Kosomar nuejaas toma

Skip to table of contents

Ajenak Luka Yawe

Koseu Angajep Ateso

 ESULA LOSODIT

Ingai do Edeke?

Ingai do Edeke?

1, 2. Anyoika bo aingiseta nuetapit itunga aingitingit?

INGISINGISETE idwe aingiseta nuipu. Ipedori ijo aitam aitetemikin kesi, konye ingisete kesi ijo ‘Kanukinyo?’ Ido arai kitam ijo abongokin kesi ingisete bobo kesi ijo ‘Konye kanukinyo?’

2 Itunga kere, luapolok ka ludidik ejaatar kaingiseta. Ipedori oni aingit aingiseta nuikamunitos inyamat luebeit oni ainyam, inapenewok, arai bo iboro luebeit oni agwel. Aticepak ijaatar oni kaingiseta nuepolok nuikamunitos aijar keda akiro nukoingaren. Konye arai mam oni idumuni abongonokineta nuisimonikinete, epedori ngin ainakin oni apalar aimo abongonokineta.

3. Kanukinyo eomitotor itunga ebe mam kesi epedorete adumun abongonokineta nukaingiseta nuepolok?

3 Ejaatar kereka Ebaibuli keda abongonokineta nukaingiseta nuepolok? Eebo ecamunitos icetunga kwangin, konye eomitos kesi ebe etiono amisiikin Ebaibuli. Eomitos ice ebe esisianakinak luka idiinin arai bo isasedotin bon ejenete abongonokineta. Itunga icie irumitos ileic acamun ebe mam kesi ejenete abongonokineta. Iwomit ijo biai?

4, 5. Anyoika aingiseta nuepolok nuipedori ijo aingitakin? Kanukinyo ibusakinitor ijo ainyikokin aimo abongonokineta kec?

4 Aticepak ikoto ijo ajenun abongonokineta nukaingiseta kwape nat: Kanukinyo ajaar eong toma akwap? Anyoika etakanikinete eong katwana? Inyoika bo iponesio luka Edeke? Abala Yesu Ekesisianakinan loejenara ebe: “Kilipa, kiinakinio; Komoata, idumunete; Kikungukungoto,  kingaikinio.” (Matayo 7:7) Sirikipala kitoni neidumunia ijo abongonokineta.

5 Eebo, arai ’inyikok ijo aimo,’ idumuni ijo abongonokineta Obaibuli. (Awaragasia 2:1-5) Mam etiono amisiikin abongonokineta nuka Ebaibuli. Epote nuisisiauni ijo aijaikin ijo aiyalama kwape kwana keda amuno najokan koingaren. Ketetemoto ber oni nuikamunitos aingiset naetapas itunga luipu.

EPODOKINIT KEREKA EDEKE NUIKAMUNITOS ONI ARAI BO EYANGAUNUNEI AITICANITOI?

6. Kanukinyo eomitotor icetunga ebe mam Edeke epodokinit nukamunitos aiticanitoikec?

6 Eomitos itunga luipu ebe mam Edeke epodokinit oni. Eomitosi kesi ebe korai Edeke opodokinite ti akwap na erai naejok. Kisesen oni akwap ileleba ijiisinei, edinget ka aiticanitoi. Edekanakinos itunga, iticanitos, etwakete da. Eomitos icetunga ebe, ‘Korai opodokinete Edeke oni, mam ti kereka ngesi itanang aiticanitoi?’

7. (a) Eipone bo ani ejaikinata engarenok luka idiinin itunga aomoom ebe Edeke nges einakinit itunga aiticanitoi? (b) Kanukinyo mam ibusakinitor oni aitoron Edeke kanu iboro lukaronok luiswamasi?

7 Ejaikisi engarenok luka idiinin itunga aomit ebe Edeke ngesi einakinit itunga aiticanitoi. Netakanuniata nueroko, ebakasi kesi ebe erai akote naka Edeke. Itoronitos kwana kesi Edeke. Konye isisianakini Ebaibuli ebe mam Edeke erai alibunet naka nukarokok. Isisianakini Ebaibuli kotoma oitabo loka Yakob 1:13 ebe: “Kinyek yenecodunio einer ebe, ‘Edeke kacoduni eong;’ naarai mam epedori Edeke acodunio kanukaronok, ido nges elopet mam ecoduni itunganan kere.” Akepolou ebe araida mam Edeke itanangit iboro lukarokok, mam cut erai  ngesi eyangaununei. (Kosiom Yob 34:10-12.) Aanyutu ber oni aanyunet.

