Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Akiro Nukajokak Kanejai Edeke!

 Aisisiaet 4

Ingai Bo Yesu Kristo?

Ingai Bo Yesu Kristo?

Inyoika bo iponesio lu ejaikinete Yesu erai lo apatana adolokin?—MATAYO 11:29; MARAKO 10:13-16.

1. Epone bo ani ageuna aijar naka Yesu?

Mere kwape itunga luce, abu Yesu kojar kotoma akuj kwape etungan lo moyo eroko euruna kotoma akwap. (Yokana 8:23) Arai Yesu ekiai loka isuban luka Edeke ido abu ingarak aisub iboro kere. Nges bon abu Yawe kosub kakekanin ngun inyaritere nges Okoku loka Edeke “loiteluna.” (Yokana 1:14) Abu Yesu kijanak kwape Ekeraban Edeke, ngun enyaritere nges “Akirot”.Kosiom Awaragasia 8:22, 23, 30; Ikolosain 1:15, 16.

2. Kanukinyo abunio Yesu akwap?

Abu Edeke ijuk Okokuke akwap koipone loka aisujuulun aijar ke naemoyo akoik naka Mariam Abekot na Oyudaya. Aso, emameotor Yesu papake lotunganan. (Luka 1:30-35) Kobu Yesu akwap (1) aisisianakin abeit naka Edeke (2) kanu aitodikin oni anyunet naitupi kanu aswam nuekoto Edeke karaida ejaas oni atiokisio, ka (3) ainakin akeijar kwape “alakunet.”Kosiom Matayo 20:28.

3. Kanukinyo ikotor alakunet?

Alakunet nges atiai lo etacio anu ayaun aosikinio naka etunganan kotoma asurup natwanere. (Ayoun 21:29, 30) Mam atwanere ka amojong arasi alosikinet naka Edeke obe kanejasi itunga. Biai ijenuna oni ngun? Kolimok Edeke etunganan losidit Adam ebe, arai kidiaka itwani. Aso korai mam Adam ediakarit, ti mam nges cut etwana. (Ageun 2:16, 17; 5:5) Kotoma Obaibuli, “kolom” atwanare akwap kere kanu Adam. Abu do, Adam koinak  idweke kere adiakar ka atwanare. Ikoto do oni alakunet kanu aosikinio kotoma atwanare napotu oni erumutu kanejai Adam.Kosiom Iromayon 5:12; 6:23.

Ingai bo etaci alakunet kanu aosikin oni atwanere? Arai itwaka, itaci oni eropit loka adiakanareta wok bon. Mam ekadiakanaran epedori aitac adiakanareta ka luce.Kosiom Isabulin 49:7-9.

4. Kanukinyo atwania Yesu?

Mere kwape oni, arai Yesu lo adolit. Mam nges abeit atwanere anu arokisio ke—amameotor nges adiakar. Konye, abu Yesu kotwana kanu arokisio wok. Abu Edeke itodu amina naepol nejasi itunga nejukuna Okokuke atwanere anuwok. Abu Yesu da kitodik oni amina ka arimarite Papake kosodi aijaikin akeijar kanu arokisio wok.Kosiom Yokana 3:16; Iromayon 5:18, 19.

5. Inyoin bo iswamai Yesu kwana?

Naajar kakwap, abu Yesu Itangaleu luadekak, kitajar lukatwak, ka ayuar luajasi ka atiokisio nuagelegela. Etodunit nges nuebuni aiswamaikin itunga kere luerimarete ngesi koingaren. (Matayo 15:30, 31; Yokana 5:28) Akaulo na Yesu atwanere, abu Edeke kitajaru nges kwape etunganan lo moyo. (1 Petero 3:18) Abu do Yesu kiboikin akan nakoteten naka Edeke aidar kiton neijaikina nges Edeke apedorosio nukaipuga kwape Ekabaka kakwap. (Iburanian 10:12, 13) Ipugai kwana Yesu kwape ekabaka lokakuj, Ido elimonokinete iketupitok akiro nukajokak akwap kere.Kosiom Daniel 7:13, 14; Matayo 24:14.

Katipet ebuni Yesu aitosom apedorike kwape Ekabaka alemar aiticanitoi kere kangul luiswamaite nukarokok. Ngul kere luiyuunitos Yesu kaiirar nges epote adumun aijar naeyalama kotoma paradais kokwap.Kosiom Isabulin 37:9-11.