Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Eitaboka Loka Akiro Nuitetemit Ebaibuli

Aitetemet 19: Ejataar Yakob Ekale Lo Epol

Aitetemet 19: Ejataar Yakob Ekale Lo Epol
Yakob ka iduwe ke

KOSESEN ber ekale lo epol loo. Lu kes isap 12 luka Yakob. Ajaatar nges apesur da. Ijeni ijo ikiroria lu idio kodwe kangul? Esisiautu ice kakesi.

Kouri Lea Reuben, Simeon, Lebi ka Yuda. Eanyu Rakel ebe emameotor nges idwe, konyunyurikin noi. Aso abu koinak abulesit ke Bilika nejaai Yakob, kouri Bilika Dan ka Naputali. Kosodi Lea da ainakin abulesit ke Silupa nejaai Yakob, kouri Silupa Gad ka Aser. Kouri do bobo Lea isap iarei Isakar ka Sebulun.

Kawasia abu Rakel da kodum ikoku. Komaik ekekiror Yosep. Ibuni oni aisisiaun kokau nuipu nuikamunitos Yosep naraai abu koraun etunganan loapol noi. Lu kes isap 11 luaponi kourikinai Yakob neboyo nges ka Laban papa loka Rakel.

Ajaatar Yakob ka apesur da, konye ijaaikinit Ebaibuli oni ekiror lo adiopet kakes. Ekekiror nges Dina.

Kodolu apak na aseuna Yakob anyoun ajalakin Laban kosodi abongor Kanaan. Aso abu kotukok nepepe ekaleke loapol, ka amerekekin ka akituk kosodi ageun akelosit naeoja.

Akaulo na Yakob ka ekekale aiboikin Kanaan apak naedit, Kouru Rakel esapat ece. Atakanunete nu eringa kesi elosete. Korieb Rakel aidoun naationo noi ido kotwana nepe idouni. Konye angalei isapat. Komaik Yakob nges ekiror Benyamin.

Ikoto oni aitun ikiroria luka isap 12 luka Yakob naaraai ateker naka Isirael kere elomunit kotoma kec. Ido da atekerin 12 nuka Isirael emaitai kotoma osap 10 luka Yakob ka isap iarei luka Yosep. Iboit Isaak ikar luipu akaulo na aurunere isap lu ido ibusakinit ngesi iyalama noi adumun itatai luipu. Konye aanyutu ber nu apotu otakanikisi atataitike Dina.

Ageun 29:32-35; 30:1-26; 35:16-19; 37:35.



Angiseta

  • Ijeni ikiroria isap ikanyikape lu abu Yakob kodum kede Lea aberu ke nasodit?
  • Luangai isap iarei luabu Silupa abulesit naka Lea kourik Yakob?
  • Ijeni ikiroria luka isap iarei luabu Bilika abulesit naka Rakel kourik Yakob?
  • Luangai isap iarei lu abu Rakel kouru ido inyo abu kotakanit nges ne edounia nges esapat lokiaret?
  • Kotoma aputo, isap idi ajaatar Yakob, ido inyo abu kolom kotoma kec?

Angiseta nuiyatakina

  • Kosiom Ageun 29:32-35; 30:1-26; ka 35:16-19.

    Kwape kitodiaritere kotoma osap 12 luka Yakob, epone ani amanakinere isap luka Iburanian ikiroria kolosek?

  • Kosiom Ageun 37:35.

    Karaida erai Dina bon elimoritai kotoma Obaibuli epone ani ijenuna oni ebe ajaatar Yakob apesur nuepu adepar adiopet? (Age. 37:34, 35)