Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Anyoika bo Nuisisianakini Oni Ebaibuli?

 ESULA LOITOMONET AKANY

Eipone Loedolitor Aima Edeke

Eipone Loedolitor Aima Edeke

1. Ingai bo epedori aitetemikin oni epone loedolitor aima Edeke?

EWOMITOS itunga lukodiinin luipu ebe isisianakinete idiinin kere abeit naikamunit Edeke. Konye mam ngun eraas abeit, naarai kangolidiini isisianakini nuitegelikina nuikamunitos Edeke ka epone loedolitor aima ngesi. Epone bo ani ijenunia ijo erot loedolitor aima Edeke? Yawe bon epedori aitetemikin oni epone loedolitor aima nges.

2. Epone bo ani isisiauna ijo erot loedolitor aima Edeke?

2 Einakinit oni Yawe Ebaibuli kanu oni aisisiaun epone loedolitor aima nges. Aso kisisia Ebaibuli, ido ingarakini Yawe ijo aimeda naarai epodokinit ngesi ijo noi.—Isaia 48:17.

3. Anyoika bo nuekoto Edeke oni aswam?

3 Ebakasi icetunga ebe itojokit Edeke idiinin kere , konye mam Yesu abu kisisianak kwangin. Abala Yesu ebe: “Nginitunganan yenikabala eong ebe, ‘Ejakait, Ejakait,’ mere nges elomuni ajakanut naka akuj; dimarai yeniswamai nuekoto Papaka.” Aso ibusakinit ijo aisisiaun nuikamunitos akote naka Edeke kosodi aswam nuekoto ngesi. Eraasi nu nuepolok noi naarai itupusit Yesu itunga lumam erimaaritos aicoreta nuka Edeke kwape luebilitos ekisil, “lukeswamak nukepali.”—Matayo 7:21-23.

4. Anyoika nuabu Yesu kolimunite kanuikamunitos akote naka Edeke?

4 Ikwenyarit Yesu oni ebe arai ikoto oni aswam nuekoto Edeke, kitereikin oni keda ainingosio nuipu. Abala ngesi ebe: “Kolomasi aitor orute loediding; naarai elal  erut, ipajajai da erot, loebei amudiaro, luelomarete da kotomake eraasi luipu. Ediding da erut, eridid da erot loebei aijar, luedumunete da eraasi luikidioko.” (Matayo 7:13, 14) Erot loeridid, erai epone loedolitor oni aima Edeke, ido ebei toma aijar naka ikaru kere. Erot loipajajai, erai eipone lomam edolitor aima Edeke, ido ebei toma atwanare. Konye mam Yawe ekoto idiotunganan atwanare. Ijaikinit ngesi itunga kere arereng na aisisia nuipu nuikamunitos ngesi.—2 Petero 3:9.

EPONE LOEDOLITOR AIMA EDEKE

5. Eipone bo ani ipedoria oni ajenun itunga luijaanakinete Edeke koipone kalo ejok?

5 Abu Yesu kolimunite ebe ipedori oni ajenun itunga luemaete Edeke koipone kalo edolit. Ipedori oni aswam ngun koipone lo aingic akiro nuiyuunito kesi ka aswamisiokec. Abu ngesi kotema atiar: “Ijenunete kes ka akeceraito.” Kosodi aiyatakin ebe: “Kwape kwangin ngolikitoi loejok erai araito nuejok.” (Matayo 7:16, 17) Mam ngin itodunit ebe eraasi itunga luijaanakinete Edeke luedolito. Konye ikejaanakinak luka Edeke etamitos aswam nuedolito. Ibuni kwana oni aisisiaun akiro nuepedorete aingarakin oni ajenun itunga luijaanakinete Edeke koipone kalo edolit.

6, 7. Kanukinyo ibusakinitor aima nakabeit korai naelomunit kotoma Obaibuli? Ido anyoika nuisisiauni oni kanejai aanyunet naka Yesu?

6 Ibusakinit aimawok korai naelomunit kotoma Obaibuli. Isisianakini Ebaibuli ebe: “Nginikirot naiwadikatai naiyengakit Edeke ejai ajokis aisisianakinia, aikwenyaria, aitetenia, aituutooria da toma adolit, tetere ilosikino etunganan loka Edeke, loisilosikinitai kotoma nginiswamisioit naejok.” (2 Timoteo 3:16, 17) Abu  ekiyakia Paul kiwadikak Ikristayon ebe: “Naijauniata akirot naka Edeke naipupunete kamakosi, ipotu kocamut, mere kwape akirot naka itunga, konye kwape eraar abeit akirot naka Edeke.” (1 Isesalonikan 2:13) Aima nabeit esipokina toma akirot naka Edeke, Ebaibuli. Mam elomunit kotoma aomisio nuka itunga, inonosio, arai kanenicie kere.

