Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Eitaboka Loka Akiro Nuitetemit Ebaibuli

Aitetemet 14: Kitem Edeke Aiyuun Naka Aburaam

Aitetemet 14: Kitem Edeke Aiyuun Naka Aburaam

IPEDORI ijo aanyun nu iswamai Aburaam kane? Ejataar nges ekileng, ido etakani bala elosi ngesi aiyar okokuke. Kanukinyo ti iswamauna nges kwangin? Nasodit, kaanyutu ber epone lo adumunatar Aburaam ka Sara okoku kec.

Aburaam einakini Isaak kwape ainakinete

Kiito ber ebe, esumunikit Edeke kes ebe edumunete esapat. Konye asubit ibore ngin bala mam apedor naraai akokosanito Aburaam ka Sara noi. Konye eyuunit Aburaam ebe epedori Edeke aswam nuesubito bala mam epedoros. Aso inyo abu iswamaun?

Akaulo na Edeke aisumuun aisumunet ke,abu ekaru ediopet kotubor. Kosodi ne araar Aburaam lo ikar 100 ido Sara na ikar 90 lukamojong, kodumutu ikoku isapat lo anyaritai Isaak. Kidar Edeke aisumunet ke!

Konye kepoloor Isaak, kitem Yawe aiyuun naka Aburaam. Kiworou: ‘Aburaam!’ Kosodi Aburaam abongokin: ‘Eong lo!’ Kosodi Edeke atemar: ‘Koyanga ikokukon, ikonikoku iteluna, Isaak, kolot omoru lo etodikini ijo. Kangina, koara ikokukon ido oinak kwape ainakinet.’

Kitakadisi akiro ngun Aburaam naraai amin Aburaam ikokuke noi. Ido kiitu ebe, esumunit Edeke idwe luka Aburaam kes epote aiboi kotoma akwap naka Kanaan. Konye epone bo ani epedorotor ngun araai etwana Isaak? Mam Aburaam amisikinit, konye abu korimaa Edeke.

Ne odolio moru, abu Aburaam kowen Isaak ka aidokokin nges kuju naka etem lo adukunit ngesi. Kosodi alemun ekileng ayaria okokuke. Konye napa eringa kiswamauna ngun, kiworo emalaika loka Edeke: ‘Aburaam; Aburaam!’ Ido kobongok Aburaam: ‘Eong lo!’

Kotema Edeke: ‘Siri imusung esapat karaida aiswamakin nges idiobore. Kwana ajeni ebe kiyuunit eong, naraai mam iimikit ikokukon, ikonikoku iteluna.’

Aiyuun bo ani ngin napol kwangin na ajaatar Aburaam nejaai Edeke! Eyunit ebe, emamei ibore ikaruni Yawe ido da apedori Yawe aitajarun Isaak kokatwak. Konye mam araai akote naka Edeke ti Aburaam aiyar Isaak. Aso abu Edeke kijaik emerekek aikamuna amoni nayapiei; ido kolimok Aburaam ainakin nges araut ainakinet aboisit na okokuke.

Ageun 21:1-7; 22:1-18.



Angiseta

  • Aisumunet anyoin abu Edeke koinak Aburaam ido epone ani abu Edeke idaria aisumunet ke?
  • Kwape itodunitere kotoma aputo, epone ani etemia Edeke aiyuun naka Aburaam?
  • Inyo abu Aburaam kiswama karaida mam nges emisikinit apolou na acorakinet naka Edeke?
  • Inyo abu kotakan ne alemuna Aburaam ekileng ti ayaria okokuke?
  • Atia bo ai agogong naka aiyuun na ajaatar Aburaam ne ejai Edeke?
  • Inyoin do abu Edeke koinak Aburaam ajaaikin kwape ainakinet naicweio, ido opone ani?

Angiseta nuiyatakina

  • Kosiom Ageun 21:1-7.

    Kanukinyo akepia Aburaam okokuke kotoma apaaran nakikanyetekauni? (Age. 17:10-12; 21:4)

  • Kosiom Ageun 22:1-18.

    Epone ani etoduna Isaak ebe anonokikit nges Aburaam papake, ido epone ani etupusitor na nuepote aiswamaun oingaren ido nu epol apolou kec? (Age. 22:7-9; 1 Kor. 5:7; PiI. 2:8, 9)