8, 9. Kanukinyo eroniar oni aitoronit Edeke kanu atiokisiowok? Kijaik aanyunet.

8 Koomoom ber ijo nuikamunitos esapat loiboiete keda auriakake. Emina papake esapat lo noi ido abu isisianak nges aseun luejok ka nueroko. Akaulo, koseuni esapat lo aipalikin papake kosodi anyoun ore. Kedolo ngesi ngina kogeuni aswam iboro luerok kosodi adumun ationis. Ipedori kereka ijo aitoron papake kanu akiro nuatakanutu, naarai abu kocamak okooke anyoun ore? Mam! (Luka 15:11-13) Kwape kwangin, mam Edeke itikokinit itunga aswam nuarokok. Konye netakanuniata nueroko kiitu ebe mam erai Edeke eyangaunit. Mam ejok aitoronit Edeke.

9 Ejaasi akiro nuajokak nuecamakinitor Edeke iboro luarokok atakanunun. Kosula 11, ibuni ijo aanyun nuisisianakini Ebaibuli nuikamunitos akiro ngun. Konye, kojen ebe emina Edeke oni noi ido mam ekoto oni aitoronit nges kanu atiokisiowok. Kabeit, Edeke bon epedori aingarakin oni kotoma atiokisiowok.—Isaia 33:2.

10. Kanukinyo ipedoria oni amunokin ebe ebuni Edeke aitanang iboro luarokok lueswamata itunga?

10 Erai Edeke lokalaunan. (Isaia 6:3) Nginibore kere yeniswamai Edeke edolit ido ejokuna. Ipedori oni amunokin ngesi bon. Mam itunga ikote nen. Acepakio iswamaete iboro luarokok, ido emamei adiopugan naepedori alemar iboro luarokok. Emamei yenejaatar kapedor naeriakasi ka naka Edeke. Epedori Edeke ido ebeit ngesi alemar katipet iboro luarokok lueswamata itunga. Elemari ngesi aronis ikar kere.—Kosiom Isabulin 37:9-11.

 EIPONE BO ANI EPUPIO EDEKE NEJAATAR ITUNGA TOMA AITICANITOI?

11. Epone bo ani epupio Edeke kanu aiticanitoi kon?

11 Eipone bo ani epupio Edeke kanu iboro luiswamasi kotoma akwap ka luidoinikinete oni? Isisianakini Ebaibuli ebe “emina EJAKAIT etube.” (Isabulin 37:28) Kanuka ngun epodokinit Edeke noi nuikamunitos nuajokak ka nuarokok. Elait ngesi asesen itunga naejataar toma aiticanitoi. Isisianakini Ebaibuli ebe ‘kokadak Edeke kotauke’ neanyunia aronis epol kotoma akwap. (Ageun 6:5, 6) Mam Edeke ijulakina. (Malaki 3:6) Isisianakini Ebaibuli ebe epodokinit Edeke ijo.—Kosiom 1 Petero 5:7.

Isisianakini Ebaibuli ebe erai Yawe Lokasuban akuj ka akwap

12, 13. (a) Kanukinyo ijaatar oni kede amina ido apodokinitos lucetunga, ido eipone bo ani ipupio ijo kanuka aiticanitoi naejai toma akwap? (b) Kanukinyo ipedoria oni amunokin ebe ebeit Edeke aitanang amamus etube lokabeit keda aiticanitoi?

12 Isisianakini Ebaibuli ebe kosub Edeke etunganan kotoma aputoke. (Ageun 1:26) Akepolou ebe esubit Edeke oni keda iponesio luajokak lueputosi keda luke. Arai ipupi ijo erono asesen itunga iticanitos, epupi Edeke erono noi adepar ijo! Eipone bo ani ipedoria oni ajenun ngun?

13 Isisianakini Ebaibuli oni ebe “erai Edeke amin.” (1 Yokana 4:8) Amin nges ingarenikinit anginibore kere yeniswamai Edeke. Ijaatar oni ka amin naarai erai Edeke loemina. Korai kojaatar ijo kapedor, ti kereka ijo itanang amamus etube lokabeit kotoma akwap? Eebo, naarai imina ijo itunga. Ido bo do Edeke, Inyoin bo ebuni ngesi aswam? Kojenu na ebe, ebuni Edeke aitodolikin aisumuneta kere nuiwadikatai kageunet naka eitabo kalo. Konye kanu oni aibwaikin amuno toma aisumuneta ngun, ibusakinit ijo aisisiaun nuipu nuikamunitos Edeke.

