1, 2. Anyoika bo aingiseta nuibusakinit oni aingitakin bonik, ido kanukinyo eraatar ngun nuepolok?

KOTOMA aisisiakon naka Ebaibuli, idau ijo ajenun ebe itunga luipu luebakasi ebe emaete Edeke kesi isisianakinete ka aswam iboro luelait Edeke. (2 Ikorinton 6:17) Ngun ngesi icorakinitor oni Yawe anyoun kodiinin lukaisab, “Babulon lokapolon.” (Apukokinio 18:2, 4) Anyoika nuibuni ijo aswam? Nginidiope kaoni ejaasi keda aseunet, ido ibusakinit oni aingitakin ebe, ‘Amai kereka eong Edeke koipone kalo ekotor ngesi, arai bo amai eong ngesi koipone kalo akotor eong?’

2 Arai idaunit ijo anyoun kodiinin lukaisab, erai ngin ibore yenajokan. Aticepak ejaasi aswamisio ka inonosio ice luka idiinin nukaisab lueroko eminakinitos oni. Ketetemoto ber oni ace kaswamisio ka inonosio ngun kasodete aanyun kanukinyo eraar ibore yenepol oni asesen kesi eipone loesesena Yawe.

APUTOSIA KA AITAM AISIYALAMIKIN LUKATWAK

3. (a) Kanukinyo etionikitor icetunga aima komam itosomaete aputosia? (b) Anyoika nuisisianakini Ebaibuli kanuikamutos aitosom aputosia kotoma aima Edeke?

3 Etosomata icetunga aputosia ka abilai kanu Aima Edeke adaun ikar luipu. Arai iswamai ijo da kwangin, aticepak etionikit ijo aima Edeke komam itosomai iboro ngun. Konye kiitu ebe, isisianakini oni Edeke eipone loibusakinitor oni aima ngesi. Ido elimokinit oni Ebaibuli ebe mam Yawe ekoto oni aitosom aputosia kotoma aima.—Kosiom Anyoun 20:4, 5; Isabulin 115:4-8; Isaia 42:8; 1 Yokana 5:21.

4. (a) Kanukinyo mam ibusakinitor oni aitam aisiyalaimikin lukatwak? (b) Kanukinyo alimokinia Yawe iketunga mam aitam einer keda lukatwak?

 4 Icetunga itosomaete akecepak ka agogong naepol kanu aitam aisiyalamikin itunga lukatwak. Emaete kesi lukatwak. Konye idau oni aisisiaun ebe mam ikatwak epedorete aingarakin araibo aimusung oni. Mam kesi ejarete kanenicie. Kabeit, mam ejok aitam einer keda lukatwak naarai adiokirot naesubit bala elomunit kanejaasi lukatwak erai naelomunit kanejaasi ajokin. Ngun ngesi abu Yawe kicorakina idwe luka Isirael mam aitam einer keda lukatwak arai bo alomar toma ocudet loediopone kere.—Ikisila 18:10-12; koany Nuengesete 26 ka 31.

5. Anyoika epedorete aingarakin ijo ajalakin aima Edeke itosomai aputosia ka ajalakin aitam aisisalamikin lukatwak?

5 Inyoin bo epedori aingarakin oni ajalakin aitosom aputosia kotoma aima Edeke arai bo ajalakin aitam aisiyalamikin lukatwak? Ibusakinit ijo aisiom Ebaibuli ido koomoom noi nuikamunitos epone loesesenia Yawe iboro ngun. Eseseni nges kesi kwape ‘nuketal,’ arai bo nat lueroko. (Ikisila 27:15) Kilipenenei duc nejai Yawe kanu aingarakin ijo asesen iboro koipone loesesenia nges ka aingarakin ijo aima ngesi koipone loekotor ngesi. (Isaia 55:9) Imuno ebe epedori Yawe aingarakin ijo keda agogong na alemar aijarakon idiobore kere yenikamanara keda aima nakaisab.

IBUSAKINIT KEREKA ONI AINUMUNUM EBAGA?

