Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Anyoika bo Nuisisianakini Oni Ebaibuli?

 ESULA LOITOMONET KADIOP

Kanukinyo Ejaar Aiticanitoi Naepol Noi?

Kanukinyo Ejaar Aiticanitoi Naepol Noi?

1, 2. Anyoin bo aingiset naetapit itunga luipu aingit?

AMUDIA ebulone ecaalo. Abu etunganan kimusung ka aiyar itunga luipu keda emudu kokanisa. Abu adeka na ekansa koar aberu naidwe ikany.

2 Naetakanuniata nuengeso arai bo atiokisio kwape kanu, ingitanakinos itunga luipu ebe, “Kanukinyo?” Etapit itunga luipu aingit ebe kanukinyo epolor angaranara ka aiticanitoi kotoma akwap. Ingisitor ijo da aingiset kwape kangin?

3, 4. (a) Anyoika bo aingiseta nuabu Kabakuk kingit? (b) Epone bo ani abu Yawe kobongokinia nges?

3 Kotoma Obaibuli, isisiauni oni ebe apotu itunga luapol aiyuun kingitingitata angiseta kwape kangun. Kwape aanyunet, abu enaabi Kabakuk kingit Yawe ebe: “Kanukinyo asesena aronis? Kanukinyo icamakinitor aridakinio? Kanukinyo ejaar eyarit ka amumu mama kang? Kanukinyo ejaar ecelet ka angolopa?”—Kabakuk 1:3, NW.

4 Kotoma Kabakuk 2:2, 3, isiomi oni nuabu Edeke kobongok Kabakuk ka aisumuneteke naka aitemokin ationis. Itejenunit Ebaibuli ebe emina Yawe itunga noi. Ebala Ebaibuli ebe: “Epod nges yes.” (1 Petero 5:7) Kabeit, elait Edeke asesen aiticanitoi adepar oni. (Isaia 55:8, 9) Aso ber kwana esisiautu nuipu nuikamunitos aingiset na, Kanukinyo ejaar aiticanitoi naepol toma akwap?

 KANUKINYO EJAAR AITICANITOI NAEPOL NOI?

5. Anyoika duc inerananasi esisianakinak luka idiinin kanuikamunitos aiticanitoi? Anyoika bo nuisisianakini Ebaibuli?

5 Inerananasi duc Ipasitan, Isasedotin ka esisianakinak luka ediini ebe aiticanitoi erai akote naka Edeke. Icetunga ebakasi ebe idiobore kere yenetakanikini itunganan aimoriarit atiokisio, erai naarai Edeke itemokinit ido mam oni ipedori amisiikin kanukinyo. Ebakasi ice ebe, etwakete itunga, aimoriarit idwe kanu alosit aiboi keda Edeke kotoma akuj. Konye mam ngun eraasi abeit. Mam Edeke Yawe eyangaununei iboro lueroko. Ebala Ebaibuli ebe: “Mam Edeke iswamai aronis.”—Yob 34:12.

6. Kanukinyo itoronitotor itunga luipu Edeke kanu aiticanitoi naejai toma akwap?

6 Itunga luipu itoronitos Edeke kanu aiticanitoi naejai akwap naarai eomitos kesi ebe Edeke erai epugan loka akwap. Konye Kosula lo 3, apotu oni kesisiautu ebe epugan loka akwap nges Satan.

7, 8. Kanukinyo ejaar aiticanitoi naepol noi toma akwap?

7 Elimokinit oni Ebaibuli ebe “iboiete da kwapin kere kotoma lokaronon.” (1 Yokana 5:19) Epugan loka akwap kana nges Satan, erai ngesi loerono ido kodedeng. Erai ngesi “ekengalaran loka akwapin kere.” (Apukokinio 12:9) Ipu itunga lueputooritos ngesi. Ido ngun nges epolor esabet, angaranara ka adedeng.

8 Ejaasi bobo iceboro lueyangaunitos aiticanitoi toma akwap. Akaulo namwangiata Adam ka Keba Edeke, apotu ikecedwe kirumutu adiakar. Ido kanuka adiakar, einakinitos icetunga luce aiticanitoi. Ekotosi kesi apolou adepar luce. Ejiosi, ido koridakinitos lucetunga. (Ekalimonokinan 4:1; 8:9) Acepakio edumununete  itunga aiticanitoi naarai “edoikini kes kere apak ka arereng [engeso].” (Ekalimonokinan 9:11) Naejaatar kesi aiboisit nakaronon kapak nakaronon, epedorete akangasia ka iboro luarokok atakanikin kesi.

