Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Eitaboka Loka Akiro Nuitetemit Ebaibuli

Aitetemet 15: Kireik Aberu Lot Kau

Aitetemet 15: Kireik Aberu Lot Kau

IBOITOS Lot ka ekaleke nepepe ka Aburaam kotoma akwap naka Kanaan. Adiopepaarana kotema Aburaam Lot ebe: ‘Adidingar ne kanu ibaren wok. Kengaingait katiakakinos. Arai kilot epiai je, eong da alosi epiai lo.’

Kiteluo Lot akekonye airere akwap. Abu koany apuuton nuka akwap nu ajaas akipi ka anya kanuka ibaren ke. Araas nu Apuuton nuka Yorudan. Abu Lot kisibwot ekaleke ka ibaren ke ngina. Kosipok erekec ore loka Sodom.

Aroko itunga luko Sodom. Kitakadikis nu Lot noi naarai arai ngesi etunganan lo ajokuna. Edeke da mam eyalama. Kosodi do Edeke aijukun imalaikan iarei aikwenyar Lot ebe elosi ngesi amudiar Sodom ka ere lo Gomora loayapiei kanuka aronis kec.

Kolimokis imalaikan Lot ebe: ‘Kisunyak! Koyanga aberu kon ka adwe kon aarei ido konyoutu kane katipet!’ Eyapi Lot ka ekaleke anyoun, aso kitinga aimalaikan kesi kakanin kosodete eyangar kinga naka ere. Kobala ediopet ko malaikan ebe: ‘Kokerata kanuka aijar kus! Siri kingolia kau. Kokerata korongan, tetere man itwakete.’

Korima Lot ka adweke, ido kokerata anyoun ko Sodom. Mam apotu kopaikis ediodakika ido mam apotu kirekis kau. Konye kipaliik aberu naka Lot. Akaulo na kesi anyoun alosit ko Sodom, abu kopaik kosodi airekin kau. Kosodi do Aberu naka Lot aluor epir loka abalang. Ipedori ijo aanyun ngesi kotoma aputo kana?

Ipedori oni aisisiaun nu ejokak kane. Etodunit ebe eyuuni Edeke ngul lu erimaritos ngesi, konye ngul lumam erimaritos ngesi, etwakiarete aijar kec.

Ageun 13:5-13; 18:20-33; 19:1-29; Luka 17:28-32; 2 Petero 2:6-8.

Lot ekeri anyoun ko Sodom


Angiseta

  • Kanukinyo atiakakinotor Aburaam ka Lot?
  • Kanukinyo aseuna Lot aiboi ko Sodom?
  • Ekote bo itunga luko Sodom ai?
  • Aikwenyaret anyoin apotu imalaikan iarei koinakisi Lot?
  • Kanukinyo araunor aberu naka Lot epir loka amunyu?
  • Anyoika nu isisiauni oni kakiro nuikamunitos aberu naka Lot?

Angiseta nuiyatakina

  • Kosiom Ageun 13:5-13.

    Kanu aitemonokin atiokisio koding naka itunga idiope diope, anyoika isisiauni oni kanejai Aburaam? (Age. 13:8, 9; Rom. 12:10; Pil. 2:3, 4)

  • Kosiom Ageun 18:20-33.

    Epone ani ijaikina oni aiswamanara naka Yawe ka Aburaam amun ebe, epote Yawe ka Yesu aitub etube kadolit? (Age. 18:25, 26; Mat. 25:31-33)

  • Kosiom Ageun 19:1-29.

    Anyoika nu itodunit Ebaibuli kopone lo esesena Edeke iketepak ikiliok? (Age. 19:5, 13, Leb. 20:13)

    Anyoin atiaketait na idumuni oni kopone lo apupokina Lot ka Aburaam aitetenio naka Edeke, ido anyoika nu isisiauni oni kotoma anu? (Age. 19:15, 16, 19, 20; 22:3)

  • Kosiom Luka 17:28-32.

    Enyoin ajautenete loka otau lo ajaatar aberu naka Lot toma oboro luka akwap, ido epone ani eraar na aikwenyaret ne ijaai oni? (Luka 12:15; 17:31, 32; Mat. 6:19-21, 25)

  • Kosiom 2 Petero 2:6-8.

    Kanu aputoor ka Lot, epone ani ibusakinitor oni asesen itunga lumam eyongitos Edeke lu elukakinitos oni? (Esk. 9:4; 1 Yok. 2:15-17)