Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Anyoika bo Nuisisianakini Oni Ebaibuli?

 ESULA LOITOMONET

Abeit Naikamunit Imalaikan

Abeit Naikamunit Imalaikan

1. Kanukinyo kisisia oni nuikamunitos imalaikan?

EKOTO Yawe oni ajenun ekekale lokokuju. Eraas imalaikan lukokale loka Edeke. Enyarit Ebaibuli kes “idwe . . . luka Edeke.” (Yob 38:7) Anyoin aswam naka imalaikan? Eipone bo ani engaranakiniata kesi itunga kapakio nukolo? Ido epedorete kereka kesi aingarakin oni lolo?—Koany Nuengesete 8.

2. Ai bo aponiata imalaikan? Imwaasi ai imalaikan esubutai?

2 Ibusakinit oni ajenun neaponiata imalaikan. Elimokinitos oni Ikolosain 1:16 ebe Yesu ber egeit Yawe aisub kotupakinete konyet “iboro kere luejaas toma akuj ka luejaas toma akwap.” Imoriaritos ngun imalaikan. Imalaikan imwaasi ai esubunitai? Ebala Ebaibuli ebe ejaasi akwat nuka imilionin luka imalaikan.—Isabulin 103:20; Apukokinio 5:11.

3. Anyoika bo nuelimokinit oni Yob 38:4-7 nuikamunitos imalaikan?

3 Isisianakini bobo Ebaibuli ebe egeunit Edeke aisub imalaikan eroko ngesi esuba akwap. Eipone bo ani apotu imalaikan opupuniata naenyuniata kesi akwap? Elimokinit oni eitabo loka Yob ebe apotu imalaikan iyalamikinos. Araasi kesi ekale loejaanakinete Yawe nepepe.—Yob 38:4-7.

INGARAKINITOS IMALAIKAN ITUNGA LUKA EDEKE

4. Eipone bo ani ijenunia oni ebe epodokinitos imalaikan itunga?

4 Eraasi imalaikan luduc epodokinitos itunga ka alosikinet naka Yawe kanuka akwap ka itunga. (Awaragasia  8:30, 31; 1 Petero 1:11, 12) Abu kokadak kesi nepalikiniata Adam ka Keba Edeke. Mam kesi iyalamasi asesen itunga emwangitos Yawe lolo. Konye arai kitoronikin itunganan kosodi aibelokin abongun nejai Edeke, epol aiyalama kanejasi imalaikan. (Luka 15:10) Epodokinitos imalaikan itunga luijaanakinete Edeke. Itosomai Yawe imalaikan kanu aingarakin ka ayuwar ikejaanakinakake  kotoma akwap. (Iburanian 1:7, 14) Kaanyutu ber oni ace aanyununeta.

“Abu Ekadeke kijuk ekemalaika, kitubuta aituke nuka ingatunyo.”—Daniel 6:22

5. Eipone bo ani engaranakiniata imalaikan ejaanakinak luka Edeke kapakio nukolo sek?

5 Abu Yawe kijuk imalaikan iaarei aitukuu Lot keda ekekale kotoma amudiario naka Sodom ka Gomora. (Ageun 19:15, 16) Ketuboros Ikar akwatat, aponi kocakakinai enabi Daniel aipany naka ingatunyo, konye mam ngesi aponi kimusungi naarai ‘abu Edeke kijuk ekemalaika, kitubuta aituke nuka ingatunyo.’ (Daniel 6:22) Neajaar ekiyakia Petero aidaris, abu Yawe kijuk emalaika alakun nges. (Aswamisio 12:6-11) Apotu imalaikan kingarakis Yesu. Kwape aanyunet, akaulo naka aibatisaoke, ‘apotu imalaikan kijaanakisi nges.’ (Marako 1:13) Eroko kibubukina Yesu, abu emalaika “kitogogong nges.”—Luka 22:43.

