Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Eitaboka Loka Akiro Nuitetemit Ebaibuli

Aitetemet 22: Kopikakinai Yosep Toma Aidaris

Aitetemet 22: Kopikakinai Yosep Toma Aidaris

ERAI Yosep lo ikar 17 bon eyangaro nges Misiri. Kangina aponi kitwegelikinai nges nejaai etungan lo anyaritai Potipar. Eswamaenenei Potipar kanuka ekabaka loka Misiri, lo anyaritai Parao.

Yosep ejaitoma aidaris

Kiswamaenenei Yosep noi kanuka ejakait ke Potipar. Kepolou Yosep, kitarau Potipar ngesi lo apoloikinit etogoke, kiting lukajaas kanges kere. Kanukinyo do, ejaar Yosep ne toma aidaris? Erai kanuka aberu naka Potipar.

Kopolou Yosep araun etunganan lo ebus noi ido akoto aberu naka Potipar ngesi apero kede ngesi. Konye ajeni Yosep ebe arono aswam kwangin, ido mam ngesi abuni aswam ngun. Konyunyurikin aberu naka Potipar noi. Kebongu okilenike ore, kingala ngesi kobala ebe: ‘Yosep ngol lo aronon, abu otamite apero ka eong!’ Kiyuu Potipar akeberu ido konyunyurik noi Yosep. Koyanga nges, kibwaik aidaris.

Katipet, koany ekapolon loka aidaris ebe erai Yosep etunganan lo ajok. Kititing nges ienan kere lukejaas aidaris. Kokau konyunyurik Parao ekawokon ke ka ekepoon kosodi aibwakin kesi aidaris. Kakuare adiopet kirujaata luarei, nginitunganan akerujasit, konye komam ejenete apolou na airunjasia kec. Kaparaan natupakini, kobala Yosep atiar: ‘Kolimokinai akusirujasia.’ Ne keswamatar ngun, kitetemik Yosep kes apolou na arujasia kec kitosomai aingarakinio naka Edeke.

Ne ejai ekawokon, kobala Yosep ebe: ‘Akaulo na apaarasia auni itonyonunio ijo kaidaris, ido iraun ijo ekawokon loka Parao bobo.’ Kiyatak bobo Yosep ebe: ‘Kilom ijo, kolimok Parao nuekamunitos eong ido kingarak eong alomun kaibois kana.’ Konye ne ejaai ekepoon, kobala Yosep ebe: ‘Akaulo na apaarasia auni, kicorakini Parao akonikou atuborio.’

Akaulo na apaarasia auni, kiwamaunos kwape eneritor Yosep. Koinak Parao akou naka ekepoon atuborio. Ekawokon ada aponi kolemunai kotoma aidaris, kijaanak ekabaka bobo. Kimurok ekawokon Yosep cut! Mam abu kolimok Parao nuekamunitos nges, aso ajai do Yosep asalakin kotoma aidaris.

Ageun 39:1-23; 40:1-23.



Angiseta

  • Arai Yosep lo ikar idi lukapolou eyangaro Misiri, ido inyo abu kotakanu kedol ngesi ngina?
  • Epone bo ani adoluna Yosep aidaris?
  • Aswam naapol ani na aponi kijaikinai Yosep kotoma aidaris?
  • Kotoma aidaris, inyo abu Yosep kiswamaik ekawokon ka ekepoon?
  • Inyo abu iswamaun akaulo na alacakin ekawokon aidaris?

Angiseta nuiyatakina

  • Kosiom Ageun 39:1-23.

    Kwape amameor ekisil loewadikatai kama ejai Edeke aitoron adoteu kapaarasia nuka Yosep, inyo etogogongi ngesi akerit awai kanejai aberu naka Potipar? (Age. 2:24; 20:3; 39:9)

  • Kosiom Ageun 40:1-23.

    Kaurianut kitetem airujasit naka ekawokon kede apolou nabu Yawe koinak Yosep. (Age. 40:9-13)

    Anyoin airujasit na ajaatar ekepoon, ido inyo apolou ke? (Age. 40:16-19)

    Epone ani etuparitor ebulesit lomunot ido opiriana epone lo ajaatar Yosep? (Age. 40:8; Sab. 36:9; Yok. 17:17; Asw. 17:2, 3)

    Epone ani itacaunitor Ageun 40:20 epone lo iteotor Ikristayon asuban nuka aurio? (Lim. 7:1; Mk. 6:21-28)