Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Akiro Nukajokak Kanejai Edeke!

 Aisisiaet 14

Kanukinyo Ejaatar Edeke Kede Atukot?

Kanukinyo Ejaatar Edeke Kede Atukot?

1. Kanukinyo etemokinitor Edeke Isirael nakolo?

Abu Edeke itemok aur naka apolon Aburaam toma ateker kosodi aijaikin kesi ikisila. Abu konyara ateker ngin “Isirael” kosodi ataraun kesi edarak luka aima nakabeit ka akekirot. (Isabulin 47:19, 20) Aso apedorete do itunga luka atekerin kere aimeda kanejai Isirael.Kosiom Ageun 22:18.

Abu Edeke koseu Isiraelin araun ikejenak. Akiro kec nueswamasi kolo itodiaritos epone lo imedatar itunga kanu arimarit ikisila luka Edeke. (Ikisila 4:6) Aso, kotoma Osiraelin, apedorete do luce da ajenun Edeke loka abeit.Kosiom Isaia 43:10, 12.

2. Kanukinyo eraatar Ikristayon lukabeit luitemokina?

Kapak, abu Isirael kotwania acamunio naka Edeke, ido abu Yawe koburok ateker ngin kede atukot naka Ikristayon. (Matthew 21:43; 23:37, 38) Kwana, aiboisit naka isiraelin, ijanakinete Ikristayon lukabeit kwape Ajenak Luka Yawe.Kosiom Aswamisio 15:14, 17.

Abu Yesu itemok atupitok ke alimonokin ka aituluor luatekerin kere ikesisiak. (Matayo10:7, 11; 24:14; 28:19, 20) Ejai aswam na kwana adolere angetakinet ke, kawasia na eswamae loiboro kalu. Irwana nasodit na kwana, adau Yawe aimorikin itunga imilionin lu atekerin kere toma aima nakabeit. (Apukokinio7:9, 10) Itemokina Ikristayon lukabeit aisinyikokin ka aingaranakin bonik. Kotoma akwap kere, inumunumete aisisianakin naka Ebaibuli naeponatar airiamunum kec.Kosiom Iburanian 10:24, 25.

 3. Epone bo ani ageunor atukot nakwana naka Ajenak Luka Yawe?

Atukot nakwana naka Ajenak Luka Yawe ageun okar lo 1870 natukokinotor itunga luekidio luesisiaete Ebaibuli kogeutu adumunum bobo abeit naka Ebaibuli naoliorit. Ajenete kesi ebe etemokinit Yesu atukot naka Ikristayon alimonokin, aso apotu kogeutu anapeta nu alimonokin Ajakanut akwap kere. Kokaru lo 1931, apotu kirumutu ekiror Ajenak luka Yawe.Kosiom Aswamisio 1:8; 2:1, 4; 5:42.

4. Epone bo ani eraatar Ajenak Luka Yawe luitemokina?

Okar akwatat lusodit, atukono nu Ikristayon kotoma akwapin nuipu kesi apotu imedaata kane ajai ayaite nakokiding na ecamunit Yesu kwape Akou naka atukot. (Aswamisio 16:4, 5) Kwapekwangin, loloda, imedaete Ajenak Luka Yawe akwap kere kanejai Ayaite Nakokiding na imakio luemisiaritos. Eanyanari atenun nuka iyapesin luka Ajenak Luka Yawe lu ijulete, inomete, ka akoranar iboro lu isisiaere Ebaibuli kotoma angajepa nu edeparitos 600. Epedori do Ayaite nakokiding aijaikin aisinyokikinio ka aitetenio naka aiwadikaeta nejaas atukono nuedeparitos 100,000 akwap kere. Kangin tukot ikiliok luibecokina kesi ijanakinete kwape imakio araibo aanyanarak. Ikiliok lu kesi ijanakinete esipan loka Edeke toma amina.Kosiom 1 Petero 5:2, 3.

Itemokina Ajenak Luka Yawe alimonokin akiro nukajokak ka aituluonor ikesisiak. Kwape iyakia, Elimonokinete kotogo kiton kotogoi. (Aswamisio 20:20) Icamunit bobo isio aisisia Ebaibuli kede ngul lu eminas abeit. Konye Ajenak Luka Yawe kesi mam erasi atukot bon. Irai bobo isio ekale loka Papa lominat. Irai isio inacan ka anacan luidaranara bonik. (2 Isesalonikan 1:3) Kwape itemokinatar itunga luka Yawe  aisialamikin Edeke ka aingarakin luce, edukunitos ekale loiyalama noi kakwap.kosiom Isabulin 33:12; Aswamisio 20:35.