6. (a) Eipone bo ani ijenunia oni ebe ingarakinitos imalaikan itunga luka Edeke lolo? (b) Anyoika aingiseta nuebeit oni abongonokin kwape kwana?

6 Kapaarasiawok, mam imalaikan itaanyinikinos itunga. Konye eroko Yawe itosomai imalaikan kanu aingarakinit ikejaanakinakake. Isisianakini Ebaibuli ebe: “Idukuri emalaika loka EJAKAIT alukun ngul lueyongito nges, eyuuni da kes.” (Isabulin 34:7) Kanukinyo ipudar oni ayuwario? Naarai kijai oni kalukasurup luekotosi aimusung oni. Lubo angai kesi? Ai bo aponiata kesi? Eipone bo ani etamitotor kesi aimusung oni? Kanu abongokin aingiseta ngun, kaanyutu ber nuapotu kotakanutu akaulo nasubere Adam ka Keba.

LUKASURUPIWOK LUMAM ETAKANETE

7. Inyo eswamata itunga kanuka aingal naka Satan?

7 Apotu oni kesisiutu Kosula lo 3 ebe abu emalaika  komwang Edeke kosodi akotokin aipuga luce. Enyarit ngesi Ebaibuli Satan Ekejodijodon. (Apukokinio 12:9) Akoto Satan itunga aipalikin Edeke. Abu ngesi kingalak Keba, ido eroko ngesi ingalai itunga luipu. Konye, apotu icetunga kwape nat Abel, Enok ka Noa kosalakisi emunokina nejai Yawe.—Iburanian 11:4, 5, 7.

8. (a) Eipone bo ani kejulakinotor icemalaikan araun ajokin? (b) Anyoika nuapotu ajokin kiswamata kanu aikuu akalel?

8 Kapaarasia nuka Noa, apotu imalaikan ice komwangata Edeke kosodete ajalakin ere kec lokokuju kopote aijar kokwap kwape itunga. Kanukinyo? Elimokinit oni Ebaibuli ebe akotosi kesi angor. (Kosiom Ageun 6:2.) Konye arai ibore yenerono imalaikan aswam ngun. (Yuda 6) Kwape imalaikan kangun, apotu itunga kaparasia kangun koraunos lueroko ido komumu. Abu do Yawe koseu amudiar itunga luarokok kitosomai akalel. Konye abu ngesi koyuwa ikejaanakinakake lumunon. (Ageun 7:17, 23) Kanu aiku, apotu imalaikan luarokok kobongosi kuju, enyarit Ebaibuli kes ajokin. Apotu kesi koseutu atupar emwangit loka Satan, ido abu Ekejodijodon koraun epuganikec.—Matayo 9:34

9. (a) Anyoika nuapotu kotakanikis ajokin neabongoriatar kesi kuju? (b) Anyoika nuibuni oni aisisiaun?

9 Naarai apotu ajokin komwangata Yawe, mam nges abu kocamak kes alosit aimorikikin ka ekaleke kokuju. (2 Petero 2:4) Mam ajokin epedoritos aijulanakin bobo bala itunga, konye eroko kesi ‘ingalaanarete akwapin.’ (Apukokinio 12:9; 1 Yokana 5:19) Kesisiautu ber oni eipone loepedoritotor kesi aingalaanar itunga luipu.—Kosiom 2 Ikorinton 2:11.

 EIPONE LOINGALINGALIATA AJOKIN ITUNGA

10. Eipone bo ani ingalingalata ajokin itunga?

10 Ingalingalete ajokin itunga koponesio luipu. Neineratar itunga keda ajokin epeleikinete kesi adolokin ajokin arai bo epedorete kesi aitosom itunganan ice, kwape nat emuron loatagoro. Arucokina keda ajokin enyaritai ngin ecudet. Konye kicorakinit oni Ebaibuli aisac idiobore kere yenikamanara keda ajokin. (Igalatian 5:19-21) Kanukinyo? Kwape itosoma amejan amutego, itosomaete ajokin aisab kanu alokunia ka aikamunia itunga.—Koany Nuengeste 26.

