Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Eitaboka Loka Akiro Nuitetemit Ebaibuli

Aitetemet 11: Etaluka Losodit

Aitetemet 11: Etaluka Losodit

IJENI ijo ibore yenisodit Noa aswam akaulo na ngesi ka ekekale alomun ataker? Abu koinak asubanit araai ainakinet nejaai Edeke. Ipedori ijo aanyun ngesi iswamai nuu kotoma aputo kana. Koinak Noa ainakinet naa naka itiang kanu aisialamikin Edeke alakun akekale kotoma Akalele nati.

Ataker ka etaluka

Iwomit ijo ebe abu Yawe iyalamikin kainakinet kangin? Eebo abu kiyalamikin. Ido abu kisumum Noa ebe mam bobo nges emudiari akwap itosomai akalele.

Kookisii akipi kakwap kosodi Noa ka ekekale ageun aijar nakitetet kokinga naka ataker. Kisirereng Edeke kes, kolimok kes ebe: ‘Kouriata idwe luipu noi. Kipuaros aileleb akwap.’

Konye koingaren ne epupunatar itunga nu ekanunitos akalele nati aticepak epote akuriakar noi ebe ebuni bobo akalele ace. Aso abu Edeke koinak icebore kwape aanyunet na iisitikini itunga aisumunet ke ebe mam bobo ngesi ebuni ayaun akalele akwap. Ijeni ijo ibore abu nges koinak kanu aisitikin kesi? Nges etaluka.

Noa ka ekal ke

Etaluka duc eanyunio kotoma akuj ne ecauna akolong edau edou aitep. Ejaasi italukan kede iriagin luipu luibusak. Iwanyunitor ijo ediopet? Itei ijo lo ejai toma aputo?

Nu nges abala Edeke: ‘Esumunit eong ebe mam bobo cut itunga ka itiang emudiario kakalele. Asipokini ekataluka odowon. Ido netakanuna etaluka angoliari eong nes kasodi aitun akaisumunet.’

Aso ne iwanyuna ijo etaluka, inyoin bo isitikini nges ijo? Eebo aisumunet naka Edeke ebe mam bobo nges emudiari akwap kakalele.

Ageun 8:18-22; 9:9-17.



Angiseta

  • Kwape itodunitere kotoma aputo, inyo abu Noa iswama nepe adokuna ataker?
  • Aicorakinet ani abu Edeke koinak Noa ka ekaleke akaulo na Akalele?
  • Anyoin aisumunet abu Edeke koinak?
  • Ne ianyuna oni etaluka, inyoin isitikini nges oni?

Angiseta nuiyatakina

  • Kosiom Ageun 8:18-22.

    Epone ani kijaaikina oni Yawe lolo “asakat na eur maa?” (Age. 8:21; Bur. 13:15, 16)

    Anyoin angicunet na abu Yawe koany na ekamunit ejautene loka etau loka etunganan ido acoikina ani ibusakit oni aitosom? (Age. 8:21; Mat. 15:18, 19)

  • Kosiom Ageun 9:9-17.

    Anyoin aitutuket abu Yawe kiswamaa kede isuban kere luka akwap? (Age. 9:10, 11)

    Edauni aitutuket naka etaluka apak na etia ai? (Age. 9:16)