 EKOTO EDEKE IJO AJENUN NGES

Arai ikoto ijo araun epapero loka itunganan, ilimokini ijo nges ekonikiror. Etijeniki Edeke oni ekekiror kitosomai Ebaibuli

14. Ingai bo ekiror loka Edeke, ido eipone bo ani ijenuna oni ebe ibusakinit aitosom ekekiror?

14 Arai ikoto ijo araun epapero loka itunganan, inyoin ibore yenisodit ilimokini ijo nges? Ekonikiror. Ejaatar kereka Edeke ka ekiror? Idiinin luipu enyaritos ngesi Edeke arai bo Ejakait, konye mam lu eraasi ikiroria. Eraasi lu adoketa kwape nat “ekabaka” arai “epuresident.” Elimokinit oni Edeke ebe ekekiror nges Yawe. Ebalas Isabulin 83:18 ebe: “Tetere ejenunete ebe ijo bon, Loerai ekonikiror Yawe, irai Loijai kuju kakuj koyaite akwap kere.” Itosomatos ikewadikak Ebaibuli ekiror loka Edeke irwan ilukumin luipu kotoma Obaibuli. Ekoto Yawe ijo ajenun ekekiror ka aitosom da. Etijenu Edeke ekekiror kanu ijo araun opaperoke.

15. Anyoin apolou naka ekiror Yawe?

15 Ekiror Edeke, Yawe, ejaasi keda apolou. Apolouke ebe epedori Edeke aitodolikin aisumunetake ka alosikineta nuejaatar ngesi. Emamei ibore yenepedori aitikokin nges. Ekiror ngon Yawe erai loebeit Edeke bon. *

16, 17. Anyoin apolou (a) “Lokapedor kere”? (b) “Ekabaka loka ikar”? (c) “Lokasuban”?

 16 Kwape isiomitor oni koitabo loka Isabulin 83:18 nuikamunitos Yawe ebe: ‘Ijo bon Loijai kuju kakuj.’ Ebala Apukokinio 15:3 ebe: “Epolok aswamisiokon, ido nukaumokin da, Wu Ejakait Edeke Lokapedor kere!” Anyoin apolou naka adoketait “Lokapedor kere”? Akepolou ebe emamei idiotunganan yenejaatar kapedor adepar Yawe. Kotoma 1 Timoteo 1:17 enyaritai bobo  nges “Ekabaka loka ikar.” Apolou naka adoketait “Ekabaka loka ikar” erai ebe Yawe bon ejaenena ikar kere. Itetemitos Isabulin 90:2 ebe ejaenena ngesi ikar ka ikar. Mam kereka ngun eraasi nukaumokin?

17 Edeke Yawe bon nges erai Lokasuban. Ebala Apukokinio 4:11 ebe: “Ibusakinit ijo, Ejakaitikosi ka Edekekosi da, Adumun aibuses, ka ayongio, ka apedor, naarai, ibu ijo kosub iboro kere, ijo kojaut, kesubio da kanuka akotekon.” Eebo, ageun kanejaasi imalaikan, aacer, araito ka agaria nuejaasi angololin—Yawe nges esubit kere!

IPEDORI KEREKA IJO ARAUN EPAPERO LOKA YAWE?

18. Kanukinyo eomitotor icetunga ebe mam kesi epedorete araun ipapero luka Edeke? Anyoika bo cut nuisisianakini Ebaibuli?

18 Naesiomiata icetunga nuikamunitos iponesio  luka Yawe luitegelikina kwape nat erai ngesi Lokapedor kere ido ikiara akedoketait, ejaiki kes aingitakin ebe, ‘kanukinyo epodokinitor Edeke nuikamunitos eong?’ Konye kereka erai epone ngon ekotor Edeke oni aomit? Mam cut. Ekoto Yawe epaperone keda oni. Isisianakini Ebaibuli ebe mam Edeke “elwana kanejai nginidiopet kaoni.” (Aswamisio 17:27) Ekoto Edeke ijo aikunyakin nejai ngesi ido isumunit Edeke ebe “ikunyuni mama ijaasi.”—Yakob 4:8.

