Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Eitaboka Loka Akiro Nuitetemit Ebaibuli

Aitetemet 18: Kolot Yakob Karan

Aitetemet 18: Kolot Yakob Karan

IJENI ijo itunga lu ineratar Yakob? Akaulo na alosit apaarasia nuipu, abu Yakob kiriamunos kakes katan. Ecokiete kes amerekekin kec. Kingit Yakob kesi atiar: ‘Aibo ibunitotor yesi?’

Kotemasi: ‘Karan.’

Kingit Yakob kesi: ‘Ijenete Laban?’

Kobongokis: ‘Eebo, kijeni. Ido koany ebunit akoke Rakel nepepe kamerekekin ke.’ Ipedori ijo aanyun Rakel ebuni kangina elwana?

Eriamunos Yakob kada Rakel

Nakeanyunia Yakob Rakel nepepe ka amerekekini nuka Laban mamaike, kolot kikokoro amoru awai kaituk naka atan, tetere amelekekin epedorete aimat akipi. Kosodi Yakob ainu Rakel ka aitejenar ingai bo nges. Kolakar Rakel ido koker ore, kolimok Laban papake.

Eyalama Laban aiboi nepepe ka Yakob. Nengisia Yakob aimany Rakel, itojok Laban ngun. Konye abu kingit Yakob aswam adaun ikar ikanykaarei kanuka Rakel. Kiswama Yakob nu, naraai amina Rakel noi. Konye ne adoluna apak na emanyit, ijeni ijo nu apotu iswamaunos?

Abu Laban koinak Lea akokuke napolon aboisit naka Rakel. Ecamu bobo Yakob aijaanakin Laban ikar ice ikanyaarei, abu do Laban koinak nges Rakel da kwape akeberu. Kapaaarasia kangun, acamakinit Edeke itunga aimany angor nuipu. Konye kwana, kwape itodunitor Ebaibuli, ibusakinit etunganan aimany aberu adiopet bon.

Ageun 29:1-30.



Angiseta

  • Ingai aberu naitemelel kotoma aputo, ido inyo abu Yakob kiswama kanukeng?
  • Inyoin akapakina Yakob aswam kanu aimany Rakel?
  • Inyo abu Laban kiswama ne adoluna apak Yakob adukokin ka Rakel?
  • Inyo abu Yakob kocam aswam kanu adumum Rakel kwape akeberu?

Angiseta nuiyatakina

  • Kosiom Ageun 29:1-30.

    Karaida abu Laban kingalak nges, epone ani etoduna Yakob ebe arai nges lo ayongong ido anyoika nuisisiauni oni kane? (Age. 25:27; 29:26-28; Mat. 5:37)

    Epone ani itodunitor aanyunet naka Yakob atiaketait kiding amina obe kede amina namam esipo? (Age. 29:18, 20, 30; Eko. 8:6)

    Angor aongon anu nu opotu koraunos atutubet naka ekale loka Yakob ka aurikin nges isap? (Age. 29:23, 24, 28, 29)