Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Eitaboka Loka Akiro Nuitetemit Ebaibuli

Aitetemet 16: Kodum Isaak Aberu Naajok

Aitetemet 16: Kodum Isaak Aberu Naajok

IJENI ijo ingai bo aberu na ejaai aputo na? Ekekiror nges Rebeka. Ido etunganan lo ejai nges airiamunor kede nges Isaak. Elosi nges araun akeberu. Epone bo ani atakanunatar nuu?

Aso, Aburaam papake Isaak akoto adumakin okokuke aberu naajok. Mam nges akoto Isaak aimany adiopet kotoma angor nuka Kanaan, naraai itunga lu, amaete idekesio luaisab. Abu Aburaam konyarau ebulesit ke kotema atiar: ‘Akoto eong ijo abongor ne iboyotor iinacanaka Karan, kodumak okokuka Isaak aberu.’

Katipet koyanga ebulesit loka Aburaam akaalai atomon, kosodi ageun alosit naeoja noi. Keyapio ngesi abosit na eboyoto iinacan luka Aburaam, abu kopaik atan. Arai esawa lo ajosio akolong, apak naeponiata aŋor aiwok akipi. Kilip ebulesit loka Aburaam nejaai Yawe ebe: ‘Koraun apese na eokokini eong ka akalaai akipi na iseikinit ijo araun aberu naka Isaak.’

Eriamunos Rebeka kada Isaak

Katipet kodolu Rebeka aiwok akipi. Ne engisia ebulesit nges akipi aimat, kowokok. Kosodi awokun akipi nu adolete akalaai kere nu ajakit akure. Aarai ngin aswam napol noi naraai akalaai emasete akipi nuipu noi noi.

Ne adauna Rebeka aswam nu, kingit ebulesit loka Aburaam nges ekiror loka papake. Kingit bobo araai epedori nges apero obukec. Kobongok: ‘Ekiror apapaka nges Betuel ido ijaa da kaneperot.’ Kojenik ebulesit loka Aburaam ebe Betuel araai okoku loka onaceke Aburaam Nakor. Kokukokin kwap, kimala Yawe kanu aingarenikin nges kiton onacan luka Aburaam.

Kakware kangin, kolimok ebulesit loka Aburaam Betuel ka onaceke Rebeka, Laban nu ayaunitos ngesi. Kocamanaros kere ebe euparos Rebeka kanges kanu adukokin ka Isaak. Anyoika abu Rebeka kolim ne engisere nges? Kotema; ‘Eebo,’ acamunit eong alosit. Apaaran natupakin, kibwanenoto akalaai, kogeutu alosit naeoja noi abongor Kanaan.

Esawa lo adolunatar, araai ebong. Koany Rebeka etunganan esakasakai omanikor. Arai lo Isaak. Eyalama nges aanyun Rebeka. Sara totoke adaunit atwanare ikar iuni kau ido aroko ngesi enguriani. Konye kwana, kominu Isaak Rebeka noi, ido iyalamikin bobo.

Ageun 24:1-67.



Angiseta

  • Ingai bo etunganan ka aberu lu ejaasi toma aputo?
  • Inyo abu Aburaam iswama kanu adumakin okooke aberu ido kanukinyo?
  • Epone ani abongokinere ailip naka ebulesit loka Aburaam?
  • Abongokinet anyoin abu Rebeka koinak ne engisere ngesi aarai ekoto adukokin ka Isaak?
  • Inyo abu koinak Isaak aiyalamikin bobo?

Angiseta nuiyatakina

  • Kosiom Ageun 24:1-67.

    Inyoika iponesio luajokak lu abu Rebeka itodu ne eriamunotor ka ebulesit loka Aburaam atan? (Age. 24:17-20; Awa. 31:17, 31)

    Aitemonokineta nuka Aburaam kanuka Isaak ijaaikinit Ikristayon luka lolo aanyunet najokak anyoin? (Age. 24:37, 38; 1 Kor. 7:39; 2 Kor. 6:14)

    Kanukinyo ibusakinitor oni adumun apak aomoom, kwape eswama Isaak? (Age. 24:63; Sab. 77:12; Pil. 4:8)