1. Epone bo ani imeda ijo kotoma aiyatakin aisisia Ebaibuli?

Komamei abuinikin, nuidau ijo aisisiaun Obaibuli etogogongoto amina kon kanejai Yawe. Ekoto ijo aiyatakin aisisia Ebaibuli tetere amina kon epoloi. (1 Petero 2:2) Amuno kon naijar ikar kere egongakina ijo aikunyakin nejai Edeke kotoma aisisia Akirot ke.​—Kosiom Yokana 17:3; Yuda 21.

Neiyatakina aijen kon naka Edeke apolo, ebuni aiyuun kon agogongor. Ingarakini aiyuun ijo aitalakar Edeke. (Iburanian 11:1, 6) Ijaikini ijo aitironokin ka aswam aijulujuleta kotoma aijar kon.​—Kosiom Aswamisio 3:19.

2. Epone bo ani imeda aijen kon naka Edeke itunga luce?

Ipedori ijo alomar opaperone lo itegelikina kede Yawe.

Kwape luce, ibuni ijo akotokin aimor nuidau aisisia keda luce—oni kere imina alimonokin akiro nukajokak. Neiyatakinia ijo aisisia Ebaibuli, ibuni ijo ajenun epone loitosomaet Ebaibuli anu aitetem aiyuun kon kanuikamunitos Yawe ka akiro nukajokak.​—Kosiom Iromayon 10:13-15.

Itunga luipu egeunete aimor akiro nukajokak kede ipapero ka ipajan. Kitosom acobeu, aboisit na alimun ebe mam ekec ediini edolit, olimok kesi nu ikamunitos aisumununeta nuka Edeke. Bobo da, kiitu ebe esesenete itunga iponesio kon adepar nuinera ijo.​—Kosiom 2 Timoteo 2:24, 25.

3. Epaperone bo ani ipedori ijo adukun keda Edeke?

Aisisia Akirot Naka Edeke ingarakini ijo apolo kotoma omoyo. Ipedori do ijo alomar opaperone loitegelikina ka Yawe. Irauni ijo kwape idiopet yen okale ke.​—Kosiom 2 Ikorinton 6:18.

 4. Epone bo ani iyatakina ijo apolo?

Ipedori ijo apolo omoyo kotoma aiyatakin aisisia Akirot Naka Edeke. (Iburanian 5:13, 14) Ingit ediopet ka Ajenak Luka Yawe anu aingarakin ijo aisisia Ebaibuli kitosomaete eitabo Anyoika bo cut Nuisisianakini Ebaibuli? Neiyatakinia ijo aisisia nu ikamunitos Yawe, ijaun ijo ka aijar naiyalama ido kojasi ka amun.​—Kosiom Isabulin 1:1-3; 73:27, 28.

Akiro nukajokak erasi nuka Yawe, Edeke loiyalama. Ipedori ijo aikunyakin mamake kotama odicane kangul lu ijanakinete nges. (Iburanian 10:24, 25) Arai itamakinit ijo aswam nuipedori kere aisialamikin Yawe, ijai do ijo aiting aijar—naerai aijar obe. Aikunyakin nejai Edeke erai ibore yen ibusakinit ijo aswam.​—Kosiom 1 Timoteo 1:11; 6:19.