11. Anyoin aidwar, ido kanukinyo ibusakinitor oni aisac?

11 Ediopet koponesio kalu nges aidwar. Erai na aitam ajenun akiro nukoingaren araibo ibore yenimam ejena. Epedori itunganan aswam ngun itosomai aacer, aanyununeta, akaadin luedwarere, airo alabira, arai bo airere akanin. Eomitos itunga luipu ebe mam aswamisio ngun eraasi nuarokok, konye eroko iboro lu. Kwape aanyunet, itodikinit oni Ebaibuli ebe iswamanara ajokin nepepe kadwarak. Kotoma Aswamisio 16:16-18 isiomi oni akiro nuikamunitos “ajokit naka aidwar” nainakinit apese “aidwar.” Akaulo naerengiara ekiyakia Paul ajokit ngin, abu apese ngin kotwania akepedor naka aidwar.

12. (a) Kanukinyo eroniar oni aitam einer keda lukatwak? (b) Kanukinyo mam ibusakinitor ikejaanakinak luka Edeke aimorikikin toma ononosio luka ajokin?

12 Ejai bobo eipone ece loitosomaete ajokin kanu aingalingalia itunga. Ekotosi ajokin oni aiyuun ebe ipedori oni einer keda lukatwak ido ebe ejarete lukatwak kopedoritos einer kaoni. Kwape aanyunet, epedorete  icetunga luetwakiaritos luminanakec alosit nejaasi imurok, luebakasi ebe epedorete kesi einer kalukatwak. Epedori emuron alimokin ngesi akiro nuajokak nuikamanara keda yenikatwan ido koputorite ekeporoto. (1 Samuel 28:3-19) Icenonosio lukaida lukatwak esipokina bobo toma aisisianakin na ebala ebe ejarete lukatwak. Imoriaritos ngun asuban, eipudone, araibo aiwalanakin kinga. Arai kengeroto ikristayon aswam inonosio ngun, ereunete, ido emoromoroete da kesi ipajan, ipapero, ka itunga luka atutubet. Konye ejenete ikristayon lukabeit ebe mam ikatwak ejarete kanenice. Mam oni ipedori einer kakesi, ido mam kesi epedorete aimusung oni. (Isabulin 115:17) Kacoitos noi. Sirikitamak einer kalukatwak arai bo ajokin ido sirikimorikikin keda aswamisio nuka ajokin.—Kosiom Ikisila 18:10, 11; Isaia 8:19.

13. Inyoin bo apedosi itunga lulem etukurianitos ajokin aswam?

13 Mam erai ebe ingalingalete ajokin itunga bon konye itukurianete bobo kesi itunga. Kapaarasia kanu, ejeni Satan ka akejokin ebe ‘edit akecepak’ naideuna kanu Edeke amudiar kesi, kanuka ngun eraasi kesi kwana luededeng ido komumu adepar. (Apukokinio 12:12, 17) Konye, apotu itunga luipu luetukurianete ajokin kolakunos. Eipone bo ani apotu kesi kolakunotor?

KITEPEG AJOKIN IDO KOLAKUN KAMA EJAASI KESI

14. Kwape Ikristayon lukolo sek, eipone bo ani ipedoria oni alakun kanejaasi ajokin?

14 Elimokinit oni Ebaibuli eipone lo ipedoria oni aitepeg ajokin ka alakun kamakec. Kwape aanyunet,  enerenenasi icetunga luka Epeso keda ajokin eroko kes isisiaunia abeit. Eipone bo ani alakunotor kesi? Elimokinit oni Ebaibuli ebe: “Ka itunga luipu kangul lukiswamaete nukamurwonut, kotukonokisi ikeceitabon, kicweata kakonyen nuka itunga kere.” (Aswamisio 19:19) Naarai akotosi kesi araun ikristayon, apotu kesi kicweata ikeceitabon luka amurwonut. Ejok oni da aswam kwangin. Itunga kere luekotosi aijanaakin Yawe ibusakinit alemar iboro luikamanara keda ajokin. Imoriaritos iboro ngun itabon, isineman, ikososinei, aboliasio, karaida apositan nuitodunitos ebe eraasi amurwonut, ka ajokin iboro luitelelete. Imoriaritos bobo ngun iboro luenapete itunga kanu ayuwar kesi kotoma ationis.—1 Ikorinton 10:21.