7 Aisisianakinetake Yesu kere elomunitos kotoma Obaibuli. (Kosiom Yokana 17:17.) Alemununei Yesu akeisisianakineta kere kotoma aiwadikaeta. (Matayo 4:4, 7, 10) Ikejaanakinak luka Edeke lukabeit etupitos aanyunet naka Yesu ido elemununete aisisianakinetakec kere kotoma Obaibuli.

8. Anyoika nuisisianakini oni aanyunet naka Yesu kanuikamunitos aima Yawe?

8 Ekoto oni aima Yawe bon. Ebakasi Isabulin 83:18 ebe: “Tetere ejenunete ebe ijo bon, Loerai ekonikiror Yawe, Irai Loijai kuju kakuj koyaite akwap kere.” Akoto Yesu itunga ajenun Edeke lokabeit ka aisisianakin kes ekiror loka Edeke. (Kosiom Yokana 17:6.) Abala Yesu ebe: “Komaenenei Ejakait Ekonideke, kijaanakinenei ngesi bon.” (Matayo 4:10) Kwape ejaanakinak luka Edeke, itupit oni aanyunet naka Yesu. Ijaanakini oni Yawe bon, itosomai oni ekekiror, ido isisianakini oni lucetunga nuikamunitos ekiror ngol ka nuebuni Edeke aswam kanukec.

9, 10. Eipone bo ani itodunia oni ebe iminanara oni bonik?

9 Ekoto oni aminanara bonik. Abu Yesu kisisianak ikesisiak aminanara bonik. (Kosiom Yokana 13:35.) Amina nakabeit mam epodo aiboisit naelomunitor itunganan, ka einono, arai ebarit itunganan arai mam. Ibusakinit aminawok aimorikikit oni kwape inacan. (Ikolosain 3:14) Nges mam oni kilomaria toma ojiisinei ka aiar itunga. Ebala Ebaibuli ebe: “Kana nges etakanuniata  idwe luka Edeke ka idwe luka Satan; ngin kere yenimam iswamai nukadolit mam erai yenika Edeke, karaida yenimam emin onaceke.” Ido iyatakinit ebe: “Kaminanaros. Mere kwape Kain lokerai loka lokaronon koar da onaceke.”—1 Yokana 3:10-12; 4:20, 21.

10 Itosomai oni apakiwok, agogonguwok ka iborowok kanu aingarakinia ka aisinyikoinikin bonik. (Iburanian 10:24, 25) “Keswamaikisi itunga kere ajokis.”—Igalatian 6:10.

11. Kanukinyo icamunitori oni Yesu kwape erot lodumunet aitajario?

11 Ekoto oni arimaar Yesu naarai nges erot lodumunet aitajario. Ebala Ebaibuli ebe: “Emamei aitajar kotoma ece kere: naarai emamei ecekiror kokwap kakuj loeinakinitai itunga, loibusakinitor oni aitajario.” (Aswamisio 4:12) Kosula lo 5 koitabo kalo, apotu oni kesisiautu ebe abu Yawe kijuk Yesu ainaikin akeijar kwape alucet kanuka itunga luerimaaritos Edeke. (Matayo 20:28) Aseu Yawe Yesu kwape Ekabaka loebuni aipuga akwap. Ngun nges ebalar Ebaibuli ebe ibusakinit oni arimaar Yesu arai ikoto oni adumun aijar naka ikar kere.—Kosiom Yokana 3:36.

12. Kanukinyo mam oni ilomaritor toma politikis?

12 Mam ekoto oni alomarit toma akiro nuka politikis. Mam Yesu alomarit opolitikis. Naetosaere nges, abu ngesi kolimok epugan loka Iromayon loanyaritai Pilato: “Akajakanut mere naka akwapin kanu.” (Kosiom Yokana 18:36.) Kwape Yesu, imunokina oni Ajakanut naka Edeke, ido kanuka ngun, mam oni ilomari opolitikis kotoma aibosio kere. Konye, kicorakinit oni Ebaibuli arimaarit “ikapolok lueyaito,” kes apuganisinei. (Iromayon 13:1) Kiricit oni ikisila luka akwap naijai oni. Konye, arai itepegit ekisil loka apugan ekisil loka Edeke, ibusakinit  do oni aputoor ikiyakia, luapotu kotemasi ebe: “Ibusakinit arimarit Edeke aitelekarit itunga.”—Aswamisio 5:29; Marako 12:17.

13. Anyoika bo akiro nuilimonokini oni nuikamunitos Ajakanut naka Edeke?

13 Ekoto oni aiyuun ebe Ajakanut naka Edeke ngesi bon epedori aitemokin atiokisio nuejaasi toma akwap. Abu Yesu kotema ebe “elimonokinio Akiro nu Nukajokak nuka ajakanut anatar akwapin kere.” (Kosiom Matayo 24:14.) Emamei apugan naepedori aswam iboro luebuni ajakanut naka Edeke aswamaikin oni. (Isabulin 146:3) Abu Yesu kisisianaki oni ailip Ajakanut naka Edeke abunere neabalar ngesi ebe: “Akonijakanut kobu. Nuikoto kiswamai kakwapin kwape iswamaere kotoma akuj.” (Matayo 6:10) Elimokinit oni Ebaibuli ebe ebuni Ajakanut naka Edeke amudiar apuganisinei nukaitunga kere ido ‘ejaenena ajakanut ngin ikar kere.’—Daniel 2:44.