9. Kanukinyo ijenia oni ebe ejaatar Yawe ka akiro nuajokak nuecamakinitor ngesi aiticanitoi atakanunun?

9 Mam Yawe eyangaununei aiticanitoi. Mam ibusakinit oni aitoron Edeke kanu ijiisinei, abilibilio naka ikisila ka aridakinio. Mam Edeke eyangaununei engeso kwape nat amaraneta naka akwap, ikwamin luekusete kagogong, arai ebulone. Konye ipedori ijo aomoom ebe, ‘Arai erai Yawe lokapedor kere, kanukinyo mam ngesi itanangia iboro luarokok atakanun?’ Ijeni oni ebe epodokinit Edeke oni noi, aso ejaatar ngesi keda akiro nuajokak nuecamakinitor ngesi aiticanitoi atakanunun.—1 Yokana 4:8.

AKIRO NUECAMAKINITOR EDEKE AITICANITOI

10. Eipone bo ani etepegia Satan Yawe?

10 Komanikor loka Eden, abu Ekejodijodon kingalak Adam ka Keba. Abu Satan kotema ebe erai Edeke epugan lokaronon. Abala ngesi ebe emikit Edeke Adam ka Keba iceboro luajokak. Akoto Satan kesi aiyuun ebe erai ngesi epugan loajokan adepar Yawe ido ebe mam bobo kesi epudasi Yawe.—Ageun 3:2-5; koany Nuengesete 27.

11. Anyoin bo aingiset naibuni oni abongokin?

11 Apotu Adam ka Keba kipaliikisi Yawe kosodete aimwang nges. Aomitos kesi ebe ajaasi kesi ka apedor naseun aswam nuejok ka nueroko. Eipone bo ani ti epedoria Yawe aitodun ebe ikamwangak ngul kes eroko ido ebe ngesi bon ejeni akiro nuajokak kanuwok?

12, 13. (a) Kanukinyo mam Yawe abu korasakina amudiar ikamwangak ngun? (b) Kanukinyo acamakinia Yawe Satan aipuga akwap ka acamakin itunga aipugaikin bonik?

 12 Mam Yawe abu korasak amudiar Adam ka Keba. Konye, abu ngesi kojalak Adam ka Keba aur idwe. Kosodi aijaikin idwe luka Adam ka Keba arereng naseun epuganikec. Arai alosokinet naka Yawe ebe kilelebata ikadolitok akwap, ido ebeit ngun aitodolikin karaida etamit Satan aitolitol.—Ageun 1:28; Isaia 55:10, 11.

13 Abu Satan kitepeg Yawe kosesenete imilionin luka imalaikan. (Yob 38:7; Daniel 7:10) Aso abu Yawe kijaik Satan apak kanu aitodun ebe mam nuenera ngesi araasi abeit. Abu bobo ngesi ijaik itunga apak na asipokin akecepugan kingarenikinite kesi Satan kanu aitodun ebe mam kesi epedorete aswam ejok arai emamei aingarakinio naka Edeke.

14. Anyoika etodolikinos naarai acamaki Edeke apak naepol noi atubor?

14 Ikar ilukumin luipu luatuboros, atamata itunga aipugaikin bonik, konye mam epedoritos. Etodu kwana ngin Satan kwape ekengalan. Ipudas itunga aingarenikinio naka Edeke. Adolit enabi Yeremia nabalar ngesi ebe: “Wu EJAKAIT, ajeni ebe erot loka itunganan emamei kotomake ilopet: Emamei kotoma otunganan yenelosi aitetenar akekeje.”—Yeremia 10:23.

KANUKINYO ATITINGIKINIA YAWE APAK NAEPOL NOI?

15, 16. (a) Kanukinyo acamakina Yawe aiticanitoi ajaun adaun apak naepol noi? (b) Kanukinyo mam Yawe itemokinia ber atiokisio nuayangau Satan?

