1. Ingai bo kijaikinit oni aijar?

ERAI Yawe “Edeke lokajaran.” (Yeremia 10:10) Erai ngesi Lokasubaniwok, ido ejaiki ngesi oni aijar. Ebala Ebaibuli ebe: “Ibu ijo kosub iboro kere, Ijo kojaut, kesubio da kanuka akotekon.” (Apukokinio 4:11) Eebo, Ekotor Yawe oni aijar. Erai aijar ainakinet naketiai kanejai ngesi.—Kosiom Isabulin 36:9.

2. Eipone bo ani epedoria aijarawok araun naejok?

2 Kijaikinit oni Yawe iboro luipuda oni kanu aijar, kwape nat inyamat keda akipi. (Aswamisio 17:28) Konye ekoto ngesi oni ailel kotoma aijar. (Aswamisio 14:15-17) Kanu aijarawok ajokunar, ibusakinit oni arimaarit Edeke.—Isaia 48:17, 18.

EIPONE LOEPUPIO EDEKE KANUIKAMUNITOS AIJARAWOK

3. Anyoika nuabu Yawe kiswama neayaria Kain Abel?

3 Isisianakini Ebaibuli ebe aijarawok ka aijar naka luce erai naketiai kama ejai Yawe. Kwape aanyunet, neanyunyurar Kain—okoku loka Adam ka Keba—neajai onaceke lodidi Abel. Abu Yawe kikwenya Kain ebe ebusakinit ngesi acoit akenyunyura. Konye mam Kain abu kopupok, ido abu konyunyurikin kiton ‘aiyar Abel onaceke.’ (Ageun 4:3-8) Abu Yawe kitisila Kain kanu aiyar Abel. (Ageun 4:9-11) Erono anyunyura ka elait naarai eyangaunete amumu keda adedeng. Itunganan yenikoni nen mam edumuni aijar naikar kere. (Kosiom 1 Yokana 3:15.) Kanu aisiyalamikin Yawe, ibusakinit oni amina itunga kere.—1 Yokana 3:11, 12.

4. Anyoika bo nuisisiauni oni kokisil kalo abu Edeke ijaik idwe luko Isirael kanuikamunitos ainakinet naka aijar?

 4 Akaulo na ikar ilukumin luipu, abu Yawe kitodu ebe itopoloorit ngesi aijar nejaikinia ngesi Musa ikisila itomon. Ebala ediope kokisila kangul ebe: “Siriarenenei.” (Ikisila 5:17) Ido arai kepeleiki itunganan aiyar yenice, ngesi da eyario.

5. Eipone bo ani epupio Edeke kanuikamunitos aicik akoikes?

5 Eipone bo ani epupio Edeke kanuikamunitos aicik akoikes? Karaida aijar naka ikoku yeneroko euruna erai yeniketiai kama ejai Yawe. Kotoma okisil loejaikinit Yawe idwe luko Isirael, abu Yawe kotema ebe arai imusung itunganan aberu naepotiei kosodi kotwana ikekoku, ngesi da eyario. (Kosiom Anyoun 21:22, 23; Isabulin 127:3.) Isisianakini do ngin oni ebe erono aicik akoikes.—Koany Nuengesete 28.

6, 7. Eipone bo ani itodikinia oni Yawe ebe kiyait aijar kwape naketiai?

6 Eipone bo ani ipedoria oni aitodikin Yawe ebe kiyait oni aijarawok ka aijar naka luce kwape naketiai? Koipone lomam aswam idiobore kere yenepedori amunaar aijarawok arai aijar naka luce. Ngesi mam ekotor oni aimat esigala, etaba arai bo ejaaye ka aitosom ikee koipone loerono, naarai epedorete amunar aijarawok ka aiyar oni.

7 Ijaikinit oni Yawe aijarawok ka awatewok ido ibusakinit oni ayait kesi koipone kalo ekotor ngesi. Aso ibusakinit oni aidar awatewok ejok, ido arai mam oni iswamai ngun, iraun do oni lumam ilai kakonyen nuka Edeke. (Iromayon 6:19; 12:1; 2 Ikorinton 7:1) Mam oni ipedori aima Yawe, loijaikinit oni aijar, arai mam oni kiyait aijar kwape naketiai. Karaida etiono ajalakin  aswamisinei ngun nuarokok, ingarakini Yawe oni arai iyait oni aijar kwape naketiai.

