Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Eitaboka Loka Akiro Nuitetemit Ebaibuli

Aitetemet 12: Koduko Itunga Egoropa

Aitetemet 12: Koduko Itunga Egoropa

KOTUBOROS ikar luipu. Kouriata isap luka Noa idwe luipu. Kopoloros idwe kec kosodete ngul da aurun idwe luipu. Katipet, kipuaros itunga kotoma akwap.

Ediopet kotunga kalu arai ipapait ka Noa lo anyaritai Nimurod. Arai ngesi etunganan lo arono lo amejai ka aiyar da itiang ka itunga da. Abu Nimurod kitaraun ekabaka lo epugai itunga luce. Mam Edeke amina Nimurod.

Enerasi itunga kere kapak kangin adiopengajep. Akoto Nimurod aidar kesi kere nepepe tetere ngesi ipugai kesi. Aso ijeni ijo nu abu ngesi iswama? Abu kolimok itunga aiduk ere ka etogo loerai egoropa. Koany kesi kotoma aputo iswamaete amatapalin.

Mam Edeke Yawe eyalama kanuka etogo kalo. Akoto Edeke itunga aisiarakin kosodete aiboi kotoma akwap kere. Konye kobalas itunga ebe: ‘Kopotu, kadukoto ere ka egoropa loedoli aidike toma akuj, kadumuniata ekiror!’ Akotosi itunga adumun ayongio kanukec, mere kanuka Edeke.

Abu Edeke kisimik itunga aiduk etogo lo. Ijeni ijo epone lo eswamauna ngesi kwangin? Abu kisunyaki ainyalinyala angajepakec itia kesi ainer angajep adiopet bon. Mam bobo adukok apedorete ajenun einer loka yenice. Nu nges amaikinere ere kec Babel araibo Babulon apolouke “Aitotolikina.”

Kogeunete itunga anyounun ko Babel. Olototo atukono nuka itunga nuenerasi angajep naeputo aiboi nepepe atutubena nuegelegela kotoma akwap.

Ageun 10:1, 8-10; 11:1-9.

Iswamak edukete egoropa


Angiseta

  • Ingai bo Nimurod, ido epone ani asesena Edeke nges?
  • Kotoma aputo kanukinyo asubatar itunga amatapalin?
  • Kanukinyo mam Yawe eyalamaar kede aduko ngin?
  • Epone ani etapaikina Edeke adukio naka egoropa?
  • Ekiror ani amaikinitai ere ngol, ido inyoin apolou ekiror kangol?
  • Inyo abu otakanik itunga akaulo na etolitolikina Edeke angajepa kec?

Angiseta nuiyatakina

  • Kosiom Ageun 10:1, 8-10.

    Inyoika iponesio luabu Nimurod kitodu, ido aikwenyaret ani ijakinit na oni? (Awa. 3:31)

  • Kosiom Ageun 11:1-9.

    Anyoin alosikinet ajaai kau na adukio naka egoropa, ido kanukinyo abeitor aswam ngin aibiror? (Age. 11:4; Awa. 16:18; Yok. 5:44)