6. Kanukinyo aseunere ainumunum aurio naka Yesu olap loitomonet kaarei 25?

6 Kotoma akwap kere, erai Ebaga ediopet kapaarasia nuepolok ido eomitos itunga ebe erai ngin aiitun aurio naka Yesu. Konye kotoma abeit erai Ebaga einono loka aima nakaisab. Kitetemit eitabo ediopet loenyaritai encyclopedia ebe ikapirin luko Rom enumunumete  alomun naka akolong kolap Loitomonet arei 25. Akotosi engarenok lukaidiinin aitaraun ikapirin kere Ikristayon, apotu kitutuboto ainumunum aurio naka Yesu kapaaran angin. (Luka 2:8-12) Mam esisiak luka Yesu enumunumete Ebaga. Ebala bobo eitabo ece ebe akaulo naka ikar 200 kedaun aurun Yesu, “emamei itunganan yenejeni ido ikidioko itunga luapodokinitos ajenun apaaran obe naurunere ngesi.” (Sacred Origins of Profound Things) Aponi kogeunai ainumunum Ebaga ikar luipu akaulo naka atwanare naka Yesu.

7. Kanukinyo mam Ikristayon luka abeit inumunumiata Ebaga?

7 Ejenete itunga luipu ageunet naka Ebaga ka ikenonosio, kwape nat ipucito ka ainanakineta. Kwape aanyunet, kotoma akwap nako England ka aiboisio ace nuka America, ajaasi apakio nuemikitere ainumunum ebaga kanuka ageunet ka inonosioke nukapirin. Idiotunganan yenadumunio inumunumi Ebaga alecorio. Konye ketubor apak naedit, apotu bobo itunga kogeutu ainumunum Ebaga. Konye kanukinyo mam Ikristayon lukabeit inumunumiata Ebaga? Naarai ekotosi kesi aisiyalamikin Edeke kotoma anginibore kere yeniswamaete kesi.

IBUSAKINIT KEREKA ONI AINUMUNUM APAARAN NAKA AURIO NAKA ITUNGANAN?

8, 9. Kanukinyo mam ikristayon lukolo sek enumunumiata aurio itunga?

8 Icebore bobo yeninumunumete itunga nges apak naurio naka itunganan. Ibusakinit kereka Ikristayon ainumunum apaaran naurio naka itunganan? Ainumunumio naka aurio ko Baibuli etakanunit irwan aarei bon ido arai naitunga lumam ejaanakinete Yawe. (Ageun 40:20; Marako 6:21) Arai ainumunum aurio naka itunganan eipone loijaikinere aibuses nejaasi idekesio lukaisab. Nges ejaikinit Ikristayon  lukolo sek “esesenete ainumunum aurio naka itunganan kwape inonosio nukapirin.”—The World Book Encyclopedia.

9 Eyuunitos Iromayon ka Iyonanin ebe kotoma apaaran naurunere itunganan ajai emoyo loayuarit ngesi ido ebe edari emoyo ngol ngesi kapak naka aijarake. “Eswamaenene emoyo ngon nepepe keda ideke yeneriamara apaaran naka aurioke kede naka itunganan kangin” Kwangin etetemitor eitabo, The Lore of Birthdays.

10. Kanukinyo mam Ikristayon lukabeit lolo inumunumiata aurio naka itunganan?

10 Iwomit kereka ijo ebe itojokit Yawe inonosio luka ainumunum luelomunitos kotoma odiinin lukaisab? (Isaia 65:11, 12) Mam. Ngun nges mam oni inumunumia aurio naka itunganan arai inonosio kere luimorikikina keda idiinin lukaisab.

ERAASI KEREKA NGUN NUEPOLOK?