8. Anyoika nuibusakinit oni aswam kanu ainac iboro luepedorete aimusung aijarawok ka aijar naka luce?

8 Kisisiau oni ebe erai aijar ainakinet naketiai kama ejai Edeke. Emunokina Yawe ebe ibuni oni aswam nuipedori kere ainac iboro luepedorete aimusung aijarawok arai bo aijar naka luce. Ipedori oni aswam ngun koipone loirengea oni emotoka, epikipik, arai aiteker egaali. Kinaci oni aboliasio nueroko ka nuejai amumu toma. (Isabulin 11:5) Ekoto bobo oni aswam nuipedori kere ayuwarit ireriawok. Abu Yawe kicorak idwe luka Isirael ebe: “Naidukio etogo lokitetet, idukokini arwatat nadidi airimor eswikon, kinyek aitebe aokot togokon, arai kibirun itunganan kangina.”—Ikisila 22:8.

9. Eipone bo ani ibusakinitor oni ayait itiang?

9 Karaida eipone loiyaitor oni itiang erai ibore yenepol kama ejai Yawe. Ecamakinit ngesi oni aiyar itiang kanu inyamat ka igoen, ido ecamakinit ngesi oni aiyar itiang yenelosikinit aimusung oni. (Ageun 3:21; 9:3; Anyoun 21:28) Konye mam oni ibusakinit aitisilarit itiang arai bo aiyar atai.—Awaragasia 12:10.

KOYAITE AOKOT KWAPE NUKALAUNAK

10. Eipone bo ani ijenia oni ebe ebwoikinitos aokot aijar?

10 Eraasi aokot nukalaunak kanejai Yawe naarai ebwoikinitos aokot aijar. Akaulo naaria Kain Abel, abu Yawe kolimok Kain: “Kamonyia eporoto loka aokot nuka onacekon kakwap.” (Ageun 4:10) Ebwoikinitos aokot nuka Abel aijarake, ido abu Yawe koleco Kain kanu aiyar Abel. Akaulo naka akalel kapaarasia  nuka Noa, Abu Yawe bobo kitodu ebe ebwoikinitos aokot aijar. Abu Yawe kocamak Noa ka ekaleke ainyam akiring. Abu kotema ebe: “Nginibore kere yenelosi yenejari kere eraun iyamatakus.” Konye, ajai ibore yenalimokinit kes Yawe mam ainyam: “Akiring naejai aijar tomake, kes akeokot, mam inyamenenete.”—Ageun 1:29; 9:3, 4.

11. Anyoin bo aicorakinet nabu Yawe koinak idwe luka Isirael kanuikamunitos aokot?

11 Nepetai ikar 800 akaulo nalimokinia Yawe Noa ebe mam ainyam aokot, abu ngesi koinak bobo itungake aicorakinet na: “Itunganan kere yenika ekek loka Isirael, arai yenika Imo luiboienenete kakes, yenemejai itiang arai akweny nuenyamio; ebukori ngesi aokotoke, enuki kalup.” Abu bobo ngesi kicorak ebe: “Sirinyamenete aokot.” (Ilebin 17:13, 14) Eroko Yawe ekoto itungake ayait aokot kwape ibore yenikalaunan. Ecamakinitai kesi ainyam akiring konye mere aokot. Arai kemejautu kesi etiang kanu ainyam, abeit kesi abukokin aokot kwap.

12. Eipone bo ani eyaitotor Ikristayon aokot?

12 Ketubor apak naedit akaulo natwania Yesu, apotu ikiyakia nepepe kimakio luka atukot naka Ikristayon luko Yerusalem kiriamunos aitutub ikisila luaroko iswamaete kotoma atukot. (Kosiom Aswamisio 15:28, 29; 21:25.) Abu Yawe kingarak kes amisiikin ebe keringa aokot eraasi nuketiai ido ebusakinit kes ayait aokot kwape ibore yenikalaunan. Mam Ikristayon lukolo sek anyamete ka aimat aokot arai bo akiring namam itiitai ejok. Arai kiswamata kesi ngun aputosi do ngin keda aima aputosia arai bo adoteu. Ageun kapaarasia kangun, angeroto Ikristayon lukabeit ainyam ka aimat  aokot. Do bo do kaparasia nu? Eroko Yawe ekoto oni ayait aijar kwape nakalaunan.

13. Kanukinyo mam ikristayon luka abeit ecamunitotor aiyat aokot?

13 Kitodunit kereka ngin ebe ibusakinit Ikristayon ainger aiyasio naka aokot? Eebo. Kicorakinit Yawe oni mam ainyam arai aimat aokot. Arai kelimoki ijo emuron loadekis mam aimat ajon, icumakini kereka ijo toma amooritokon? Mam! Kwape kwangin, apolou naicorakinet namam ainyam arai aimat aokot nges ebe mam oni icamuni aiyat aokot da.—Koany Nuengesete 29.

