawe. Konye obu ngesi kereka opedo? Mam. Koomoom nuikamunitos ikiliok ka angor luipu lu idau oni aisisiaun nukec. Idi kakes ipedori ijo aiitin ikiroria kec?

Akaulo na Yakob ka Yosep atwanikin Misiri, Yob ngesi cut etunganan lo amunokina Yawe kotoma akwap kere. Akoto Yawe ainakin Satan ajenun ebe mam ngesi epedori ainakin nginitunganan kere aroniar, aso abu kotema atiar: ‘Koany Yob. Kosesen epone lo amunor ngesi eong.’

Kopegak Satan, ‘Erai ngesi lokimuno ijo naraai isirerengit ijo ngesi ido ejaatar ngesi ka iboro luipu. Konye ilema ijo iboro lu awai, ikeni ngesi ijo.’

Kobala Yawe ebe: ‘Aso kolot, kolema kes. Iswama iboro kere lueroko luikoto ijo aiswamaikin Yob. Iwanyuni oni arai ikeni ngesi eong. Konye kocoite bon ebe mam ijo iyari ngesi.’

Nasodit, koinak Satan itunga akokwar akituk ka akaalai nuka Yob, ido koarai da akemerekekin. Kosodi do ngesi aaraar idwe 10 lusap ka lupesur kotoma otapipiro. Etupakini kinom Satan Yob kede adek naetiono noi. Kodum Yob aiticanet ka apipilu naepol noi. Ngun nesi alimokina aberu naka Yob ngesi: ‘Kiken Edeke ido kotwana!’ Konye mam Yob apedori aswam ngun. Boboda opotu ipaperoke iuni lukaisab kosodete alimokin ngesi ebe aroko aswamisio nuka aijar ke. Konye kopaik Yob emunokina Edeke.

Abu na ijaik Yawe aiyalamikin noi, ido akaulo ke abu kisirereng Yob noi, kwape ipedoria ijo aanyun kotoma aputo kana. Abu kitangaleu nges kotoma adeka ke. Abu Yob kouru bobo idwe 10 luepusiak noi, ido kodum akituk, amerekekin, ka akaalai irwan aarei adepar sek nu ajaatar ngesi.

Iraun ijo loduc imuno Yawe kwape Yob? Arai iraun ijo isirerengi Edeke ijo da. Ipedori ijo aijar ikar lumam edaunos ne eraunor akwap kere na ibus kwape emanikor loka Eden.

Yob 1:1-22, 2:1-13, 42:10-17.

Yob ka ekale ke


Angiseta

  • Ingai bo Yob?
  • Inyo abu Satan otam aswam, ido abu kereka nges kopedo?
  • Inyo abu Yawe kacamak Satan aswam, ido kanukinyo?
  • Kanukinyo alimokina Yob akeberu ebe ‘iken Edeke ido otwana’? (Koay aputo.)
  • Kwape iteo ijo kotoma aputo nakiaret, epone ani abu Yawe kisirerengio Yob, ido kanukinyo?
  • Anyoika arerengusio nu idumuni oni arai imunokin Yawe kwape ka Yob?

Angiseta nuiyatakina

  • Kosiom Yob 1:1-22.

    Epone ani lolo eputorotor Ikristayon kwape ka Yob? (Yob 1:1; Pil. 2:15; 2 Pet. 3:14)

  • Kosiom Yob 2:1-13.

    Ani irotin iarei luabu Yob kitengelikinor kede akeberu kopone lo abongokinatar kesi areio naka Satan? (Yob 2:9, 10; Awa. 19:3; Mika 7:7; Mal. 3:14)

  • Kosiom Yob 42:10-17.

    Anyoin aputokina na ejai kiding na areregusio nu abu Yob ka Yesu kodumutu kanu aitup erot lo amunokina? (Yob 42:12; Pil. 2:9-11)

    Epone ani isinyikokinotor oni arerengusio nu abu Yob kodum kanu aidar akebeit nejaai Edeke? (Yob 42:10, 12; Bur. 6:10; Yak. 1:2-4, 12; 5:11)