Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Eitaboka Loka Akiro Nuitetemit Ebaibuli

Aitetemet 6: Esapat Lo Ajok Ka Lo Arono

Aitetemet 6: Esapat Lo Ajok Ka Lo Arono

KIREREO kwana Kain ka Abel. Epolok kesi kere. Araun Kain akorion. Ekorienenei ngesi ikinyom, araito ka inyamat lukwii.

Kain ka Abel einakinete Edeke ainakinete

Erai Abel edaran amerekekin. Emina nges aidar imerekekin ludidik. Epolounete lu araun amerekekin nuapolok, ido da ebuni do Abel ajaun ka esipan loka amerekekin loepol noi.

Kapaaran adiopet, apotu Kain ka Abel oyautu ainakinet nejaai Edeke. Koyau Kain inyamat lu akorit nges. Kosodi Abel ayaun adiopet kamerekekin najokuna noi na episit ngesi. Isialamikinit Edeke Abel nepepe ka akeinakinet da. Konye mam ngesi isialamikinit Kain nepepe ka akeinakinet da. Ijeni ijo kanukinyo?

Mam erai ebe etelekarit ainakinet naka Abel ngin naka Kain. Konye naarai erai Abel etunganan lo ejokuna. Amina nges Yawe ka onaceke da. Konye Kain erono; mam emina onaceke.

Aso abu Edeke kolimok Kain ebe ibusakinit nges aijulakin ikeponesio. Konye mam Kain abu kopupok ngun. Enyunyura ngesi noi naraai amina Edeke Abel adepar. Aso kotema Kain Abel atiar ‘koloto omanikor.’ Kangina, ne ajaatar kes bon, kinom Kain onaceke Abel. Kinom nges noi kiton aiyar nges. Aso mam kereka ngin erai ibore yen erono noi Kain aiswamaun?

Koker kain edau aiyar Abel

Karaida etwanit Abel eroko Edeke iitunit ngesi. Ajok Abel, ido mam Yawe emurokini itunganan kangin. Aso adiope paaran, ebuni Edeke Yawe aitajarun Abel aijar. Kapak kangin mam bobo Abel ebuni atwanare cut. Epedori do nges aiboi kane akwap ikar kere. Mam kereka erai ibore yen ejok ajenun itunga kwanat Abel?

Konye mam Edeke iyalama kede itunga kwanat Kain. Akaulo na Kain aiyar onaceke abu Edeke itisilana nges kopone kalo airengear nges nelwana noi anyoun okale kec. Ne alosio Kain aiboi atutubet ace kakwap abu koyanga adiopet kanacan ke araun akeberu.

Ketubor apak, apotu Kain ka akeberu kourutu idwe. Ice kosap ka apesur luka Adam ka Keba apotu kodukonokinos, ido apotu kouriata idwe. Katipet kipuakata itunga kotoma akwap. Aso kesisiautu nuikamunitos ice kakes.

Ageun 4:2-26; 1 Yokana 3:11, 12; Yokana 11:25.



Angiseta

  • Anyoika aswamisio nuapotu Kain ka Abel Konyangasi?
  • Anyoika ainakineta nuapotu Kain ka Abel kijaikis Yawe?
  • Kanukinyo eyalamar Yawe ka ainakinet naka Abel, ido kanukinyo mam nges eyalamar ka ainakinet naka Kain?
  • Erai Kain etunganan lo ikoni ai, ido epone ani atamia Yawe aiteten nges?
  • Inyoin abu Kain kiswama ne ajaatar nges ka onaceke bon omanikor?
  • Kitatam nuapotu kotakanikis Kain akaulo na nges aiyar onaceke.

Angiseta nuiyatakina

  • Kosiom Ageun 4:2-26.

    Epone ani etatama Yawe ejautene loarono loajai Kain toma? (Age. 4:7)

    Epone ani etoduna Kain ejautene lo otau ke? (Age. 4:9)

    Biai esesena Yawe abukonorio naka aokot numam aronis? (Age. 4:10; Isa. 26:21)

  • Kosiom 1 Yokana 3:11, 12.

    Kanukinyo enepuna Kain kede anyunyura, ido epone ani ijaikina ngin oni aikwenyaret lolo? (Age. 4:4, 5; Awa. 14:30; 28:22)

    Epone ani itodunitor Ebaibuli ebe karaida itepegata lukokale wok kere Yawe ipedori oni apaikin iinakina? (Sab. 27:10; Mat. 10:21, 22)

  • Kosiom Yokana 11:25.

    Anyoin aitogogongoret na ijaikini Yawe ngul kere luetwakete kanuka adolit? (Yok. 5:24)