14, 15. Eipone bo ani eraar ibore yenepol kanu Ikristayon ayait aijar kwape ainakainet ka arimaar Yawe?

14 Do bo do arai elimoki ijo emuron ebe itwani ijo arai mam iyatakinio ijo aokot? Erai na aseunet naka nginidiopet kaoni arai arimaar ekisil loka Edeke kanuikamunitos aokot. Naarai eyaitos Ikristayon aijar kwape ainakinet naka Edeke, epedorete do kesi aimo amukian naingarakini kesi aijar; konye mam kesi cut ecamunete aiyat aokot.

15 Ekoto oni aswam kagogong aidar awatewok kongalete, konye naarai erai aijar naketiai kanejai Edeke, mam oni icamuni aiyasio aokot. Ejok arimaarit Yawe itia aimwang nges naarai ikoto oni aijar. Abala Yesu ebe: “Naarai ngin yenekoto aitajar akeijar etwaniari, ka yenetwaniari akeijar kanukang edumuni.” (Matayo 16:25) Ekoto oni arimaar Yawe naarai imina oni nges. Ejeni ngesi nuajokak kanuwok, ido iseseni oni aijar kwape naketiai ka nakalaunan kwape esesena Yawe.—Iburanian 11:6.

16. Kanukinyo erimaaritotor Ikristayon luka abeit Edeke?

16 Iketakina ejaanakinak luka Edeke arimaarit ekisil  ke loikamunit aokot. Mam kesi epote ainyam, aimat arai acamun aokot kanu akiro nuikamunitos amukian. * Konye ecamunete ejaanakinak luka Yawe amukian ace namam itosomai aokot kanu ayuun aijarakec. Ecamunitos kesi ebe Edeke Lokasuban aijar ka aokot ejeni nuejokuka noi nuepedorete aingarakin itunga aimedaun. Icamunit kereka ijo da ebe ejeni Edeke nuajokak kanuka itunga?

EIPONE EDIOPET BON LOECAMAKINITOR YAWE AITOSOM AOKOT

17. Ani bo eitosomae loka aokot loabu Yawe kocamak idwe luka Isirael?

17 Kotoma okisil loabu Edeke kijaik Musa, abu Yawe kolimok idwe luka Isirael ebe: “Naarai aijar naka akuan ejai toma aokot; ainak yes kotem alucio aijarakus: Naarai aokot kes elucete kanuka aijar.” (Ilebin 17:11) Nadiakarata idwe luka Isirael, apedorete do kesi ailip aitimio kama ejai Yawe koipone lo kes ainakin ibarasit ka ailip esasedoti abukokin aokot otem.

18. Inyo bo ipedori oni adumun kanuka atwanare naka Yesu oni?

18 Naabunio Yesu toma akwap, abu koburok ekisil loeinakinere itiang kwape alucet nainakinia ngesi akeijar araibo nat akeokot kanuka aisionio naka adiakanaretawok. (Matayo 20:28; Iburanian 10:1) Arai aijar naka Yesu naketiai noi kanuka ngun abu Yawe kitajaru ngesi alosit toma akuj tetere ijaikini itunga kere arereng naka aijar ikar kere.—Yokana 3:16; Iburanian 9:11, 12; 1 Petero 1:18, 19.

Epone bo ani itoduna ijo ebe iyait aijar ka aokot ejok?

19. Inyo ibusakinit oni aswam tetere “mam aokot nuka itunga kere kibeikinete”?

 19 Ekoto oni aisiyalamikin Yawe kanuka ainakinet naeumokina naka aijar! Ido ilimonokin oni itunga kiyuutu Yesu kanu aijar ikar kere. Ekoto oni aswam kagogong aisisianakin itunga epone lodumunete aijar naka ikar kere naarai imina oni kesi. (Esekiel 3:17-21) Kosodi, ekoto oni aputoor ekiyakia Paul, loabala ebe: “Mam akusiwokot kabeikinete eong, naarai mam abu kenac alimonokin yes ainerun kere naka Edeke.” (Aswamisio 20:26, 27) Eebo, kitoduni oni do ebe kisiyalamikinit oni noi ainakinet naka aijar kaokot arai kilimonokin oni luce nuikamunitos Yawe ka epone loitopolooritor ngesi aijar.

^ atu. 16 Kanu akiro nuipu nuikamunit aiyasio naka aokot, koany apapulai 77-79 loka aitabo “Keep Yourselves in God’s Love,” Loinomunitos Ajenak Luka Yawe.