15 Kanukinyo acamakinia Yawe aiticanitoi ajaun adaun apak naepol noi? Kanukinyo mam nges itanangia  iboro luarokok atakanunun? Apak natubor etodu ebe mam Satan epedorit aipuga. Atamakisi itunga iponesio luipu luepugae, konye mam kesi epedoritos aipuga ejok. Karaida iyatakina aijen kotoma esayanis ka etatai, eroko amamus etube, ka ibakor, abilibilio naka ikisila, ka ejie iyatasi. Mam oni ipedori aipugaikin bonik komamei aingarakinio naka Edeke.

16 Konye, mam ber Yawe itemokinit atiokisio nueyangaunit Satan. Korai kiswamaunite ngesi ngun, ti ngin itodu ebe igangit ngesi eipugae loka Satan, ido mam Yawe igangi aronis. Ijaikini bobo ngin itunga awomit ebe epedorete kesi aipugaikin bonik. Konye erai ngin aisab ido mam Yawe igangit aisab ngin. Mam ngesi ingalai.—Iburanian 6:18.

17, 18. Inyoin bo ebuni Yawe aswam kanuikamunitos atiokisio nueyangaunit Satan?

17 Epedori kereka Yawe aitemokin atiokisio kere nueyangaunit emwangit loka Satan ka itunga? Eebo.Epedoros iboro kere kama ejai Edeke. Ejeni Yawe apak naebongokinia ngesi aingal kere naka Satan. Kosodi aitaraun akwap paradais, kwape ajaar alosikineteke kageunet. Itajarunio “itunga kere luejaas toma atesin.” (Yokana 5:28, 29) Mam bobo itunga edekanakinos karaida atwakare. Ebuni Yesu alemar atiokisio kere nueyangaunit Satan. Ebuni Yawe aitosom Yesu kanu ‘amudiar aswamisio nuka Satan.’ (1 Yokana 3:8) Esiyalamikisi do oni Yawe kwape kwana kanu atitingikinike naarai engaraki oni aisisiaun nuikamunitos ngesi keda aseun nges kwape epuganiwok. (Kosiom 2 Petero 3:9, 10.) Karaida iticanitoi oni, epedori ngesi aigarakin oni atitingikin.—Yokana 4:23; kosiom 1 Ikorinton 10:13.

 18 Mam Yawe ebuikinit oni aseun nges kwape epuganiwok. Abu ngesi kijaik itunga ainakinet naka ailajara aseun aswam nuekotosi. Esisiauta ber nuikamunitos ajokis naka ainakinet kangin.

EIPONE BO ANI EBEITOR IJO AITOSOM AILAJAARA NAKA ASEUN?

19. Anyoin ainakinet naumokina naejaik Yawe oni? Kanukinyo ibusakinitor oni aisiyalamikin ainakinet ngin?

19 Ainakinet naka Yawe naeumokina nges etiakunit oni kanejaasi itiang. Itosomaete itiang acoa naesubunitere, konye oni ipedori aseun nuiswama kotoma aijarawok ka aseun aijaanakin Yawe. (Awaragasia 30:24) Mam bobo oni kisubunitai bala acuman nuiswamaete aswam naitemokinitai kes. Kijaa oni keda ailajaara naka aswam aseununeta nuibusakinito kotoma aijarawok, itunga luikoto oni araut ipaperowok, ka nuikoto oni aswam. Ekoto Yawe oni aijar keyalamasi.

20, 21. Anyoin aseunet naejok kakere naipedori ijo aseun kwape kwana?

20 Ekoto Yawe oni amin nges. (Matayo 22:37, 38) Eputosi Yawe keda papa loiyalama apupun ikekoku ebala ebe “Amina eong ijo” kolomunite kotauke konye mere naarai ebuikinitai. Kijaikinit Yawe oni ailajaara naka aseun aijaanakin ngesi arai mam. Apotu Satan, Adam ka Keba koseutu aimwang Yawe. Eipone bo ani ebeitor ijo aitosom akoninakinet naka ailajara aseun nuikoto ijo aswam?

21 Kitosom ailajarakon aijaanakina Yawe. Imilionin luka itunga aseutu aisiyalamikin Edeke kosodete ainger Satan. (Awaragasia 27:11) Anyoika nuibusakinit ijo aswam kwape kwana tetere ijo ijaun akwap nakitetet naelemaria Edeke aiticanitoi kere? Ebuni esula loetupakini abongokin aigiset ngin.