11. Kanukinyo inumunumiata icetunga apaarasia nuapolok? Anyoika nuekoto koraasi nuepolok kaneijai ijo?

11 Ejenete itunga ice ebe elomunit Ebaga kotoma ononosio luka ikapirin, konye iyatakinitos kesi ainumunum. Eomitos kesi ebe erai ngin apak naka ailel keda ikaliakec. Iwomit ijo biai? Mam erono adumun apak ailel keda lukokalekon. Yawe ngesi abu kitegia ekale ido ekoto ngesi ikalia kere kiyalamasi, ekoto bobo ngesi oni amina lukokalewok ka aiswamakin kesi nuejok. (Ipeson 3:14, 15) Konye, ekoto oni aitogogong eidicanewok keda Yawe itia aisiyalamikinit ipajanawok koipone lo ijo aimorikin toma ononosio lukaisab. Nges abalar ekiyakia Paul ebe: “Kitemete nuitojokit Ejakait.”—Ipeson 5:10.

12. Inyoin epedori aijaikin Yawe aitoron apaaran napolon?

12 Ewomitos itunga luipu ebe mam erai nuepolok aijen nelomunitor apaaran nainumunumio, konye mam Yawe eseseni kwangin. Mam ngesi itojokit ainumunumio nuka  apaarasia nukapolok nuelomunitos kodiinin lukaisab arai bo ngun nuitopooloritos itunga arai bo imederan luka akwapin. Kwape aanyunet, ajaasi Imisirian keda inonosio lueturitere idekesiokec lukaisab. Akaulo naanyouniata idwe luko Isirael ko Misiri, apotu kesi, kikoputu einono loka ikapirin ko Misiri kosodete anyarit ‘epucit loka Ejakait.’ Konye abu Yawe koleco kesi kanu aswam ngun. (Anyoun 32:2-10) Kwape alimunitor enabi Isaia ebe: “Sirikitirosi ibore yenimam elai.”—Kosiom Isaia 52:11.

KORAI YENISIANA KOINERIKON KALUCE

13. Anyoin aingiseta nuipedori ijo aingit arai kiseu ijo ajalakin ainumunum apaarasia nukapolok?

13 Arai kiseu ijo ajalakin ainumunum apaarasia nuapolok, aticepak ejaunos ijo aingiseta nuipu. Kwape nat: Inyoin ibusakinit eong aswam arai kenyarautu eong ikapaup ainumunum Ebaga keda kes? Anyoika bo nuibusakinit eong aswam arai keinaki eong itunganan ainakinet naka Ebaga? Anyoika nuibusakit eong aswam arai ekoto yenikowaika eong ainumunum apaaran napolon? Eipone bo ani apedoria eong aingarakin idweka mam aipup erono naarai mam kesi inumumete apaaran napolon arai bo apaaran naka auriokec?

14, 15. Anyoika bo nuibuni ijo aswam arai kemunor ijo itunganan apaaran napolon naejok arai bo nat ijaiki ijo itunganan ainakinet?

14 Ejok aitosom aijen kakiro kere nuinera oni ka nuiswamai oni kotoma ojautene edio kere. Kwape aanyunet, arai kimala ijo itunganan ido komunor ijo apaaran napolon najokan, ipedori ijo atemar ebe, “eyalama.” Konye kojautene loekotor itungan ajenun nuipu, ipedori ijo aseun aitetemikin ngesi kanukinyo mam ijo inumunumia apaarasia nuapolok. Konye ekoto duc ijo araut loiyapepera, loicobe, ka loijaasi kayongit. Ebala Ebaibuli ebe: “Kinerananasi kere kasianut, kokonyite abalang, tetere ijenete kwape ibusakinitor  abongonokin nginitunganan.” (Ikolosain 4:6) Aticepak ipedori ijo aitetem ebe imina ijo ajaut nepepe kaitunga ka aikor ainanakineta konye mere apakio nuapolok.

