Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Eitaboka Loka Akiro Nuitetemit Ebaibuli

Aitetemet 13: Aburaam—Epapero Loka Edeke

Aitetemet 13: Aburaam—Epapero Loka Edeke

ADIOPET kotoma aibosio nu apotu itunga kolototo aiboi akaulo na Akalele nges anyaritai Ur. Abu koraun ere lo ajena noi ido kojaasi itogoi luajokak toma ke. Konye amaete itunga luangina idekesio lukaisab. Epone ngopengol eswamatar kes ko Babel da. Itunga luajaasi Ur ka Babel mam aputosi kede Noa ka okokuke Sem, lu enyikokinitos aijaanakin Yawe.

Kotwana Noa lomunot akaulo na ikar 350 edaun akalele. Araai akaulo na ikar iarei nges aurunere etunganan lo itei ijo kaputo kana. Arai ngesi etunganan lo etegelikina kanejai Edeke. Ekiror ke arai Aburaam. Eboit ngesi nepepe ka ekale ke kotoma ore ngol loka Ur.

Aburaam eseseni acer

Adiope paaran, kolimok Yawe Aburaam: ‘Konyou ko Ur ka koinacanakon kolot akwap naketodikini ijo.’ Abu kerek Aburaam korimaa Edeke kosodi ainyeikin aijar ngin nakajokan najai Ur? Eebo, abu korima Edeke. Naraai arai lo arimarit Edeke duc aponi lo konyaritete Aburaam epapero loka Edeke.

Apotu ice kokale loka Aburaam kouparos kanges ne anyouna ko Ur. Luapotu kouparos kanges kesi Tera papake, Lot ocenike ka Sara akeberu. Kodolutu aboisit nanyaritai Karan ne abu Tera kotwanik. Alwaka kes cut ko Ur.

Ketubor apak naedit apotu Aburaam ka ekaleke konyoutu ko Karan alosite akwap na anyaritai Kanaan. Kangina kotema Yawe ebe: ‘Na nges akwap na ejaaikini ikonidwe.’ Kiboi Aburaam ko Kanaan ido iboenenei koweman.

Kogeu Edeke aingarakin Aburaam tetere ejaunatar ka isipanin luka amerekekin ka itiang ice da ka ibulesin akwata kwata. Konye nges ka Sara amameotor idio koku yeni arai yenikec.

Ne araar Aburaam lo ikar 99 lukamojong, kotema Yawe: ‘Esumunit ebe iraun ijo papa loka atekerin nuipu nuka itunga.’ Konye epone ani ti epedorotor ngul naarai akokosanitos Aburaam ka Sara noi kanu apedor aurun ikoku?

Ageun 11:27-32; 12:1-7; 17:1-8, 15-17; 18:9-19.



Angiseta

  • Itunga inyoika lueboete ore loka Ur?
  • Ingai bo etunganan loejai toma aputo, iwori bo aurunere nges ido aibo eboio nges?
  • Inyoin bo abu Edeke olimok Aburaam aswam?
  • Kanukinyo anyaritere Aburaam epapero loka Edeke?
  • Luangai apotu kouparos nepepe ka Aburaam ne anyouna nges ajalakin Ur?
  • Anyoika abu Edeke kolimok Aburaam kedol nges akwap naka Kanaan?
  • Aisumunet anyoin abu Edeke koinak Aburaam ne araunor nges lo ikar 99 lu amojong?

Angiseta nuiyatakina

  • Kosiom Ageun 11:27-32.

    Epone ani ajenatar Aburaam ka Lot? (Age. 11:27)

    Karaida imarakinitai Tera kwape lo etonyouni ekaleke aibe Kanaan, epone ani ijenuna oni ebe arai Aburaam cut nges ageuni aomisioit na, ido kanukinyo eswama nges nuu? (Age. 11:31; Asw. 7:2-4)

  • Kosiom Ageun 12:1-7.

    Aitalalar atutuket naka Aburaam anyoin nabu Yawe iswama akaulo na Aburaam adolore akwap naka Kanaan? (Age. 12:7)

  • Kosiom Ageun 17:1-8, 15-17.

    Aijulakinet na ekiror ani nabu Aburam kodum ne araar nges lo ikar 99 lukamojong, ido kanukinyo? (Age. 17:5)

    Arerengusio nukoingaren anyoika nuabu Yawe kisumunit Sara? (Age. 17:15, 16)

  • Kosiom Ageun 18:9-19.

    Kotoma Ageun 18:19, aswamisio anyoika edakakinitai luka papa? (Ikis. 6:6, 7; Pes. 6:4)

    Aitejenaret ani naka Sara na itodunit ebe mam oni ipedori aingada idio bore kanei Yawe? (Age. 18:12, 15; Sab. 44:21)