Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Eitaboka Loka Akiro Nuitetemit Ebaibuli

Aitetemet 17: Imuatok Lu Agitakina

Aitetemet 17: Imuatok Lu Agitakina
Esau

ISAPA iarei lu egitakina cut, mam kereka? Ijeni ijo ikiroria kec? Amejan erai Esau, ido esapat lo idari amerekekin nges Yakob.

Esau ka Yakob kes imuwatok luka Isaak ka Rebeka. Isaak, papakec amina Esau noi naraai arai nges amejan lo ajok ido ayaununei inyamat ore kanu ekale ainyam. Konye Rebeka amina Yakob noi naraai arai ngesi esapat lo apatana ido inapakina.

Aroko Aburaam papaakec ejari, ido ipedori oni asimaar epone lo aminar, Yakob apupokinit nges inera nuikamunitos Yawe. Kotwana do Aburaam akaulo na ikar 175 luamojong, koraasi imuatok lu ikar 15 lukapolou.

Kedol Esau ikar 40 lukapolou, komany angor aerei nuka akwap naka Kanaan. Kitakadik na Isaak ka Rebeka noi naraai mam angor nu amaete Yawe.

Kosodi kaparaan adiopet, kiswamaun icebore yen abu koinak Esau anyunyurikin ka onaceke Yakob. Kodolu apak na abeitor Isaak ainakin arereng najaai okokuke lo apolon. Kwape apolor Esau adepar Yakob, aomit Esau ti adumun arereng. Konye adaunit Esau sek agwelar apedor na adumun arereng nejaai Yakob. Bobo da ne edounere isapa lu iarei enerit Edeke ebe Yakob nges edumuni arereng. ldo nu kes apotu iswamaunos. Koinak Isaak arereng nejaai Yakob.

Yakob

Kisisiau Esau nuekamunitos nu kokau, abu konyunyurik Yakob noi. Apol anyunyurake noi kiton nges alimun ebe alosi aiyar Yakob. Kepupu Rebeka nu, kiyolongong noi. Kolimok okilenike Isaak: ‘Eraun na erono noi arai emany Yakob da aberu kakwap naka Kanaan.’

Konyarau Isaak okokuke Yakob kolimok ebe: ‘Sirikimany aberu kotoma apesur nuko Kanaan. Konye, kolot togo loka Betuel papaakon loejai Karan. Komany kangina aberu, adiopet kapesur nuka Laban okokuke.’

Kopupok Yakob papake, katipet kogeu alosit ke naoja kiton Karan ne eboioto lukokaleke.

Ageun 25:5-11, 20-34; 26:34, 35; 27:1-46; 28:1-5; Iburanian 12:16, 17.



Angiseta

  • Lubo angai Esau ka Yakob ido epone ani agitakinatar kes?
  • Araasi Esau ka Yakob lu ikar idi lukapolon etwani papaakec Aburaam?
  • Inyo abu Esau iswama yeni abu kitakadik totoke ka papake noi?
  • Kanukinyo anyunyurikina Esau onaceke Yakob?
  • Anyoin aicorakinet na abu Isaak koinak Yakob okokuke?

Angiseta nuiyatakina

  • Kosiom Ageun 25:5-11, 20-34.

    Inyo abu Yawe kodwarite nuekamunito isap iarei luka Rebeka? (Age. 25:23)

    Atiaketait anyoin ajai kiding epone lo asesenatar Yakob ka Esau apedor na airumun? (Age. 25:31-34)

  • Kosiom Ageun 26:34, 35; 27:1-46; ka 28:1-5.

    Epone ani atakana cut kanejai Esau amamus apodokinit iboro luka emoyo? (Age. 26:34, 35; 27:46)

    Kanu Yakob adumum aisirerengio naka Edeke, inyo abu Isaak kolimok Yakob aswam? (Age. 28:1-4)

  • Kosiom Iburanian 12:16, 17.

    Anyoika nu itodunit aanyunet naka Esau kwape nuepote adoikin ngul lumam epodokinitos iboro lukalaunak?