15 Anyoika bo nuibusakinit ijo aswam arai kekoraki ijo itunganan ainakinet? Mam Ebaibuli ijaikinit oni akiro kere nuibusakinit oni aswam kotoma kanginijautene kere, konye elimokinit ngesi oni ebe ibusakinit ajaut kaomisio nuajokak. (1 Timoteo 1:18, 19) Aticepak itunganan yenijaikinit ijo ainakinet ngin mam ejeni ebe mam ijo inumunumi apaarasia nuapolok. Aticepak epedori itunganan ngin atemar ebe, “Ajeni eong ebe mam ijo inumunumei apaarasia nuapolok, konye akoto eong aijaikin ijo ainakinet na.” Kojautene kangon, ipedori ijo acamun aijaun ainakinet ngin arai bo nat ainger. Konye nuiseuni ijo aswam kere, ekoto ojalakinete ijo keda aomisio nukajokak. Mam oni ikoto aswam idiobore yenepedori amunaar eidicanewok keda Yawe.

IJO KA LUKOKALEKON

Iyalamasi itunga luijaanakinete Edeke Yawe

16. Anyoika nuibusakinit ijo aswam arai ekotosi lukokalekon ainumunum apaaran napolon?

16 Anyoika bo nuibusakinit ijo aswam arai ekotosi lukokalekon ainumunum apaaran nakapolon? Mam ejok ijo eikes. Ekoto ijo aiitun ebe, ejaasi kesi ka apedor naka aseun ibore yenekotosi kesi aswam. Ekoto ijo araut loisiana ido koyongite aseununetakec kwape ikotor ijo kesi ayongit aseununetakon. (Kosiom Matayo 7:12.) Konye arai ekotosi lukokalekon ijo ajaut keda kesi apaaran napolon, anyoika bo nuibusakinit ijo aswam? Eroko ijo eseuna nuiswama, kilip nejai Yawe kanu ngesi aingarakin ijo aiswamaun aseunet nakajokan. Koomoom nuikamunitos ejautene ngon, ido kiyatak aimo nuipu nuikamunitos akiro ngun. Kiitu ebe, ekoto ijo aswam nuisiyalamikinito Yawe duc.

17. Anyoika nuipedori ijo aswam kanu aingarakin idwekon ainyeikin aomom ebe etwakiaritos kesi iboro luipu arai inumunumete luce apaarasia nuapolok komam kesi?

 17 Anyoika bo nuipedori ijo aswam kanu aingarakin idwekon arai ekotokinos kesi ainumunum keda lucetunga apaarasia nuapolok? Ekoto ijo aiswamakin kesi iboro luajokak. Ipedori bobo ijo aijaikin kesi ainanakineta. Ido ainakinet naejok kakere ngesi akonipak ka aminakon.

KOMAENENEI KOTOMA ABEIT

18. Kanukinyo ibusakinitor oni ajaunun toma airiamununeta nuka Ikristayon?

18 Kanu oni aisiyalamikin Yawe, ekoto oni ajalakin ainumunum apaarasia nuapolok keda inonosio luka idiinin lukaisab. Konye ekoto oni amaenen kotoma abeit. Koipone bo ani? Eipone losodit ngesi ijo ajaunun toma airiamununeta nuka Ikristayon. (Kosiom Iburanian 10:24, 25.) Eraasi airiamununeta nuejokak noi kotoma aima nakabeit. (Isabulin 22:22; 122:1) Ipedori oni aisinyikonokin bonik nairiamunor nepepe.—Iromayon 1:12.

19. Kanukinyo eraatar nuepolok alimonokin luce akiro nuikamunitos abeit naidau ijo aisisiaun kotoma Obaibuli?

19 Eipone ece loipedoria oni aseun aima naka abeit nges alimonokin akiro nuidau ijo aisisiaun kotoma Obaibuli. Iyalongongoete itunga luipu kanuikamunitos iboro luarokok luetakanunete kwana kotoma akwap. (Esekiel 9:4) Aticepak ijeni ijo itunga lueomitos kwangin. Kolimok kesi akiro nuikamunitos amunokon. Naijaununor ijo toma airiamununeta keda alimonokin itunga abeit naejai Obaibuli, ibuni ijo ajaun keda eipud loajalakin ediini lokaisab ka ikenonosio. Ipedori ijo amunokin ebe idumuni aiyalama ido ebuni Yawe aisirereng ijo kanu aseun aima ngesi koipone kalo edolit.—Malaki 3:10.