Enok

KWAPE eyatatar itunga aipuar ka akwap, luepu kakesi apotu iswamata iboro luaroko kwape Kain. Konye agitakina ediopetunganan. Nges etunganan lo anyaritai Enok. Arai Enok etunganan lo atiting. Itunga kere lualukunitos ngesi eswamaete iboro luaroko, konye abu Enok opaik ijaanakini Edeke.

Ijeni ijo kanukinyo eswamaatar itunga ngul iboro luipu luaroko? Aso koomoom, ingai ejakini Adam ka Keba aipalikin Edeke ka ainyam araito nu abala Edeke kesi mam ebusakinit aiyam? Eebo, arai emalaika lo arono. Enyarit Ebaibuli nges Satan. Etamit ngesi aitaraun nginitunganan kere yeni aronon.

Akoko ka eyarit

Adiopepaaran abu Edeke Yawe olimok Enok alimokin itunga ibore yen mam kes akotosi apupun. Arai kwanata: ‘Ebuni Edeke adiopepaaran amudiar itunga kere luarokok.’ Esubit do apotu itunga onyunyurikinos noi apupun ngun. Apotu acepak otamata aiyar Enok. Aso akoto Enok orai lo etiting tetere elimokini itunga nualosi Edeke aswam.

Mam Edeke abu ojalak Enok aijar adaun apak na epol kokiding itunga ngul luaroko. Abu Enok kojar adaun ikar 365 bon. Kanukinyo kibalar ebe “ikar 365 bon”? Naarai ikiliok lu apaarasia angun araasi lu agogong noi adepar lu akwana ido kojarete adaun apak na epol. Koany okoku loka Enok lo anyaritai Metusela iboit adaun ikar 969!

Itunga iswamaite iboro luarokok

Aso akaulo na atwanare naka Enok, apotu do itunga kiyatas arokiar adepar noi. Ebala Ebaibuli ebe ‘nginibore kere yeni aomoomoete kes arai yeni arono angolisawa ido ilelebun amengeranut akwap.’

Ijeni adiope akirot na ayaunit atiokisio ipuu kotoma akwap kapaarasia kangun? Naarai ajaatar Satan kepone ecie loitetet lo ejaanakina nges itunga aswam iboro luarokok. Ibuni oni aisisiaun nuikamunitos nuu.

Ageun 5:21-24, 27; 6:5; Iburanian 11:5; Yuda 14, 15.



Angiseta

  • Epone ani etegelikinar Enok?
  • Kanukinyo eswamatar itunga kapaarasia nuka Enok luipu nuaroko?
  • Inyoika iboro luaroko lueswamaete itunga? (Koany aputo.)
  • Kanukinyo ebusakinitor Enok orai loatiting?
  • Apak na atia ai adaunete itunga ejarete kolo, konye apak natia ai obu Enok odau ejari?
  • Inyoin abu otakan akaulo na atwania Enok?

Angiseta nuiyatakina

  • Kosiom Ageun 5:21-24, 27.

    Enyoin edicane lo ajaatar Enok ka Yawe? (Age. 5:24)

    Kotoma Obaibuli, ingai bo etunganan lo amojongit noi lo iboit kotoma akwap ido arai nges lo ikar idi etwani? (Age. 5:27)

  • Kosiom Ageun 6:5.

    Epone ani obu ejautene oroniaror kotoma akwap akaulo na atwania Enok, ido epone ani itirianere kede apaarasia wok? (2 Tim. 3:13)

  • Kosiom Iburanian 11:5.

    Eipone Enok ani loabu “kisialamik Edeke noi,” ido anyoika nu obu nges odum? (Age. 5:22)

  • Kosiom Yuda 14, 15.

    Epone ani epedoriata Ikristayon lolo aisisiaun atiting naka Enok ne ikwenyanaratar kes itunga nuikamunitos abunore naka ejie loka Arumagedon? (2 Tim. 4:2; Bur. 13:6)