14. Lubo angai iwomit ijo emaete Edeke koipone kalo edolit?

14 Akaulo ajenun akiro ngun, ibusakinit ijo aingitakin ebe: ‘Lubo angai isisianakinete abeit naelomunit kotoma Obaibuli? Lubo angai elimonokinete luce akiro nuikamunitos ekiror loka Edeke? Lubo angai itodunitos aminanara nakabeit ido kiyuunitos ebe abu Edeke kijuk Yesu alakun oni? Lubo angai mam elomaritos toma politikis? Lubo angai elimonokinete ebe Ajakanut naka Edeke bon nges epedori alemar atiokisiowok kere?’ Erai Ajenak Luka Yawe bon.—Isaia 43:10-12.

ANYOIKA BO NUIBUNI IJO ASWAM?

15. Anyoika bo nuibusakinit oni aswam arai ikoto oni Edeke aitojok aimawok?

15 Mam erai aiyuun bon ekoto Edeke. Ajokin da iyuunitos ebe ejai Edeke, konye mam erimaaritos ngesi. (Yakob  2:19) Arai ikoto oni Edeke aitojok aimawok, mam ekoto oni aiyuun bon ebe ejai Edeke konye ekoto oni aswam nuekoto ngesi.

16. Kanukinyo ibusakinitor oni ainger idiinin lukaisab?

16 Kanu aitojok aimawok, ibusakinit oni ainger aima nakaisab. Abu enabi Isaia kiwadikate ebe: “Konyoutu kokidingike; Kitalaunos.” (Isaia 52:11; 2 Ikorinton 6:17) Ngun ngesi edolitor oni ainger aiswamanar kaidiinin lukaisab.

17, 18. Inyoin bo “Babulon nakapolon,” ido kanukinyo ibusakinitor ijo anyoun kotomake katipet?

17 Inyoin bo ediini lokaisab? Ngesi ediodiini loisisianakini oni aima Edeke koipone lomam iriamara keda Ebaibuli. Enyarit Ebaibuli idiinin kere lukaisab ebe “Babulon nakapolon.” (Apukokinio 17:5) Kanukinyo? Akaulo naka akalel kapaarasia nuka Noa, apotu aisisianakineta nukaisab kogeunos ko Babulon. Apotu aisisianakineta nukaisab kisiarakinos akwap kere. Kwape aanyunet, amaenenete itunga luko Babulon idekesio iuni. Kapaarasiawok da, isisianakinete idiinin luipu ebe erai Edeke Etiriniti, konye isisianakini Ebaibuli ebe erai Edeke ediopet, ngesi Yawe, ido Yesu nges Okokuke. (Yokana 17:3) Eyuunitos bobo itunga luko Babulon ebe ketwana itunganan esalakini emoyo ejari ido epedori aiticanio kakim. Mam ngun eraasi abeit.—Koany Nuengesete 14, 17, ka 18.

18 Edwarit Edeke ebe ebunio amudiar idiinin kere lukaisab. (Apukokinio 18:8) Imisiikinit kereka ijo ibore yenibusakinitor ijo anyoun kodiinin lukaisab katipet? Ekoto Edeke Yawe ijo anyoun eroko apak.—Apukokinio 18:4.

Arai kijaanak ijo Yawe nepepe ka iketunga, iraun ijo ediopet kotungake luejaasi anatar akwapin kere

19. Arai kiseu ijo aijaanakin Yawe, eipone ani epedoria ngesi aidara ijo?

19 Arai kiseu ijo anyoun kodiniin lukaisab kosodi  aijaanakin Yawe, aticepak mam ice kopaperokon ka ipajanakon epote aiyalamikin arai kiseu ijo anyoun kodiinikon ido epedorete aiswamakin ijo erono. Konye mam Yawe ejalakini ijo. Iraun ijo ediopet komilionin lukaitunga lueminanara bonik luejaasi anatar akwapin kere, ido idumuni ijo amuno naka aijar ikar kere kotoma akwap nakitetet. (Marako 10:28-30) Aticepak epedorete ipaperokon ka ipajanakon da lukireitos ijo acamun aisisia Ebaibuli.

20. Kanukinyo eraatar akiro nuepolok ijo aima Edeke koipone loedolit kwape kwana?

20 Eyapie Edeke alemar aronis kere kakwap kosodi Ajakanutuke aipuga akwap kere. (2 Petero 3:9, 13) Eraun apak na naejok noi! Epote itunga kere aima Yawe kwape ekotor ngesi. Aso eraasi nuepolok ijo aima Edeke koipone loedolit kwape kwana.