1. Anyoika bo akiro nuka Edeke?

Ekoto Edeke itunga ailel aijar kakwap. Kosub Edeke akwap kiboro kere lu ejaas toma naarai amina nges itunga. Edodor Edeke ayaun aijar na ejokuna nejasi itunga kere luka akwap. Ebuni nges ayuwar itunga kere katiokisio nueyaunete akudian.​—Kosiom Yeremia 29:11.

Emamei adio apugan kere naepedori alemar adedeng, adeka karaida atwanare. Konye ejaas akiro nukajokak. Katipet ebuni Edeke amudiar apugasinei itunga kere kosodi ajakanut ke aipuga. Epote luipugai nges ailel ainapakina ka angaleu.​—Kosiom Isaia 25:8; 33:24; Daniel 2:44.

2. Kanukinyo eraatar akiro nukajokak nukatipet?

Ebuni aiticanitoi ainang arai emudia Edeke itunga kere lukarokok akwap. (Sepania 2:3) Iwori bo etakanunatar ngun? Alimunit Akirot Naka Edeke ejautene loitukuriani itunga kwana. Itodunitos iboro lukarokok luiswamasi kwana ebe eyapiei apak naka Edeke noi.​—Kosiom 2 Timoteo 3:1-5.

3. Inyoin bo ibusakinit oni aswam?

Ibusakinit oni aisisia nuikamunito Akiro Nuka Edeke, Obaibuli. Eputosi kwape ebaluwa kanejai papa loemina oni. Elimokinit oni epone lo ibusakinitor oni aijar kwana ka epone lodumunet aijar namam edaun kakwap koingaren. Kabeit, mam ice epote aiyalamikin kanu ijo adumun aingarakinio amisikin Ebaibuli. Konye aijar nakoingaren erai naejok noi ido mam ibusakinit ijo atwaniar.​—Kosiom Awaragasia 29:25; Apukokinio 14:6, 7.