19. (a) Epone ani ipedoria ijo araun epapero loka Edeke? (b) Inyoika bo iponesio luka Edeke luiminakinitos ijo noi?

19 Epone bo ani ipedoria ijo araun epapero loka Edeke? Ebala Yesu ebe: “Aijar namam edaun ngesi na ebe, kojenutu jo Edeke ediopet lokabeit ka Yesu Kristo lokijukuni.” (Yokana 17:3) Arai kinyikok ijo aisisia, ibuni ijo ajenun nuipu nuikamunitos Yawe keda Yesu. Kosodi koingaren idumuni aijar namam edaun. Kwape aanyunet, kidau oni aisisiaun ebe “erai Edeke amin.” (1 Yokana 4:8, 16) Konye ejaatar ngesi keda iponesio ice luajokak. Isisianakini Ebaibuli ebe erai Yawe “Edeke loileleba aitim loesiana, loiyapi anyunyurikin, loepol aitim ka abeit.” (Anyoun 34:6) Erai Yawe ‘loejok ido ekapakina aitim.’ (Isabulin 86:5) Etitingikinit Edeke ido erai lomunot. (2 Petero 3:9; 1 Ikorinton 1:9) Ibuni ijo aisisiaun nuipu nuikamunitos iponesio ngul neinyikokinia ijo aisiom Ebaibuli.

20-22. (a) Eipone bo ani ipedoria ijo aikunyakin nejai Edeke karaida mam ijo ipedori aanyun ngesi? (b) Anyoika bo nuibusakinit ijo aswam arai etamata icetunga aisimik ijo aisisia Ebaibuli?

20 Eipone bo ani ipedoria ijo aikunyakin nejai Edeke karaida mam ijo ipedori aanyun nges? (Yokana 1: 18; 4:24; 1 Timoteo 1:17) Neisiomia ijo nuikamunitos Yawe kotoma Obaibuli, ijaikini ngin ijo ajenun nges ejok. (Isabulin 27:4; Iromayon 1:20) Naiyatakinia ijo aisisiaun nuipu nuikamunitos Yawe, ebuni aminakon aiyatakin.

Emina papa ikedwe, konye emina oni Papawok loka okuju adepar

21 Ibuni ijo ajenun ebe erai Yawe papawok. (Matayo 6:9) Naarai ngesi ijaikinit oni aijar, ido ekoto ngesi oni adumun aijar naejok. Ngun nges ekoto Papa loemina kanu ikedwe. (Isabulin 36:9) Eebo, isisianakini Ebaibuli ebe ipedori ijo araun epapero loka Yawe. (Yakob 2:23) Koomoom ber ijo. Ekoto Edeke Yawe Lokasuban akuj kakwap ijo araun opaperoke!

22 Ekotokinos icetunga ijo ajalakin aisisia Ebaibuli. Eomitos kesi ebe aticepak ibuni ijo aijulakin ediinikon. Konye sirikicamak idiotunganan aisiimik ijo araun epapero loka Yawe. Yawe bon nges Epapero lokajokan kakere.

23, 24. (a) Kanukinyo ibusakinitor ijo ainyikokin aingitingit aingiseta? (b) Anyoika bo nuibuni oni aisisiaun kosula kalo etupakini?

23 Neisisia ijo Ebaibuli, aticepak ejaunos akiro ace numam ijo ipedori amisiikin. Sirikiruma ileic aingit aingiset. Abu Yesu kotema ebe ibusakinit oni araut luitasono, kwape idwe. (Matayo 18:2-4) Ido ingisingisete idwe aingiseta nuipu. Ekoto Edeke ijo adumun abongonokineta. Kanu kangun, kinyikok aisisia Ebaibuli tetere ijo isisiauni abeit.—Kosiom Aswamisio 17:11.

24 Epone loitelekarit kakere kanu ajenun Yawe nges aisisia Ebaibuli. Kosula loetupakini, ibuni oni aisisaun eipone loerar Ebaibuli eitabo loitegelikina kanejaas icetabon.

^ atu. 15 Arai emameotor Ebaibuli kon ka ekiror ngon Yawe arai bo ipuda ijo ajenun nuipu nuikamunitos apolou ka eipone loelimunere ekiror ngon, kilipit koany Nuengesete 1.