15. Anyoika bobo nuibusakinit oni aswam kanu aitepeg Satan ka ajokin?

15 Ketubor apak naedit akaulo itunga luka Epeso aicwe ikeceitabon luka amuronut, abu ekiyakia Paul kiwadik ebe aroko kesi ‘eutasi’ keda ejie “ka ajoresio nuka imoyon.” (Ipeson 6:12) Eebo, karaida adaunitos kesi aicwe ikecetabon, aroko ajokin iticanete kes. Anyoika bobo nuebusakinit kesi aswam? Abu ekiyakia Paul kolimokinite kes ebe: “Kolemutu ebuku loka aiyuun, loipedoriata aitudeng imalia kere luenokiete luka loka aronon.” (Ipeson 6:16) Kwape eyuwaritor ebuku ekajion kojie, eyuwari oni aiyuuniwok. Arai kijaai oni kamun ebe epedori Yawe ayuwar oni, ipedori oni aitepeg Satan ka ajokin.—Matayo 17:20.

16. Eipone bo ani ipedoria oni aitogogong aiyuuniwok kama ejai Yawe?

16 Eipone bo ani ipedoria oni aitogogong aiyuuniwok  kanejai Yawe? Ibusakinit oni aisiom Ebaibuli kangin paaran ido kacamunitos ebe ebuni Yawe ayuwar oni. Arai kimunokina oni nejai Yawe, mam Satan ka ajokin epedorete aitican oni.—1 Yokana 5:5.

17. Inyoin bobo icebore yenepedori ayuwar oni kanejaasi ajokin?

17 Anyoika bobo nukebusakinit ikristayon luka Epeso aswam? Ajaasi kesi aboisit napol ecudet. Aso abu Paul kolimok kes ebe: “Kilipenenete apakio kere.” (Ipeson 6:18) Abeit kesi ailip Yawe ayuwar kesi apakio kere. Do bo do oni? Kijai oni da akwap naepol ecudet. Aso ibusakinit oni ailip nejai Yawe ayuwar oni, ido ibusakinit oni ailip etosomaete ekekiror. (Kosiom Awaragasia 18:10.) Arai kinyikok oni ailip Yawe alakun oni kanejai Satan, iirari Yawe ailipasineiwok.—Isabulin 145:19; Matayo 6:13.

18, 19. (a) Eipone bo ani ipedoria oni aipikor ejiewok keda Satan ka ajokin? (b) Anyoin aingiset naibuni oni abongokin kosula loetupakini?

18 Arai kilema oni iboro kere luikamanara keda ecudet kasodete amunokin Yawe ayuwar oni, ipedori aitepeg Satan ka akejokin. Mam oni ibusakinit akuriau kesi. (Kosiom Yakob 4:7, 8.) Epol Yawe apedor adepar ajokin. Abu Yawe koleco kesi kapaarasia nuka Noa. (Yuda 6) Kiitu ebe, itosomai Yawe ikemalaikan kanuka ayuwara oni. (2 Ikabakan 6:15-17) Ipedori oni amunokin ebe ingarakini oni Yawe aipikor ejiewok keda Satan ka ajokin.—1 Petero 5:6, 7; 2 Petero 2:9.

19 Kwape eraar Satan ka ajokin eyangaununete aiticanitoi, kanukinyo mam Edeke emudiara kesi? Ebongokinio aingiset ngin Kosula loetupakini.