Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Eitaboka Loka Akiro Nuitetemit Ebaibuli

Aitetemet 3: Etunganan Losodit Ka Aberu Nasodit

Aitetemet 3: Etunganan Losodit Ka Aberu Nasodit

INYO egelara kotoma aputo kana? Eebo, erai itunga luejaasi tomake. Eraasi kesi etunganan losodit ka Aberu nasodit. Ingai asubi kes? Edeke asubi kes. Ijeni ijo ekekiror? Erai Yawe. Etunganan ka aberu aponi konyarai Adam ka Keba.

Adam ka Keba ejaas omanikor loka Eden

Lo nges epone lo asubuna Edeke Yawe Adam. Abu kolem apua kotoma alupok kosodi asubun akuan na adolit, naka etunganan. Akaulo do abu kokutak eyengane toma okume loka etunganan, koraun do Adam ekajaran.

Ajaatar Edeke Yawe aswam nakotor nges Adam. Abu kolimok Adam amanakin itiang kere luagelegela ikiroria kec. Angicit Adam itiang acepak adaun apak na epol noi tetere nges apedori aseinikin kes ikiroria luitebeikina. Ne amanakina Adam itiang ikiroria, abu kogeu aanyun icebore. Ijeni ijo ibore ngin?

Ajaatar etiang kere luowaikec. Ajaasi itomei luapapa ka luatoto ido ingatunyo luapapa ka luatoto. Konye Adam amamei yeni abeit araun naowaike. Aso abu Yawe ijaik Adam ajotoor noi kosodi aditun akemaran kosiep ke. Abu Yawe itosom amaran na asubakina Adam aberu.

Iyalamikin Adam noi! Ido koomoon epone lo obu Keba iyalamikinor ajaun toma omanikor loibus aiboi! Apedorete do kes kwana adumun idwe kosodete aiboi nepepe kotoma aiyalama.

Akotor Yawe Adam ka Keba aiboi ikar kere. Akotor ngesi kes aitaraun akwap kere na ibus kwape emanikor loka Eden. Kisima epone lo eyalamar Adam ka Keba ne esisiaunatar kes ebe ebusakinit aswam nuu! Ti ijo ikotokin aingarakin kotoma aitaraun akwap emanikor lo ibus? Konye aiyalama naka Adam ka Keba mam abu odau aojau. Aso kajenutu kanukinyo.

Isabulin 83:18; Ageun 1:26-31; 2:7-25.



Angiseta

  • Epone ani egelakinar aputo na ejai Aitetemet na 3 kotoma aputo na ejai Aitetemet na 2?
  • Ingai asubi etunganan losodit ido ingai ekiror etunganan kangol?
  • Anyoin aswam abu Edeke kijaik Adam aswam?
  • Kanukinyo ejaikina Edeke Adam ajotoor ajo nuipu?
  • Apak na etia ai abeit ti Adam ka Keba adaun ejarete, ido aswam anyoin akotor Yawe kes aswam?

Angiseta nuiyatakina

  • Kosiom Isabulin 83:18.

    Ingai ekiror loka Edeke, ido anyoin adoketait ke na itegelikina kotoma akwap? (Yer. 16:21; Dan. 4:17)

  • Kosiom Ageun 1:26-31.

    Inyoin ibore yeni erikakina Edeke aisub ke kapaaran nakikanyetekape, ido epone ani agelakinar isubat yen kotoma otiang? (Age. 1:26)

    Ainakinet ani abu Yawe koinak etunganan ka itiang? (Age. 1:30)

  • Kosiom Ageun 2:7-25.

    Inyoin emoriarit aswam naka Adam na amaanakin itiang ikiroria? (Age. 2:19)

    Epone ani ingarakina Ageun 2:24 oni amisikin epone lo esesena Yawe emanyit, atiakakin ka ainyeinio? (Mat. 19:4-6, 9)