Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Akiro Nukajokak Kanejai Edeke!

 Aisisiaet 3

Akiro Nukajokak Eraas Cut Nuka Edeke?

Akiro Nukajokak Eraas Cut Nuka Edeke?

1. Ingai bo Ekewadikan loka Ebaibuli?

Akiro nuajokak ebe ejarete itunga ikar kere kotoma akwap nges iwadikatai Obaibuli. (Isabulin 37:29) Itabon 66 ludidik kesi iswamaunito Ebaibuli. Abu Edeke kitosom itunga 40 lukeyuunak aiwadik Ebaibuli. Itabon ikanyi lusodit kesi abu Musa iwadik apak naeyapikit ikar 3,500 luatuboros. Eitabo lo awasia nesi abu eyakia Yokana iwadik ikar luedeparitos 1,900 luatuboros. Aomisio bo angai apotu ewadikak Ebaibuli iwadikata? Abu Edeke inerakin ka ewadikak Ebaibuli kitosomai emoyo loka launan. (2 Samuel 23:2) Iwadikatos aomisio Edeke mere nukec. Aso Edeke nges arai Ekewadikan Ebaibuli.Kosiom 2 Timoteo 3:16; 2 Petero 1:20, 21.

2. Epone bo ani ijenuna ebe erai Ebaibuli lo abeit?

Kijeni oni ebe erai Ebaibuli loka Edeke narai edwarit cut nu koingaren. Emamei etunganan lo epedori aswam ngun. (Yosua 23:14) Edeke loka pedor kere bon nges epedori aijen aijar naka itunga nakoingaren.Kosiom Isaia 42:9; 46:10.

Ibusakinit eitabo loka Edeke orai lo itegelikina, ido erai. Ibilionin luka atakununeta nuka Ebaibuli nges ekorio angajepisinei nuegelegela. Karaida emojongit Ebaibuli, ecamanara keda akiro nuka esayanis. Osodi bobo, ikewadikak da 40 arasi lu acamanara nepepe. * Boboda, Ebaibuli ngesi ejaatar kede ecikum lomam itepegio loka amina na Edeke, ido ejatar apedor naka aijulakin aijar naka itunga. Itogogongitos cut imilionin luka itunga ebe, erai Ebaibuli Akirot Naka Edeke.Kosiom 1 Isesalonikan 2:13.

 3. Anyoika bo nuinera Ebaibuli?

Inera Ebaibuli akiro nukajokak ebe ejatar Edeke alosikinet namin nejasi itunga. Itejenutos Awadikaeta epone lo atwaniara etunganan aijar naka paradais ikolosek ka epone lo ebunio bobo paradais ajaikin.Kosiom Apukokinio 21:4, 5.

Ejatar Akirot Naka Edeke bobo ikisila, ipiteno, ka aicoreta. Kaiyatakin, Inerit Ebaibuli epone loayaitor Edeke itunga kolosek—Nukolosek itudunitos iponesio Edeke. Aso, epedori do Ebaibuli aingarakin ijo ajenun Edeke. Itetemit epone lo ipedoria ijo araun opaperoke.Kosiom Isabulin 19:7, 11; Yakobo 2:23; 4:8.

4. Epone bo ani ipedoria ijo amisikin Ebaibuli?

Ebuni eitabo lo aingarakin ijo amisikin Ebaibuli kotupite epone lo esisianakina Yesu. Esisianakini Yesu kitosomai aiwadikaeta nuegelegela kosodi aitetem “apolou kec.”Kosiom Luka 24:27, 45.

Ikidioko iboro luitelelete kwape Itelela akirot naijok naka Edeke. Konye, itunga luipu mam ekotosi, kosodi anejasi ice erasi nu itakadikinete. Kinyekisi ngun ijo adumun akuriau. Aijar kon nakoingaren egongakina toma ijo adumun aijene naka Edeke.Kosiom Yokana 17:3.

 

^ par. 7 Koany eitabo A Book for All People.